ރާއްޖޭގެ މައި ދޮރާށި ސަލާމަތް ކުރުމުގައި އެންމެ އިސް ސަފުގައި މަސައްކަތް ކުރެއްވީ މިއަދު ޕީއެންސީ ޓިކެޓްގައި މާލޭ މޭޔަރުކަމަށް ވާދަކުރައްވާ އުސްތާޛާ އައިޝަތު އާޒިމާ ޝަކޫރުކަމުގައި ނައިބް ރައީސް ހުސައިން މުހައްމަދު ލަތީފް ވިދާޅުވެއްޖެއެވެ.
މިއަންނަ ހޮނިހިރު ދުވަހު ބޭއްވުމަށް ހަމަޖެހިފައިވާ މާލެ ސިޓީ މޭޔަރުކަމަށް ކޮންގްރެސް ކޯލިޝަންގެ ފަރާތުން ކުރިމަތިލައްވާ އާޒިމާ ޝަކޫރާއި މާލޭގެ ތިން ދާއިރާއަށް ވާދަކުރައްވާ ތިން ކެންޑިޑޭޓުންގެ ކެމްޕެއިން ހަރަކާތުގައި ބައިވެރިވެވަޑައިގެން ވާހަކަފުޅުދައްކަވަމުން ޕީއެންސީގެ ނައިބް ރައިސްކަންވެސް ކުރައްވަމުން ގެންދަވާ ނައިބް ރައީސް ހުސައިން މުހައްމަދު ލަތީފް ވިދާޅުވީ އައިޝަތު އާޒިމާ ޝަކޫރުގެ ޤާބިލްކަމާއި މެދު ޝައްކު ކުރުމުގެ ޖާގަ ނެތްކަމަށެވެ.
އެގޮތުން ޖީއެމްއާރުގެ އަތުން ވެލާނާ އިންޓަނޭޝަނަލް އެއާރޕޯރޓް އަބުރާ ސަރުކާރަށް ހޯދުމަށް ކުރެވުނު މަސައްކަތުގެ އެންމެ އިސްމޭސްތިޔަކީ އުސްތާޛާ އާޒިމާ ކަން އެމަނިކުފާނު ފާހަގަ ކުރެއްވިއެވެ.
"އެކަމަނާއަކީ (އާޒިމާ) އަޅުގަނޑުމެންގެ މައި ދޮރާށި ސަލާމަތްކުރުމުގައި އެންމެ އިސް ސަފުގައި ހުންނެވި ކަމަނާ، ހުންގާނުގައި ހުންނެވި ކަމަނާ، އެ ޤައުމީ ޖިހާދުގައި އެކަމަނާ އެ ކުރެއްވި މަސައްކަތް އަޅުގަނޑުމެން ހަނދާން ހުންނަށް އެބަޖެހޭ"
ނާއިބު ރައީސް
މީގެ އިތުރުން ނައިބު ރައީސްގެ ވާހަކަފުޅުގައި މޭޔަރު އިންތިހާބުގައި ސަރުކާރުގެ ފަރާތުން ވާދަކުރައްވާ ކެންޑިޑޭޓަކު ހޮވުމުގެ މުހިއްމުކަމުގެ މައްޗަށް ވެސް ވަނީ އަލިއަޅުވާ ލައްވާފައެވެ. އެގޮތުން އެމަނިކުފާނު ވިދާޅުވީ، ސަރުކާރަކާއި އެކީގައި ހިދުމަތެއް ލިބެން ބޭނުންވާނަމަ މިއީ ރަނުގެ ފުރުސަތެއް ކަމަށެވެ.
"ރައީސް ޑރ. މުއިއްޒު އެމަނިކުފާނުގެ މޭޔަރު ކަމުގައި މާލެ ސިޓިއަށް ގެންނަން ބޭނުންވި ތަރައްގީ، ދެކެމުން އައި ހުވަފެން ހަގީގަތަކަށް ހެއްދެވުމަށްޓަކައި، އެމަނިކުފާނަށް މި އޮތި ރަނުގެ ފުރުސަތެއް ލިބިފައި، އެ ފުރުސަތު ހޯދައިދެއްވުމަށް އަޅުގަނޑު މާލެ ސިޓީގެ ރައްޔިތުންގެ އަރިހުން އެދެނީ، އެއީ އެކަން ކޮށްދެވޭނެ ވަރުގެ ކެންޑިޑޭޓެއް މިއަދު އެމަނިކުފާނު ނެރުއްވާފައި ތިޔަބޭފުޅުންނަށް ދައްކަވާފައި ހުރީމަ، އެއީ އާޒިމާ، އެއީ ޝައްކެއް އޮތް ކަމެއް ނޫން،".
ނާއިބު ރައީސް
ހުސްވެފައިވާ މާލޭ މޭޔަރުކަމަށް މީހަކު ހޮވަން ބާއްވާ އިންތިހާބު މިއަންނަ ހޮނިހިރު ދުވަހު ބޭއްވުމަށް ހަމަޖެހިފައިވާއިރު އެ މަޤާމަށް 5 ބޭފުޅަކު ކުރިމަތި ލައްވާފައިވެއެވެ.
Advertisement
This content is created and paid for by advertisers and does not involve Voice Journalists
