ދިވެހި ދައުލަތުން  މަސްވެރިންނަށް ދޭންޖެހޭ ފައިސާގެ ތެރެއިން 100 މިލިއަން ރުފިޔާ މާދަމާ ދޫކުރާނެ ކަމަށް މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީން މިފްކޯ އިން މިއަދު ބުނެފި އެވެ.

މިފުކޯއިން މިކަން ހާމަކޮށްފައި ވަނީ އެކްސްގައި މިއަދު ކުރި ޕޯސްޓެއްގައެވެ.

"ދިވެހި މަސް އޮޑިފަހަރަށް ދައްކަންޖެހޭ ފައިސާގެ ތެރެއިން 100 މިލިއަން ރުފިޔާ މާދަން ދައްކާ ގޮތަށް ވަނީ ހަމަޖެހިފަ. މި ފުރުސަތުގައި މަސްވެެރިންގެ ފަރާތުން މިފްކޯއަށް ދެއްވަމުން ގެންދަވާ އެއްބާރުލުމަށް ނިހާޔަތަށް ޝުކުރު ދަންނަވަން،" މިފްކޯއިން ކޮށްފައިވާ ޕޯސްޓުގައި ބުނެފައިވެ އެވެ.

މިފުކޯއިން މަސްވެރިންނަށް ދޭން ޖެހޭ 100 މިލިޔަން ރުފިޔާ މާދަމާ ހަވާލު ކުރާނެކަމަށް އިއުލާނު ކޮށްފައިވާ އިރު ރާއްޖޭގެ ގިނަ މަސްވެރިންތަކެއް ދަނީ މަސްކިރާފަ އެފަރާތްތަކަށް ލިބެން ޖަހޭ ފައިސާ ނުލިބުމުގެ ޝަކުވާ ކުރަމުންނެވެ.

މި ސަރުކާރު ވެރިކަމަށް އައުމަށްފަހު މީގެ ކުރިންވެސް މަސްވެރިންނަށް ދޭން ޖެހޭ ފައިސާގެ ތެރެއިން ބައެއް ވަނީ ފައިސާގެ ހައްޤުވެރި މަސްވެރިންނާއި ހަވާލުކޮށްފައެވެ.

މި ސަރުކާރުގެ މަސްވެރިކަމާ ބެހޭ ވަޒީރު މީގެ ކުރިން ވިދާޅުވެފައިވަނީ ދައުލަތުން މަސްވެރިންނަށް ދޭން ޖެހޭ ފައިސާ ވަރަށް އަވަހަށް މަސްވެރިންނާއި ހަވާލު ކުރުމުގެ މަސައްކަތް ކުރައްވަމުންދާކަމަށެވެ.