މި ސަރުކާރުގެ ފަރާތުން ހަދަން ފެށި އަމީނިމަގުގެ އެންމެފަހު ދެ ސެގުމެންޓުގައި ތާރު އަޅާ އެއްކޮށް ނިންމާލެވުނީ ރޭގައި ކަމަށް ރޯޑް ޑިވެލޮޕްމަންޓް ކޯޕަރޭޝަން (އާރުޑީސީ) އިން ބުނެފިއެވެ.

އާރުޑީސީން މިފަދައިން ބެނެފައިވަނީ މި މަސައްކަތާއި ގުޅޭގޮތުން އެކްސް މެދުވެރިކޮށ އާއްމުކުރި ޕޯސްޓެއްގައެވެ. އެ ޕޯސްޓުގައި ބުނެފައިވަނީ އަމީނީ މަގުގެ އެންމެ ފަހުން ނުހެދި އޮތް، ސެގްމެންޓް 12 އަދި 13ގެ މަސައްކަތްތައް ނިންމާލާފައި ވަނީ ރޭގައި ކަމަށެވެ. އެހެން ކަމުން އެ ދެބައި އަދި އޮތީ އާއްމު ދަތުރުފަތުރަށް ހުޅުވާ ނުލައެވެ.

އާރުޑީސީގެ މި ޕޯސްޓް ރީ- ޓްވީޓް ކުރައްވާ މި ސަރުކާރުގެ އިމާރާތް ކުރުމާއި ބިނާރާ ބެހޭ ވަޒީރު ޑރ. އަބްދުالله މުއްތަލިބް ވެސް ވަނީ އަމީނީ މަގުގެ ފަހު ދެ ސެގްމަންޓްގައި ފެން ހިންދުމުގެ ނިޒާމު ގާއިމުކުރުމުގެ މަސައްކަތް މާ ލަހެއް ނުވެ ނިންމާލަން ބޭނުންވާ ކަމަށް ވިދާޅުވެފައެވެ.

Advertisement

"އަމީނީ މަގުގެ ފަހު 2 ސެގްމެންޓުގެ މަސައްކަތް 1 މަސްތެރޭ ނިންމުމަށް މިނިސްޓްރީއާ ގުޅިގެން  އާރްޑީސީ އިން ކޮށްފައިވާ މަސައްކަތް ފާހަގަކުރަމެވެ. އުއްމީދަކީ ޕްރޮޖެކްޓްގައި ހިމެނިފައިވާ ޕަމްޕުތައް ވީހާވެސް އަވަހަކަށް ގެނެވި ފެން ހިންދުމުގެ ނިޒާމުގެ މަސައްކަތް މާލަހެއްނުވެ ނިންމާލުމެވެ." މިނިސްޓަރގެ ޕޯސްޓުގައި ވިދާޅުވެފައި ވެއެވެ.

އަމީނީ މަގުގައި ތާރުއަޅާ ޒަމާނީ ފެންވަރަށް ތަރައްޤީކުރުމުގެ މަޝްރޫއު ނިމިދިޔަ ސަރުކާރުގެ ޕްލޭނިންގ މިނިސްޓްރީން ރޯޑް ޑިވެލޮޕްމަންޓް ކޯޕަރޭޝަނާއި ހަވާލުކޮށްފައިވަނީ 2022 އަހަރުގެ ޖުލައި މަހުގެ ތެރޭގައެވެ.  210 ދުވަހުގެތެރޭގައި ނިންމާ ގޮތަށް ހަވާލުކުރި އެ މަސައްކަތުގެ އަގަކީ 84.4 މިލިއަން ރުފިޔާ އެވެ.