ފަތުރުވެރިކަމުގެ ސިނާއަތުގައި މަސައްކަތް ކުރާ ދިވެހިންނަށް ހާއްސަ ސޯޝަލް ހައުސިން ކެޓެގަރީއެއް ކަނޑައެޅުމަށް ސަރުކާރުން ނިންމައިފިއެވެ.

އިއްޔެ ބޭއްވި ވަޒީރުންގެ ކެބިނެޓްގެ ގެ ބައްދަލުވުމުގެ ތަފްސީލު ހިއްސާ ކުރުމަށް ރައީސް އޮފީހުން ރޭ ބޭއްވި ނޫސްވެރިންގެ ބައްދަލުވުމުގައި ޕްރިންސިޕަލް ސެކްރެޓެރީ ޓު ދަ ޕްރެޒިޑެންޓް އޮން ޕަބްލިކް ޕޮލިސީ، އަބްދުالله ނާޒިމް އިބްރާހީމް ވިދާޅުވީ، ފަތުރުވެރިކަމުގެ ސިނާއަތުގައި މަސައްކަތް ކުރާ ދިވެހިންނަށް ހާއްސަކޮށްގެން ސޯޝަލް ހައުސިން ކެޓެގަރީއެއް ކަނޑައެޅުމަށް ކަރުދާހެއް ހުށައެޅިފައިވާ ކަމަށާއި މި ކަރުދާހުގެ ތެރެއިން ތެރެއިން މި ސަރުކާރުން ތަރައްގީ ކުރުމަށް ނިންމާފައިވާ އާބަން ސެންޓަރުތަކަށް ރިއާޔަތް ކޮށްގެން ރީޖަން ވައިސްކޮށް ވެސް މި ހައުސިން ސްކީމްގެ ތެރެއިން ފުރުސަތު ލބޭިނެ ގޮތް ހަމަޖައްސައި ދިނުމަށް މަޝްވަރާ ކުރައްވާފައިވާ ކަމަށެވެ.

މީގެ އިތުރުންވެސް ނާޒިމް ވިދާޅުވީ މި ކެޓެގަރީގެ ދަށުން އެފަދަ މުވައްޒަފުންނަށް ހައުސިން ޕްރޮސެސް ހަމަޖައްސައި ދިނުމުގެ ގޮތުން ރާއްޖޭގެ އެކި ސަރަހައްދުތަކުގައި ކުރިއަށް ގެންދާ ސޯޝަލް ހައުސިން މަޝްރޫއުތަކުގެ ވަކި އިންސައްތައެއް ފަތުރުވެރިކަމުގެ ސިނާއަތުގައި މަސައްކަތް ކުރާ މުއައްޒަފުންނަށް ހާއްސަ ކޮށްގެން އެފުރުސަތު ފަހިކޮށްދިނުމަށް މަޝްވަރާ ކުރެވުނު ކަމަށެވެ. 

އަދި ހައުސިން ހަމައެކަނި މިލްކު ވުމުގެ އިތުރުން އަމިއްލަ ރަށް ނޫން އެހެން ހިސާބެއްގައި އުޅޭއިރު، ކުއްޔަށް ނަގައިގެން އެތަނެއްގައި ބޯހިޔާވަހިކަން ހޯދައިގެން އުޅޭނީ ނިޒާމެއް ވެސް މީގެ ތެރޭގައި ހިމެނުމަށް ކެބިނެޓުގައި މިއަދު ނިންމާފައިވާކަމަށް ވެސް އެބޭފުޅާ ވިދާޅުވިއެވެ.

އިތުރަށް ނާޒިމް ވިދާޅުވީ ހަފްތާ 14 ގައި ހިމެނިފައިވާ ބޯހިޔާވަހިކަމުގެ މަޝްރޫއުތައް ރެގިއުލޭޓް ކުރުމަށް ގެދޮރުވެރިކަމުގެ މިންގަނޑުތައް އެކުލެވޭ ބިލެއް ޤާނޫނީ ހައިސިއްޔަތުން ގެނައުމަށްޓަކައި ޑްރާފްޓްކޮށް ރައްޔިތުންގެ މަޖިލީހަށް ފޮނުވުމަށް ހިމެނިފައިވާކަމަށާއި މިކަމަކީ އެ ބިލުގެ ތެރޭގައި ހިމެނޭނެ ކަމަކަށްވާތީ މި ބިލަށް ބޭނުންވާ މައުލޫމާތު ހޯދުމަށާއި ސޯޝަލް ހައުސިން ކެޓެގަރީ ކަނޑައެޅުމަށް އެކުލަވާލަން ޖެހޭ އުސޫލުތައް އެކުލަވާލެއްވުމުގެ ކަންކަން މިނިސްޓްރީ އޮފް ޓޫރިޒަމާއި އަދި ކަމާއި ގުޅުން ހުރި އެހެން ފަރާތްތަކާއި މަޝްވަރާ ކުރައްވައިގެން ކުރިއަށް ގެންދިއުމަށް ނިންމާފައިވާ ކަމަށެވެ.