ޖަޕާނު ސަރުކާރުގެ އެހީ އާއިއެކު މަސް އޮޑިފަހަރުގެ އެންވަތަށް ގެންނަށް ޖެހޭ ބަދަލުތަކާއި ބެހޭ ދިރާސާއެއް، މަސްވެރިކަމާއި ކަނޑުގެ ވަސީލަތްތަކާ ބެހޭ ވުޒާރާއިން ފަށްޓައިފިއެވެ.

މި ދިރާސާއަކީ މި ސަރުކާރު އައުމަށްފަހު މިގޮތަށް ކުރެވޭ ފުރަތަމަ ދިރާސާއެވެ. މަސްވެރިކަމާއި ކަނޑުގެ ވަސީލަތްތަކާ ބެހޭ ވުޒާރާއިން އިސްނައިގެން ކުރިއަށްގެންދާ މި ދިރާސާއާއި ގުޅޭގޮތުން އެ ވުޒާރާއިން ބުނީ، މި ދިރާސާ ފެށުމުގެ ގޮތުން ގދ. މަޑަވެލި 'ކަމަނަ' ދޯނީގެ އެންވަތް ބަދަލުކޮށްފައިވާ ކަމަށެވެ.

މަސްވެރިކަމާ ބެހޭ ވުޒާރާއިން ބުނި ގޮތުގައި މި ދިރާސާގެ ދަށުން އެ ދޯނީގެ އެންވަތަށް ގެނައި ބަދަލުތަކުގެ ތެރޭގައި އެންވަތުގެ ލޮނުގަނޑު ދައުރުވާ ގޮތް ހެދުމާއި،  މަރުވެފައި ހުންނަ އެން، ވަތަށް ނުފައިބާ ވަތުން ނެގޭ ގޮތަށް އެންވަތް ބަދަލުކުރުން ހިމެނޭކަމަށެވެ.

އެ ވުޒާރާއިން އިތުރަށް ބުނި ގޮތުގައި ދޯނީގެ އެން ވަތަށް ގެނެވުނު ބަދަލުތަކުން މިހާރުވެސް ފެންނަ ނަތީޖާ ވަރަށް ރަނގަޅުކަމަށާއި އެހެން ނަމަވެސް އެ މަސައްކަތަކީ ކާމިޔާބު ކަމެއްތޯ ބެލުމަށް މި ދިރާސާގައި ސައިންޓިފިކް ގޮތުން ބަލަންޖެހޭ ކަންތައްތައް އިތުރަށް ބެލުމަށް ހަމަޖެހިފައިވާ ކަމަށެވެ.

ރައީސް ޑރ. މުހައްމަދު މުއިއްޒުގެ ސަރުކާރުން ރާއްޖޭގެ ވެރިކަމާއި ހަވާލުވެ ވަޑައިގެންނެވުމަށް ފަހު މަސްވެރިކަމަށް ވަކި ވުޒާރާއެއް ހެއްދެވުމަށްފަހު ރާއްޖޭގެ މަސްވެރިކަން ކުރިއެރުވުމަށް މި ސަރުކާރުން ވަނީ ގިނަ ކަންތައްތަކެއް ރާއްވަވާފައެވެ.

މިހާތަނަށް މި ސަރުކާރުން ރާއްވަވާފައިވާ ކަންތައްތަކުގެ ތެރޭގައި  މަސްވެރިންކަމުގެ ފަންނު އުނގަންނައި ދިނުމަށް ކޮލެޖެއް އުފެއްދުމުގެ މަސައްކަތް މިހާރު ފަށްޓަވާފައިވާއިރު، ކޮންމެ ދޯންޏެއްގައި ޑައިވިން ސެޓްފިކެޓް އޮތް ރެސްކިއު ޑައިވަރެއް ހުރުން ލާޒިމް ކުރުމަށް ސަރުކާރުން ނިންމާފައިވާ ނިންމުން ފާހަގަ ކޮށްލެވެއެވެ.

ހަމަ މިއާއިއެކު ނިމިދިޔަ ސަރުކާރުން މަސްވެރިންނަށް ދޭންޖެހޭ ފައިސާގެ ތެރެއިން ބޮޑު އަދަދެއް މި ސަރުކާރުން ވަނީ މަސްވެރިންނާއި ހަވާލުކޮށް ނިންމަވާފައެވެ.