ދޮންއަދަރާދަ މަގުގައި ހުންނަ ސްޓެލްކޯގެ ޕަވާ ހައުސް އެ ތަނުން ނަގައި، އެ މަގު އާއްމުންނަށް އެއްކޮށް ބޭނުންކުރެވޭ ގޮތަށް ހުޅުވާލުމުގެ މަސައްކަތްތައް ފަށައިފި އެވެ.
މިކަން ހާމަކޮށްފައިވަނީ މި މަގު ހުޅުވާލުމުގެ މަސައްކަތްތައް ކުރިއަށްދާ ގޮތް ނޫސްވެރިންނަށް ދައްކާލުމަށް ފަހު ސްޓެލްކޯގެ މެނޭޖިން ޑިރެކްޓަރު ހުސެއިން ފަހުމީއެވެ. އޭނާ ވިދާޅުވީ އެ މަސައްކަތް ކުރަމުންދަނީ އެމްޓީސީސީއިން ކަމަށާއި މިހާރު މަސައްކަތްތަކުގެ 40 އިންސައްތަ ނިމިފައިވާ ކަމަށެވެ.
ފަހުމީ އިތުރަށް ވިދާޅުވި ގޮތުއި އެބޭފުޅުން މަސައްކަތް ކުރަމުން ދަނީ މި މަސް ނިމޭއިރު މި މަގު އާއްމުންނަށް ބޭނުން ކުރެވޭނެ ގޮތަށް ހުޅުވާލުމަށް އަމާޒު ހިފައިގެން ކަމަށެވެ.
"މި ތަނަކީ އަޅުގަނޑުމެންގެ ޕަވާ ހައުސްއެއް ހުރި ތަނެއް. މި ތަނުގައި 17 އިންޖީނު ހުރި. އެ އިންޖީނުތައް މިހާރު ހުޅުމާލެއަށް ބަދަލުކޮށް އޭގެން ވެސް ހިދުމަތް ފަށައިފިން. މި ތަނުން ޕަވާ ހައުސް ނެގުމުން މިހިސާބުގައި ދިރިއުޅޭ އާއްމުންނަށް މިހާރު އަޑުގަދަވެ ވީ އުނދަގޫތަކާއި ދުމުގެ އުނދަގުލެއް ދެން ނުވާނެ،"
ހުސައިން ފަހުމީ
އެހިސާބު ގަޑަކީ ޢާއްމުން ދިރިއުޅޭ ހިސާބަކަށް ވުމުން މަސައްކަތް ކުރުމުގައި ދަތިތަކެއް ހުރި ނަމަވެސް ފަހުމީ ވިދާޅުވީ މަސައްކަތްތައް ކުރިއަށް ގެންދަނީ ކައިރީގައި ހުރި ގެތަކުގައި ދިރިއުޅޭ މީހުންނަށް އުނދަގޫ ނުވާނެ ގޮތަށް ދުވާލު ގަޑީގައި ކަމަށެވެ. މަގު ހެދުމުގެ މަސައްކަތުގައި އެންމެ އުނދަގޫ މަސައްކަތެއްގެ ގޮތުގައި މިހާރު ކުރިއަށް ދަނީ އެ ތަނުގައި ހުރި ކޮންކްރީޓު ބެޑްތައް ނެގުން ކަމަށް ވެސް އޭނާ ފާހަގަކުރެއްވިއެވެ.
ސްޓެލްކޯގެ އާ މެނޭޖިން ޑިރެކްޓަރު ކަމާއި ހުސައިން ފަހުމީ ހަވާލުވެ ވަޑައިގެންނެވި ފަހުން މާލޭގައި މިގޮތަށް، ޢާއްމުންނަށް އުނދަގޫވާގޮތައް ހުރި ކަންތައްތައް ހައްލުކޮށްދެއްވުމަށް ގެންދަވަނީ ވަރަށް ބޮޑަށް މަސައްކަތް ކުރައްވަމުންނެވެ.
އެގޮތުން ފަހުމީ ސްޓެލްކޯގެ އެމްޑީ ކަމާއި ހަވާލުވެލެއްވި ފުރަތަމަ ދުވަހު ވެވަޑައިގެންނެވި ވައުދާ އެއްގޮތަށް، މާވެޔޮ މަގު މިސްކިތުގެ ކަންމައްޗަށް ވާ ގޮތަށް ބަހައްޓާފައި ހުރި ކަރަންޓު ޓްރާންސްފޯމަރު ވެސް މިހާރުވަނީ އެތަނުން ނަގާ އެސަރަހައްދު ޢާއްމުންނަށް ހުޅުވާލައިފައެވެ.
Advertisement
This content is created and paid for by advertisers and does not involve Voice Journalists
