މިވަގުތަކީ އެންމެން އެއް ސަފެއްގައި ތިބިކަން އެހެން މީހުންނަށް ދައްކަންވީ ވަގުތުކަމުގައި މާލޭ މޭޔަރުކަމަން ޕީއެންސީ ޓިކެޓްގައި ވާދަކުރައްވާ ކެންޑިޑޭޓް އުސްތާޛާ އައިޝަތު އާޒިމާ ޝަކޫރު ވިދާޅު ވެއްޖެއެވެ.
މާލޭ ގަލޮޅު ކަންމަތީގައި ރޭ ބޭއްވުނު މާލެ ސިޓީގެ މޭޔަރު އަދި މާލޭގެ 3 ދާއިރާއަށް ވާދަކުރާ ކެނޑިޑޭޓުންގެ ކެމްޕެއިން ޖަލްސާގައި ވާހަކަފުޅު ދައްކަވަމުން އުސްތާޛާ އާޒިމާ ވިދާޅުވީ މި ކެންޕެއިން ދަތުރުގައި ކިތަންމެ ގޮންޖެހުންތަކެއް ކުރިމަތިވިޔަސް އެންމެން ގަދަފަދަކޮށް އެއްސަފެއްގައި ތިބިކަން އިދިކޮޅު ފަރާތްތަކަށް ދައްކަން ޖެހޭކަމަށެވެ.
"އަޅުގަނޑުގެ އިލްތިމާސަކަށް ވާނީ އަޅުގަނޑުމެންގެ ސަފުތައް ރޫޅާލިޔަ ނުދެއްޗޭ، އަޅުގަނޑުމެންގެ ބަދަހިކަން ދުއްވާލިޔަ ނުދެއްޗޭ، މިވަގުތަކީ އަޅުގަނޑުމެންނަށް ލިބެމުން އަންނަ ޗެލެންޖުތައް އަންނަ ގޮންޖެހުންތަކާއި ދެކޮޅަށް އެންމެން މިތިބީ އެއް ސަފެއްގައިކަން ދެންތިބި މީހުންނަށް ދައްކަންވީ ވަގުތު."
ޢާއިޝަތު ޢާޒިމާ ޝަކޫރު
ރޭގެ މި ބައްދަލުވުމގައިވެސް އާޒިމާ ވަނީ އޭނާ މާލޭ މޭޔަރުކަމަސް ކުރިމަތި ލެއްވީ ރައީސް ޑރ. މުހައްމަދު މުއިއްޒުގެ ވިޝަން ކާމިޔާބު ކުރެއްވުމުގެ މަސައްކަތް ކުރެއްވުމަށްކަމަށް ވިދާޅުވާ ވިދާޅުވުން ތަކުރާރު ކުރައްވާފައެވެ.
"އިރާދަކުރެއްވިއްޔާ އަޅުގަނޑުގެ އަޒުމެއް ގުނޑުވައެއް ނުލެވޭނޭ، އަޅުގަނޑު މިހިރީ ވަރަށް ސާބިތުކަމާއެކުގައި ރައީސް މުއިއްޒުގެ ވިޝަން ކާމިޔާބު ކުރުމަށޭ، އަޅުގަނޑަކީ އުމުރުން 17 އަހަރުގައި ޚިދުމަތް ފެށީއްސުރެ އަޅުގަނޑު ހުރީ ގޮތެއްގެ ސާބިތުކަން ދިވެހި ރައްޔިތުންނަށް ސާބިތުކޮށްދޭނެ މީހެއް، ކާމިޔާބުކޮށްދޭނެ މީހެއް."
ޢާއިޝަތު ޢާޒިމާ ޝަކޫރު
އާޒިމާ ދެއްކެވި ކުރު ވާހަކަކޮޅު ނިންމަވައި ލެއްވީ އިންތިހާބާ ދެމެދު ކުރިޔަށް މިއޮތް ހަތަރު ދުވަހުގެ ފަހުމަރުހަލާގައި ނަގާ "ރާޅު" އެންމެން އެކީގައި ވަޑައިގެން އިންތިހާބު އޮންނަ ދުވަހުގެ ހަވީރު ނުވަތަ އިރުއޮއްސޭއިރު "އެރާޅު" ކާމިޔާބުކަމާއެކީ ބިންދާލާން މާލޭ ރައްޔިތުންގެ ކިބައިން އެދިލައްވަމުންނެވެ.
ރޭގެ މި ބައްދަލުވުމުގައި ރައީސުލް ޖުމުހުރިއްޔާގެ ނައިބާއި ދަޢުލަތުގެ ވަޒީރުންވެސް ބައިވެރިވެ ވަޑައިގެންނެވިއެވެ.
Advertisement
This content is created and paid for by advertisers and does not involve Voice Journalists
