ރައްޔިތުން އިންތިޚާބުކޮށްފައިވާ ސަރުކާރެއް ގަދަ ބާރުން ވައްޓާލުމާއި ދެކޮޅުކަމުގައި ކުރީގެ ރައީސް އިބްރާހީމް މުހައްމަދު ޞާލިހްގެ ސަރުކާރުގެ ކުޅިވަރާއި ބެހޭ ވަޒީރުކަން ކުރެއްވި އަހްމަދު މަހުލޫފް ވިދާޅުވެއްޖެއެވެ. 

ރާއްޖޭގެ ތިން ޑެޕިއުޓީ މިނިސްޓަރަކު އިންޑިއާގެ ބޮޑުވަޒީރު ނަރެންދުރަ މޯދީއަށް ސޯޝަލް މީޑިއާގައި މަލާމާތްކޮށްފައިވާ މައްސަލަ ހޫނުވެފައި ވަނިކޮށް, ރައީސް ޑރ. މުހައްމަދު މުއިއްޒު އަޒުލު ކުރުުމާ ގުޅޭގޮތުން ދަ ޑިމޮކްރެޓްސްގެ ޕީޖީ ލީޑަރު އަލީ އާޒިމް ޓުވީޓު ކުރައްވައި ދެއްކެވި ވާހަކަތަކަށް އިޝާރާތް ކުރައްވާ މަހުލޫފް ކުރެއްވި ޓުވީޓެއްގައި ވަނީ، ރައީސުލްޖުމްހޫރިއްޔާގެ މަގާމަށް ޑރ. މުޢިއްޒު އިންތިޙާބުވެވަޑައިގަތީ އަލީ އާޒިމްވެސް ހިމެނި ވަޑައިގަންނަވާހެން ދަ ޑިމޮކްރެޓްސް ގެވެސް ފުރިހަމަ ތާއީދާއެކު ނޫންތޯ ސުވާލުކުރައްވައި އަދި އެމަސައްކަތަށް ދެ މަސްދުވަސް ވެސް ނުވާ ކަމުގައި ވިދާޅުވެފައެވެ. 

މީގެ އިތުރުން މަހުލޫފުގެ ޓުވީޓުގައި ވިދާޅުވެފައިވަނީ، ބަގާވާތަކުންސަރުކާރު ވައްޓާލުމަކީ، ދިވެހިރާއްޖެއަށް ރަނގަޅު ތަޖުރިބާއެއް ނޫންކަމަށާއި އިންތިޙާބުތަކަކީ ކުޅޭ ކުޅިވަރަކަށް ވެގެންނުވާނެކަމަށެވެ. 

އަލީ އާޒިމްގެ ރަސްމީ އެކްސް އެކައުންޓުން ކުރެއްވި ޓުވީޓެއްގައި ވިދާޅުވީ، ރާއްޖޭގެ ހަމަޖެހުން ދަމަހައްޓާ، ހާރިޖީ ސިޔާސަތު ހިމާޔަތްކޮށް އަދި އަވައްޓެރި އެއްވެސް ގައުމެއް ބާކީ ކުރުން ހުއްޓުވުމަށް ޑިމޮކްރެޓުން ތިބީ ތައްޔާރަށް ކަމަށެވެ.

މީގެ ކުރިން ވެސް ރައީސް މުއިއްޒު އަޒުލުކުރުމުގެ އަޑުތައް ގަދަވި އެވެ. އެ ވާހަކަތައް ފެށުނީ ރައީސުލްޖުމްހޫރިއްޔާ އާއި ރައީސުލްޖުމްހޫރިއްޔާގެ ނާއިބު އަޒުލުކުރުން ކުރިއަށް ގެންދިއުމަށް މަޖިލީހުގެ ގަވާއިދުގައި ބަޔާންކޮށްފައިވާ މާއްދާތައް އިސްލާހުކޮށް، އެ މަރުހަލާގެ ހަމަތަކަކާއި ތަރުތީބަށް ބަދަލު ގެނެސް، އެމްޑީޕީއިން އެކަން ފާސްކުރުމުންނެވެ.

ނަމަވެސް އެމްޑީޕީގެ 13 މަޖިލިސް މެންބަރަކު ސަރުކާރު ހިންގާ ޕީއެންސީއާ ގުޅުމާއެކު އެ ވާހަކަތައް ވަނީ މުޅީހެން މަޑުޖެހިފަ އެވެ. އޭގެ ފަހުންވެސް އެމްޑީޕީގެ މެންބަރަކު ވަނީ އެ ޕާޓީ ދޫކޮށް ޕީއެންސީއާ ގުޅިފައެވެ.