މާލޭ ސިޓީގެ ރައްޔިތުންނަށް ކޮށްދެއްވަން ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވަޢުދުވެވަޑައިގެންނެވި ގިނަ ކަންކަން ތަންފީޒުކުރައްވަމުން އަންނަ ކަމުގައި ރައީސުލްޖުމްހޫރިއްޔާގެ ނާއިބް އަލްއުސްތާޛް ހުސައިން މުހައްމަދު ލަތީފް ވިދާޅުވެއްޖެއެވެ.

މާލޭ ސިޓީ މޭޔަރގެ ބައި އިލްކެޝަންގައި ވެރިކަން ކުރާ ޕީއެންސީގެ ފަރާތުން ވާދަކުރައްވާ އަލް އުސްތާޛާ އާއިޝަތު އާޒިމާ ޝަކޫރާއި ކައުންސިލްގެ މެމްބަރކަމަށް ވާދަކުރައްވާ އިން ކެންޑިޑޭޓުންގެ ކެމްޕެއިންގެ ތެރެއިން ރެ އެ ޕާޓީން ބޭއްވި ކެމްޕެއިން ހަރަކާތުގައި ނައިބް ރައީސް ހުސައިން މުހައްމަދު ލަތީފް ވަނީ ބައިބެރިވެ ވަޑައިގަންނަވައިފައެވެ. 

މި ހަރަކާތުގައި ވާހަކަ ދައްކަވަމުން ނައިބްރައީސް ވިދާޅުވީ، މާލޭ ސިޓީގެ ރައްޔިތުންނަށް ކޮށްދެއްވަން ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވަޢުދުވެވަޑައިގެންނެވި ގިނަ ކަންކަން ޤާނޫނީ އިމުގެ ތެރެއިން ތަންފީޒުކޮށްދެއްވަމުން ގެންދަވާ ކަމަށެވެ. 

އެގޮތުން ޑރ.މުހައްމަދު މުއިއްޒު މަގަމާ ހަވާލުވެވަޑައިގަތުމަށްފަހު އެންމެ ފުރަތަމަވެސް ކުރިއަށްގެންދެވީ މާލޭގެ ރައްޔިތުންނަށް އެންމެ ބޮޑަށް ބޭނުންވެފައިވާ ބޯހިޔާވަހިކަމުގެ މައްސަލައަށް ހައްލު ހޯދާދެއްވުމުގެ މަސައްކަތް ކަމުގައި ފާހަގަ ކުރައްވައި ނައިބް ރައީސް ވިދާޅުވީ، ރައީސުލްޖުމްހޫރިއްޔާ މާލެ ސިޓީ ތަރައްޤީ ކުރައްވަމުން ގެންދަވަނީ ދުނިޔޭގެ ބޮޑެތި ސިޓީތަކުން ކަންކަންކުރައްވާ ގޮތް ނަމޫނާއަކަށް ބައްލަވައިގެންކަން ފާހަގަ ކުރައްވައިފައެވެ. 

މީގެ އިތުރުން ނައިބް ރައީސް ވިދާޅުވީ، މާލޭ ސިޓީގެ ތަރައްޤީއަށް ކުރައްވަން ނިންމަވާފައިވާ ބައެއް ކަންތައްތައް މަޖިލީހުގެ އޮތް ބާރުގެ ތެރެއިން ނުކުރެވި ހުރިކަން ފާހަގަކުރައްވައިފައެވެ. އަދި އެއިން ކޮންމެ ކަމެއްވެސް ކުރެވެން އަންނަނީ ފައިސާގެ އިތުރުން ޤާނޫނީ އިމުގެ ތެރެއިން ބާރުލިބިގެން ކަމުގައި ނައިބްރައީސް ވަނީ ފާހަގަ ކުރައްވައިފައެވެ. 

ނައިބު ރައީސްގެ ވާހަކައިގައިވަނީ ޤައުމުގެ އެންމެ މަތީ ގިންތީގައި، ގޮތްނިންމާ ލެވެލްގައި އަންހެނުންނަށް ފުރުސަތުދިނުމުގެ މުހިންމު ކަމުގެ މައްޗަށް އަލިއަޅުއްވާ އެ ފުރުސަތު އަންހެނުންނަށް ލިބުމުން މުޖްތަމަޢު ބޭނުންވާ ކަންކަމުގައި އަންހެނުންގެ އަޑު ހުއްޓުމަކަށް ނައިސް ގުގުމަމުންދާނެކަން ފާހަގަކުރައްވައިފައެވެ.