އިންޑިއާއާއި ރާއްޖެ އާއި ދެމެދު މައްސަލަ އުފެދި މަސްރަހު ހޫނުވެ، އިންޑިޔާއިން ރާއްޖެ އާއި ދެކޮޅަށް ވަރުގަދަ އެންޓި ކެންޕޭނެއް ފަށާފައި ވީނަމަވެސް ފާއިތުވި 24 ގަޑިއިރުތެރޭގައި މުޅި ދުނިޔޭގެ ގޫގުލް ސާޗް ޓްރެންޑުގައި އިންޑިއާގެ ލަކްޝަދީޕް އަށްވުރެ ރާއްޖެ އުޅެނީ ކުރީގައެވެ.

މުޅިދުނިޔޭގައިވެސް އެންމެ މަޤްބޫލް އެއް ޓްރޭންޑްސް ކަމަށްވާ ގޫގުލް ޓްރެންޑްސްއިން ދައްކާ ގޮތުގައި ރާއްޖެ ބޮއިކޮޓު ކުރުމަށް ގޮވާލައި ކެމްޕޭނެއް ކުރަމުންދާ އިންޑިއާގެ ގޫގުލް ސާޗް ޓްރެންޑުގައި ވެސް ރާއްޖެ އުޅެނީ ކުރީގަ އެވެ. އެގޮތުން އިންޑިއާގެ ސާޗް ޓްރެންޑުސް އިން ދައްކާގޮތުގައި ފާއިތުވި 24 ގަޑިއިރަށް ބަލާއިރު ރާއްޖެ އާއި ލަކްޝަދީޕް އަޅައިކިޔާލުމުން ރާއްޖެއަށް 54 އިންސައްތަ ލިބޭއިރު އިންޑިޔާގެ ލަކްޝަދީޕަށް ލިބެނީ 46 އިންސައްތައެވެ.

އިންޑިއާގެ ޖަޒީރާ އަތޮޅެއްގެ ގޮތުގައި އޮންނަ ލަކްޝަދީޕް އަށް އިންޑިޔާގެ ބޮޑުވަޒީރު ނަރެންދުރަ މޯދީ ކުރެއްވި ޒިޔާރަތުގެ ވީޑިއޯއަކާއެކު އިންޑިއާ މީހަކު މި މަހުގެ 4 ވަނަ ދުވަހު އެކްސްގައި ކުރި ޕޯސްޓަކަށް، ރާއްޖޭގެ ތިން ޑެޕިއުޓީ މިނިސްޓަރުން ކޮށްފައިވާ ރިޕްލައިތަކަކާ ގުޅިގެން އިންޑިއާއާއި ރާއްޖެއާ ދެމެދު މައްސަލަ އުފެދި މަސްރަހު ވަނީ ވަރަށް ބޮޑަށް ހޫނުވެފައެވެ.

މި މަހުގެ 4 ވަނަ ދުވަހު  "މިސްޓަ ސިންހާ" ގެ ނަމުގައި އިންޑިއާ މީހަކު އުފައްދާފައިވާ އެކްސްގެ އެކައުންޓުން ކޮށްފައިވާ ޕޯސްޓުގައި ބުނެފައި ވަނީ މޯދީ ލަކްޝަދީބު ޕްރޮމޯޓު ކުރުމަކީ އެޅުއްވި މުހިއްމު ފިޔަވަޅެއް ކަމަށާއި، އަދި ރާއްޖޭގައި މިހާރު އޮތީ ޗައިނާގެ ޕަޕެޓު ސަރުކާރެއް ކަމަށެވެ.

އެ މީހާގެ މި ޕޯސްޓަށް ރާއްޖޭގެ ތިން ޑެޕިއުޓީ މިނިސްޓަރުން ރިޕްލައި ދިނުމާއި ގުޅިގެން މައްސަލަ އިތުރަށް ގޯސްވެގެން ދިޔައީ ބޮއިކޮޓްމޯލްޑިވްސް ކެމްޕޭނުގައި އިންޑިއާގެ ފިލްމީ ތަރިންނާއި ކުޅިވަރު ޝަހުސިއްޔަތުން ބައިވެރިވާން ފެށި ހިސާބުންނެވެ. އޭގެ ތެރޭގައި ރާއްޖެއަށް އެތަށް ފަހަރަކު ޒިޔާރަތްކޮށްފައިވާ، ރާއްޖޭ ރައްޔިތުން ކައިރީގައި މަޤްބޫލް އެތައް ފަންނާނުންވެސް ހިމެނެއެވެ.

ކަން މިހެން ހުރިކަމުގައި ވިޔަސް އިންޑިއާ ފިޔަވައި އެހެން ހުރިހާ ގައުމެއްގެ ސާޗް ޓްރެންޑުގައި ރާއްޖެއާ ލަކްޝަދީޕް އަޅާ ކިޔާއިރު، ފާއިތުވި ހަތް ދުވަހުގެ ތެރޭގައި 40 އިންސައްތައަށް ވުރެ މަތި ލަކްޝަދީޕަށް ހޯދިފައެއް ނުވެއެވެ. އެހެން ނަމަވެސް  ރާއްޖެއަށް އެންމެ ގިނަ ފަތުރުވެރިން އަންނަ ވިލާތު ގައުމުތަކުގެ ގޫގުލް ސާޗް ޓްރެންޑުގައި ރާއްޖެ އުޅެނީ 98 އިންސައްތައަށް ވުރެ މަތީގަ އެވެ.

ގޫގުލް ޓްރެންޑްސް ތައާރަފުވީންސުރެއް މިއަދާ ހަމައަށް ވެސް ލަކްޝަދީޕްއަށް ރާއްޖޭގެ މައްޗަށް އެއްވެސް އިރެއްގައި ކުރި ހޯދިފައެއް ނުވެ އެވެ.

އިންޑިޔާއިން ރާއްޖެއާއި ދެކޮޅަށް ވަރުގަދަ އެންޓި ކެންޕޭނެއް ފަށާފައިވާއިރު ރައީސް ޑރ.މުހައްމަދު މުއިއްޒު ފުރަމާނަ ދަތުރުފުޅެއްގައި މިވަގުތު ވަޑައިގެން އުޅުންވަނީ ޗައިނާގައެވެ. މި ދަތުރުފުޅުގައި ޗައިނާގެ ވިޔަފާރިވެރިންގެ އެންމެ އިސްފަރާތްތަކާއި ބައްދަލުކުރައްވާ ރައީސް ޑރ.މުއިއްޒު ވަނީ ރާއްޖޭގެ ފަތުރުވެރިކަމުގެ މާރކެޓްގައި 1 ވަނަ ޤައުމަކީ ޗައިނާކަމަށް ހައްދަވައި ދެއްވުމަށް އެދިވަޑައި ގަންނަވާފައެވެ.