މާލެއަށް ބޯކޮށް ވާރޭވެހި މާލޭގެ މަގުތަކުގައި ފެން ބޮޑުވެދާނެކަމަށް ބަލާ މޯލްޑިވްސް ނެޝަނަލް ޑިފެންސް ފޯސް، އެމްއެންޑީއެފް ފަޔަރ އެންޑް ރެސްކިޔު ސަރވިސްއިން ފެން ހިންދުމުގެ މަސައްކަތައް ނުކުމެއްޖެއެވެ.
މިކަން ހާމަކޮށްފައިވަނީ އެމްއެން ޑީއެފުން ކުރި އެކްސް ޕޯސްޓެއްގައެވެ. " މާލެއަށް ބޯކޮށް ވާރޭ ވެހޭތީ ފެން ހިންދުމުގެ މަސައްކަތް އެމްއެންޑީއެފް ފަޔަރ އެންޑް ރެސްކިޔު ސަރވިސްއިން ފަށައިފި." އެމްއެންޑީއެފްގެ އެކްސް ޕޯސްޓުގައި ބުނެފައިވެއެވެ.
އެމްއެންޑީއެފް ފަޔަރ އެންޑް ރެސްކިޔު ސަރވިސްއިން ފެން ހިންދުމުގެ މަސައްކަތަށް މާލޭގެ މަގުތަކަށް ނިކުމެފައިވާއިރު މީގެ ކުޑަ ދުވަސްކޮޅެއް ކުރިންވެސް ވަނީ މާލޭގައި ވަރަށް ބޮޑަށް ފެން ބޮޑުވެ، ގޭގެއަށާއި ބައެއް ޢިމާރާތްތަކަށް ފެންވަންނާތީ، ފެން ހިންދުމުގެ މަސައްކަތްތަކެއް ވަރަށް ފުޅާ ދާޢިރާއެއްގައި ކޮށްފައެވެ.
ރާއްޖޭގެ މޫސުން އަނެއްކާވެސް ގޯސްވެފައި ވާއިރު އިއްޔެ މެޓް އޮފީހުން ވަނީ ރާއްޖެ ކައިރީގައި ކޮޅިގަނޑެއް އުފެދި، ކުރިއަށް އޮތް ތިން ދުވަހު ރާއްޖޭގެ އެކި ހިސާބުތަކަށް ވިއްސާރަ ކުރާނެ ކަމަށް ލަފާކޮށްފައެވެ.
އެކަން ހާމަކޮށް ރާއްޖޭގެ މޫސުމާއި ބެހޭ ޤާއުމީ އިދާރާ މެޓް އޮފީހުން އެކްސްގައި ކުރި ޕޯސްޓެއްގައި ބުނެފައިވަނީ ރާއްޖޭގެ އިރުމަތީގައި އުފެދިފައިވާ ކޮޅިގަނޑު ރާއްޖެ ހުރަސްކޮށް އަރަބިކަނޑަށް ޖެހެމުންދާނެ ކަމަށް އަންދާޒާ ކުރެވޭ ކަމަށާއި، އެހެން ކަމުން ކުރިއަށް އޮތް 3 ދުވަހު ރާއްޖޭގެ އެކިހިސާބުތަކަށް ވިއްސާރަކޮށް، ވައިގަދަވެ، ކަނޑުތައް ގަދަވާނެކަމަށް ލަފާކުރެވޭ ކަމަށެވެ.
މިއަދު ހެނދުނުން ފެށިގެން ރާއްޖޭގެ އެކި ހިސާބުތަކަށް ކަނޑު ގަދަވެ، ބޯކޮށް ވާރޭވެހެމުން ދާއިރު ، މެޓް އޮފީހުން ވަނީ ކ. އަތޮޅުން ފެށިގެން ދ. އަތޮޅާއި ހިސާބަށް ރީނދޫ ސަމާލުވެސް ނެރެފައެވެ.
Advertisement
This content is created and paid for by advertisers and does not involve Voice Journalists
