ކ. ހިންމަފުށީގައި ޤާއިމުކޮށްފައިވާ ނޭޝަނަލް ރީއިންޓެގްރޭޝަން ސެންޓަރ (އެންއާރުސީ) މަސައްކަތްތައް ފުރަތަމަ ފަހަރަށް ނޫސްވެރިންނަށް ދައްކާލައިފިއެވެ.

ދިވެހި ނޫސްވެރިންނަށް އެތަނާއި ގުޅޭ މަޢުލޫމާތު ހިއްސާކުރައްވާފައިވަނީ އެންއާރުސީގެ ޑިރެކްޓަރ ޖެނެރަލް އަންވަރު ނަޢީމެވެ. އަންވަރުގެ ވާހަކަ ބޮޑަށް އަމާޒުކުރެއްވީ ރާއްޖެއިން ބޭރަށް ހަގުރާމައަށްދާ ފަރާތްތަކާއި އަދި ހަނގުރާމަ ހިނގަމުންދާ ސަރަޙައްދުތަކުގައި ދިރިއުޅެމުން ގެންދާ ފަރާތްތައް އެސެންޓަރަށް ގެނެސް ރިހެބިލިޓޭޝަން ފަރުވާދިނުމުގައި އެ ސެންޓަރުން ޢަމަލުކުރަމުން ގެންދާ ގޮތްތަކުގެ މައްޗަށެވެ.

އެގޮތުން ހަނގުރާމަކުރާ ސަރަޙައްދުތަކުގައި ތިބި ދިވެހިން ރާއްޖެއަށް އަންނަ ބޭނުންވެ، އެކަން އެ ސެންޓަރަށް އެންގުމުން އެންމެ ފުރަތަމަ އެއީ ދިވެހިންކަން ޔަޤީންކުރުމަށް އެ ފަރާތްތަކުގެ ޑީއެންއޭ ޓެސްޓުތައް ހަދާކަމަށާއި، އަދި އެއަށްފަހު އެ ފަރާތްތަށް ރާއްޖެ ގެނެސް އެންއާރުސީގައި ބައިތިއްބައިގެން 30 ދުވަހުގެ އެސެސްމަންޓެއް ހަދައި ކޯޓަށް އެ އެސެސްމަންޓް ހުށަހަޅައި ކޯޓުން ދޭ މުއްދަތަކަށް ޕްރޮގްރާމް ހިންގޭނެ ކަމަށް އަންވަރު ވިދާޅުވިއެވެ.

"ދެން ކޯޓަށް އެ އެސެސްމަންޓް ހުށަހަޅައި ކޯޓުން ކަނޑައަޅާ މުއްދަތަކަށް އެމީހުންގެ ރިހެބިލިޓޭޝަން ޕްރޮގްރާމް މިތަނުގައި ހިންގާނީ،" މަޢުލޫމާތު ދެއްވަމުން އަންވަރު ވިދާޅުވިއެވެ.

އެންއާރުސީއަށް ނޫސްވެރިން ކުރި މި ޒިޔާރަތުގައި އަންވަރު އިތުރަށް ވިދާޅުވި ގޮތުގައި އެސެންޓަރު ހަދާފައިވަނީ އެއް ފަހަރާ 72 މީހުންނަށް އަދި 5 އާއިލާއަށް ފަރުވާފޯރުކޮށްދެވޭނެ ގޮތަށެވެ. އެތަނުގައި 4 ބުލޮކެއް ހެދިފައިވާއިރު އެއް ބްލޮކް އަންހެނުންނަށް ހާއްސަކޮށްފައިވާއިރު އެއް ބްލޮކް 18 އަހަރު ނުފުރޭ ފިރިހެން ކުދިންނަށް ހާއްޞަކުރެވިފައިވެއެވެ.މީގެ އިތުރުން އެއް ބްލޮކް 18 އަހަރުން މަތީގެ ފިރިހެނުންނަށް އަދި އެއް ބްލޮކް އާއިލާތަކަށް ހާއްޞަ ކުރެވިފައިވާ ކަމަށް އަންވަރު ވިދާޅުވިއެވެ.

ރާއްޖެއިން ބޭރަށް ހަގުރާމައަށްދާ ފަރާތްތަކާއި އަދި ހަނގުރާމަ ހިނގަމުންދާ ސަރަޙައްދުތަކުގައި ދިރިއުޅެމުން ގެންދާ ފަރާތްތައް އެސެންޓަރަށް ގެނެސް އެސެންޓަރުގައި ބައިތިއްބާއިރު އެ ފަރާތްތައް 24 ގަޑިއިރު މޮނިޓަރ ކުރެވޭނެ އިންތިޒާމް އެ ސެންޓަރުގައި ހަމަޖެހިފައިވާކަމަށް އަންވަރު ވިދާޅުވިއެވެ.

އަންވަރު ވިދާޅުވި ގޮތުގައި އެ ސެންޓަރުގައި ކުރިން ވެސް ފަސް މެމްބަރުންގެ އާއިލާއަކަށް ވަނީ ރިހެބިލިޓޭޝަން ފަރުވާ ދީފަ އެވެ. އެއީ އަންހެނަކާއި ހަތަރު ކުޑަކުދިންނަށެވެ. އަހަރެއްހާ ދުވަހު ރިހެބިލިޓޭޝަންގެ ފަރުވާ ދިނުމަށް ފަހު، މިދިޔަ އަހަރު އެ އާއިލާ މުޖުތަމައު އަށް ނެރެފައިވާ ކަމށާއި، އަދި ފަސް އަހަރު ވަންދެން އެމީހުންގެ ހާލަތު އެ ސެންޓަރުން މޮނީޓާކުރަމުން ގެންދާނެ ކަމަށް އަންވަރު ވިދާޅުވިއެވެ.

އެންއާރުސީ އަކީ ރާއްޖޭގައި ޓެރަރިޒަމް މަނާކުރާ ގާނޫނުގައި ބަޔާންކުރާ ކަހަލަ ހަނގުރާމަވެރި ސަރަހައްދުތަކުން ނުވަތަ އެ ކަހަލަ ހަނގުރާމައެއްގައި ބައިވެރިވުމަށް ފަހު، އަނބުރާ ރާއްޖެ އަންނަ ނުވަތަ ގެނެވޭ މީހުން މުޖުތަމައު އަށް ދިއުމުގެ ކުރިން ރިހެބިލިޓޭޝަން އަދި ރިއިންޓެގްރޭޝަން ޕްރޮގްރާމް ހިންގުމަށް ކަނޑައަޅާފައިވާ މަރުކަޒެވެ.