އިންޑިއާއިން ރާއްޖެއަށް ކަނޑައަޅުއްވާފައި ހުންނަވާ ސަފީރު މުނޫ މަހާވަރު މިއަދު ފޮރިން މިނިސްޓްރީއަށް ވަޑައިގެންނެވީ ކުރިންވެސް ތާވަލްކުރެވިފައި އޮތް ބައްދަލުވުމަކަށް ކަމަށް ރާއްޖޭގައި ހުންނަ އިންޑިއާ ހައިކޮމިޝަންއިން ބުނެފި އެވެ.

އިންޑިޔާއަށް ކުޑައިމީސް ކުރި މައްސަލާގައި އެގައުމާއި ރާއްޖެއާއި ދެމެދު އުފެދިފައިވާ ނުތަނަވަސްކަމާއި ގުޅިގެން، އިންޑިޔާ ސަފީރު ފޮރިން މިނިސްޓްރީއަށް ހާޒިރު ކުރާ ކަމަށް ޚަބަރުފެތުރިފައިވާ މި ދަނޑިވަޅުގައި، އިންޑިޔާ ހައިކޮމިޝަނުން އެކްސްގައި ކުރި ޕޯސްޓެއްގައި ބުނީ، ސަފީރު ވަޑައިގެންވީ ފޮރިން މިނިސްޓްރީގެ އެމްބެސެޑަރ އެޓް ލާޖް ޑރ. އަލީ ނަސީރުއާއެކު ކުރިން ބޭއްވުމަށް ހަމަޖެހިފައި އޮތް ބައްދަލުވުމަކަށް ކަމަށެވެ. 

އަދި އެ ބައްދަލުވުމުގައި ދެގައުމުގެ ދެމެދުގައި އޮތް ގުޅުމާއި ގުޅޭގޮތުން މަޝްވަރާ ކުރައްވާފައިވާ ކަމަށްވެސް ބުނެފައިވެއެވެ. 

އިންޑިޔާ ހައި ކޯމިޝަނުން މިފަދައިން ބުނެފައިވާއިރު، މޯދީއަށް ކުޑައިމީސް ކުރި މައްސަލާގައި ރާއްޖެއިން އިންޑިއާއަށް ކަނޑައަޅުއްވާފައި ހުންނަވާ ސަފީރު މިއަދު އިންޑިއާގެ އެކްސްޓާނަލް އެފެއާޒް މިނިސްޓްރީއަށް ހާޒިރުކޮށްފައިވާ ކަން ފާހަގަކޮށްލަންޖެހެއެވެ. 

މޯދީއަށް ކުޑައިމީސް ކުރި މައްސަލާގައި ގުޅިގެން، އެ މައްސަލާގައި ޝާމިލްވާ ޑެޕިއުޓީ މިނިސްޓަރުން ކަމުގައިވާ މަލްޝާ ޝަރީފާއި މަރިޔަމް ޝިއުނާ އަދި އަބްދުالله މަހްޒޫމް މާޖިދު ވަނީ އިއްޔެ ސަސްޕެންޑްކޮށްފައެވެ.