ދިރާސީ އާ އަހަރުގެ ކިޔެވުން މެއި 26 ގައި ފަށާގޮތަށް ނިންމާ، އާ އެކަޑަމިކް ކަލަންޑަރ ތަޢުލީމާއި ބެހޭ ވުޒާރާއިން މިއަދު އާއްމުކުރައްވައިފިއެވެ.

ތަޢުލީމާއި ބެހޭ ވުޒާރާއިން މިއަދު އާއްމުކުރި އެކަޑަމިކް ކަލަންޑަރުގައިވާ ގޮތުން މި ސަރުކާރުންވީ ވަޢުދާއި އެއްގޮތަށް ރަމަޟާންމަހުގެ ފަހު 10 ވަނީ ބަންދު ދުވަސްތަކެއްގެ ގޮތުގައި ކަނޑައަޅުއްވާފައެވެ.

އާ އެކެޑަމިކް ކަލަންޑަރުގައިވާ ގޮތުން މިމަހުގެ 7 ވަނަ ދުވަހު ކިޔެވުން ފެށުނު 2023 ވަނަ އަހަރުގެ ދިރާސީ އަހަރުގެ ދެވަނަ ޓާމުގެ ކިޔެވުން ނިމޭނީ، 30 އޭޕްރީލް 2024 ގައެވެ. މީގެ ކުރީގައިވާ ގޮތުން މި ހިނގާ ދެވަނަ ޓާމުގެ ކިޔެވުން ނިމޭގޮތަށް އޮތީ 13 ޖޫން 2024 ގައެވެ.

އާ އެކެޑަމިކް ކަލަންޑަރުގައިވާ ގޮތުން ދެވަނަ ޓާމުގެ ކިޔެވުން ނިންމާ ދަރިވަރުން އަހަރީ ޗުއްޓީއަށްދާނީ 2 މެއި 2024 ގައެވެ. ކުރިން އަހަރީ ޗުއްޓީއަށްދާގޮތަށް އޮތީ 16 ޖޫން 2024 ގައެވެ. ގާތްގަނޑަކަށް 3 ހަފްތާގެ ޗުއްޓީއަކަށްފަހު ދިރާސީ އައު އަހަރުގެ ކިޔެވުން ފެށުމަށް ޓީޗަރުން ސްކޫލްތަކަށް ރިޕޯޓްވާންޖެހޭނީ 22 މެއި 2024 ގައެވެ. އަދި ދިރާސީ އައު އަހަރުގެ ކިޔެވުން ފެށޭނީ 26 މެއި 2024 ގައެވެ. ދިރާސީ އައު އަހަރުގެ ކިޔެވުން ކުރިން ފަށާގޮތަށް އޮތީ 31 ޖުލައި 2024 ގައެވެ.

ކަލްނަޑަރުގައިވާ ގޮތުން ކިޔަވައިދޭދުވަހުގެ އަދަދަށް ވަނީ ބޮޑު ބަދަލެއް އައިސްފައެވެ. އެގޮތުން ކުރީގެ ކަލްނޑަރުގައި ދެވަނަ ސެމިސްޓާރގައި ކިޔަވައި ދިނުމަށް 108 ދުވަސް އޮތް ނަމަވެސް އައު ކަލަންޑަރުގައި މި ސެމިސްޓާރގައި ކިޔަވައިދުމަށް ހަމަޖެހިފައިވަނީ 78 ދުވަހުއެވެ.

ތަޢުލިމީ ވުޒާރާއިން މިއަދު ވަނީ 2024 ވަނަ އަހަރުގެ އެކަޑަމިކް ކަލަންޑަރުވެސް އާއްމު ކޮށްފައެވެ. އޭގައިވާ ގޮތުން 2024 ވަނަ އަހަރުގެ ފުރަތަމަ ޓާމުގެ ކިޔެވުން ކުރިއަށްދާނީ 26 މެއި 2024 އިން 26 ސެޕްޓެމްބަރު 2024 އަށެވެ. އަދި ދެވަނަ ޓާމުގެ ކިޔެވުން ކުރިއަށްދާނީ 06 އޮކްޓޯބަރު 2024 އިން ފެށިގެން 20 ފެބްރުއަރީ 2025 އަށެވެ. 2024 ވަނަ އަހަރު ދަރިވަރުން ކިޔަވާނީ ޖުމްލަ 180 ދުވަހުއެވެ. 2025 ވަނަ އަހަރުގެ ދިރާސީ އާ އަހަރުގެ ކިޔެވުން ފެށޭނީ 9 މާރިޗު 2025 ގައެވެ.

މި ސަރުކާރު ވެރިކަމަށް އައުމަށް ވީ ވަޢުދުގެ ތެރޭގައި ކޮވިޑު 19ގެ އާލަމީ ވަބާގެ ކުރިން ކިޔެވުން ކުރިއަށް ގެންދިޔަ ގޮތަށް ޑިސެމްބަރަށް ސްކޫލުގެ ބޮޑު ބަންދު ބަދަލުކުރުމަށް ބުނެފައި ވެއެވެ. މިހާރުގެ އެކަޑަމިކް ކަލަންޑަރު ބައްޓަށް ކުރެވިފައިވާ ގޮތުން މި ސަރުކާރުގެ އެ ވަޢުދު ފުރިހަމަވެގެން ދާނެއެވެ.