މިދިޔަ 2023 ވަނަ އަހަރު ނިމުނު އިރު ދިވެހި  ރަޢުލަތުގެ ބޭނުންކުރެވޭ ރިޒާވުގައި ހުރީ 140 މިލިއަން ޑޮލަރު ކަމަށް މަރުކަޒީ ބޭންކް، މޯލްޑިވްސް މަނިޓަރީ އޮތޯރިޓީ (އެމްއެމްއޭ) ގެ ތަފާސް ހިސާބުތަކުން ދައްކައިފި އެވެ.

ޔޫޒަބަލް ރިޒާވުން ދައްކައިދެނީ ބޭރު ފައިސާގެ އެކި މުއާމަލާތްތަކަށް ވަގުތުން ވަގުތަށް ބޭނުންކުރުމަށް ހުރި ފައިސާގެ އަދަދެވެ. އެހެން ކަމުން ޔޫޒަބްލް ރިޒާވަކީ ރަސްމީ ރިޒާވުން ކުރު މުއްދަތުގެ ބޭރުގެ ލައިބިލިޓީތައް އުނިކުރުމުން ބާކީ އޮންނަ އަދަދެވެ.

މަރުކަޒީ ބޭންކް، އެމްއެމްއޭގެ ތަފާސް ހިސާބުތަކުން އެނގޭ ގޮތުގައި މިދިޔަ 2023 ވަނަ އަހަރުގެ ޖެނުއަރީގައި ދައުލަތުގެ ޔޫޒަބަލް ރިޒާވްގައި 254 މިލިއަން ޑޮލަރު ގައި ހުރި ނަމަވެސް އަހަރުގެ އެކި މަސްތަކުގައި އެ އަދަދު ދަށްވަމުން ގޮސް ނޮވެމްބަރު މަހު ޔޫޒަބަލް ރިޒާވްގައި ހުރި އަދަދު 126 މިލިއަން ޑޮލަރަށް ވަނީ ދަށްވެފައެވެ. މިދިޔަ އަހަރުގެ ނޮވެމްބަރ މަހު ޔޫޒަބަލް ރިޒާވް 126 މިލިއަން ޑޮލަރަށް ދަށްވި ނަމަވެސް އަހަރު ނިމުނު އިރު އެ އަދަދު ވަނީ ކޮންމެވެސް ވަރަކަށް އިތުރުވެފަ އެވެ. މިއީ ޖެނުއަރީ މަހާއި އަޅާ ބަލާއިރު 128 މިލިއަން  ޑޮލަރުގެ ދަށް ވުމެކެވެ.

Advertisement

ދަޢުލަތުގެ މަރުކަޒީ ބޭންކުން އާއްމުކޮށްފައިވާ އެންމެ ފަހުގެ ތަފާސް ހިސާބުތައް ދައްކާ ގޮތުން މިދިޔަ އަހަރު ފެށުނު އިރު ދައުލަތުގެ ރަސްމީ ރިޒާވްގައި 790 މިލިއަން ޑޮލަރު ހުރި ނަމަވެސް ޑއަހަރު ނިމުނު އިރު ރަސްމީ ރިޒާވްގައި ހުރީ 588.1 މިލިއަން ޑޮލަރެވެ. މިއީ 201.9 މިލިއަން ޑޮލަރުގެ ދަށްވުމެކެވެ.

އެމްއެމްއޭގެ މި ތަފާސް ހިސާބުތަކުން ދައްކާގޮތުގައި ކުރު މުއްދަތުގެ ބޭރުގެ ލައިބިލިޓީތައް އުނިކުރުމުން އަހަރު ނިމުނު އިރު ޔޫޒަބަލް ރިޒާވްގައި ހުރި އަދަދު 140 މިލިއަން ޑޮލަރު (2.1 ބިލިއަން ރުފިޔާ) އަށް އަރާ ކަމަށް ތަފާސްހިސާބުތަކުން ދައްކަ އެވެ. ނަމަވެސް މިއީ އަހަރު ފެށުނު އިރު ޔޫޒަބަލް ރިޒާވް ހުރި އަދަދާއި އަޅާ ބަލާއިރު 44 ޕަސެންޓް ދަށް އަދަދެއްކަން ފާހަގަކޮށްލެވެ އެވެ.

އެމްއެމްއޭ އިން ހާމަކޮށްފައިވާ ގޮތުގައި ރިޒާވް ދަށްވުމުގެ މައިގަނޑު ސަބަބަކީ ކާޑާއި ބޭހާއި ތެޔޮ އެތެރެކުރަން ދައުލަތުން ކުރާ ޚަރަދު އިންތިހާއަށް އިތުރުވުމެވެ.

މިސަރުކާރު އައުމަށް ފަހު ދަޢުލަތުގެ ޚަރަދުތައް ހަމަޖެއްސުމަށްޓައި ޓީ-ބިލް ވިއްކުމަށް ނިންމާ އެކަމަށް ޝަޢުޤުވެރިވާ ފަރާތަކަށް މިހާރު ވަނީ އެ ފުރުޞަތު ހުޅުވާލައިފައެވެ.