ރާއްޖޭގެ ބަދަލުގައި އިންޑިއާގެ ލަކްޝަދީޕަށް ޒިޔާރަތް ކުރަން ގޮވާލައި އިންޑިޔާއިން މީސްމީޑިއާގައި ފަށާފައިވާ ކެމްޕޭނާ ގުޅިގެން، އެގައުމުގެ ފަތުރުވެރިން ރާއްޖޭގައި ޗުއްޓީ ހޭދަ ކުރަން ހަދާފައިވާ ގިނަ ބުކިންތައް ކެންސަލް ކުރަމުންދާ ކަމަށް ބުނެ ފަތުރަމުންދާ ވާހަކަތައް އިންޑިއާގެ އެންމެ ބޮޑު ޑޮމެސްޓިކް އަދި އިންޓަނޭޝަނަލް އެއާލައިން ކަމަށްވާ އިންޑިގޯ އިން ދޮގު ކޮށްފި އެވެ. 

އިންޑިގޯ އެއާލައިންގެ އިސް އޮފިޝަލަކާއި ހަވާލާދީ އެގައުމުގެ ނޫހެއް ކަމަށްވާ "ވިއޯން" އިން ރިޕޯޓް ކޮށްފައިވާ ގޮތުގައި އެގައުމުން ރާއްޖެއަށް ހަދާފައިވާ ޓިކެޓް ބުކިންސް އާއި ހޮޓެލް ބުކިންސްގެ ކެންސަލޭޝަނެއް ނޫޅެއެވެ. 

އެކަމާއި ގުޅޭ އިތުރު ތަފްސީލް ނުދީ، އެ އޮފިޝަލް ވަނީ އެކަމާއި ގުޅިގެން ބަޔާނެއް ނެރެން ނެރެން ޖެހިއްޖެ ހާލަތެއްގައި ނެރޭނެ ކަމަށެވެ. 

Advertisement

އިންޑިޔާ އަކީ ރާއްޖެއަށް އެންމެ ގިނަ ފަތުރުވެރިން އަންނަ ގައުމަށް ވާއިރު، އިންޑިގޯއަކީ އިންޑިއާ އާއި ރާއްޖެއާ ދެމެދު އެންމެ ގިނަ ފްލައިޓްތައް ބާއްވާ އެއް އެއާލައިނެކެވެ. އިންޑިޔާ ފަތުރުވެރީންގެ ޑިމާންޑް ބޮޑުވުމުގެ ސަބަބުން މިދިޔަ އޮކްޓޯބަރު މަހު އެ އެއާލައިން އިން ވަނީ ހައިދަރުއާބާދުން ވެސް މާލެއަށް ދަތުރުތައް ފަށާފަ އެވެ.

އިންޑިޔާގެ ފަތުރުވެރިން ޕްރޮމޯޓް ކުރުމަށް ހަދާފައިވާ ލަކްޝަދްވީޕު އަށް އެގައުމުގެ ބޮޑު ވަޒީރު ނަރެންދުރަ މޯދީ ކުރި ދަތުރެއްގައި ނަގާފައިވާ ފޮޓޯ ތަކެއް މީސްމީޑިއާގައި ހިއްސާކުރައްވާއި، ރާއްޖޭގެ ތިން ޑެޕިއުޓީ މިނިސްޓަރެއް، މޯދީއަށް ކުޑައިމީސް ކުރުމާއި ގުޅިގެން ރާއްޖެ ބޯއިކޮޓް ކުރުމަށް ގޮވާލާ އަޑު މީސްމީޑިއާގައި ވަނީ ގަދަވެފައެވެ. 

އެއާއެކު 10،500 ހޮޓެލް ބުކިން އަދި 5،520 ފުލައިޓު ބުކިން ކެންސަލް ކޮށްފައިވާ ކަމަށް އިންޑިއާގެ ބައެއް ނޫސްތަކާއި މީސްމީޑިއާ މީޑިއާ އެކައުންޓުތަކުން ބުނެފައި ވެއެވެ. ނަމަވެސް އެކަން، ރަސްމީ އެއްވެސް އީދާރާއަކުން މިހާތަނަށްވެސް ކަށަވަރު ކޮށްދީފައި ނުވެއެވެ.