ތައުލީމީ ކަލަންޑަރަށް ގެނެވުނު ބަދަލާއެކު މިހާރު ގްރޭޑް 8ގައި ކިޔަވަމުންދާ ދަރިވަރުންގެ އުމުރުން ގެއްލިފައިވާ 6 މަސްދުވަސް އަނބުރާ ލިބޭނެ ކަމަށް ތަޢުލީމީ ވަޒީރު ޑރ. އިސްމާޢީލް ޝަފީޢު ވިދާޅުވެއްޖެެއެވެ. 

ކުރީ ސަރުކާރުން ދިރާސީ އައު އަހަރު އޮގަސްޓްމަހު ފަށާގޮތަށް ހެދުމާއި ގުޅިގެން، މިހާރު ގްރޭޑް 8 ގައި ކިޔަވަމުންދާ ދަރިވަރުންގެ ސާނަވީ ތަޢުލީމީ ހަޔާތް އިތުރު ހަ މަސް ދުވަހަށް ދަންމާލެވިގެން ދިޔަ އެވެ. އޭގެ ސަބަބުން އެ ދަރިވަރުން ގްރޭޑް 10 ނިމޭ އުމުރު މަތިވެ، ގިނަ ބެލެނިވެރިންގެ ނުރުހުން އެކަމަށް އަމާޒުވެގެން ދިޔައެވެ. 

ނަމަވެސް، ރައީސުލްޖުމުހޫރިއްޔާ ޑރ މުހައްމަދު މުޢިއްޒުގެ ވަޢުދުފުޅާއި އެއްގޮތަށް، 2026 ވަނަ އަހަރުން ފެށިގެން ޖަނަވަރީގައި ދިރާސީ އައު އަހަރު ފަށާގޮތަށް ހަމަ ޖެއްސުމާއެކު އެ ގެއްލިގެން 6 މަސް ދުވަސް އަނބުރާ ލިބޭގޮތް ވެފައިވާއިރު، ބައެއް ފަރާތްތަކުންނާއި، މީޑިއާ ތަކުން އެ ބަދަލުގެ ސަބަބުން ދަރިވަރުންނަށް ގެއްލުންވާ ކަން ދޭހަވާފަދަ މޭރުމުން އަންނަނީ ޚަބަރު ފަތުރަމުންނެވެ. 

ޚާއްސަކޮށް އެކަމުގެ ސަބަބުން މިއަހަރު ގްރޭޑް 8ގައި ކިޔަވަމުންދާ ދަރިވަރުންގެ އޯލެވެލް އިންތިހާނަށް ނޭދެވޭ އަސަރު ކުރާނެ ކަމަށް ވާހަކަތައް އަންނަނީ ދެކެވެމުންނެވެ.

އެކަމާއި ގުޅިގެން، ވަޒީރު ޝަފީޢު މިއަދު ފޭސްބުކް ގައި ކުރެއްވި ޕޯސްޓެއްގައި ވިދާޅުވީ، ގްރޭޑް 8ގައި ކިޔަވަމުންދާ ދަރިވަރުން މިހާރު ކިޔަވަމުންދާ 2ވަނަ ޓާމް ނިމެންދެން (އޭޕްރީލް މަހުގެ ނިޔަލަށް) ތިބޭނީ ގްރޭޑް 8 ގައި ކަމަށެވެ.

އަދި އެ ދަރިވަރުން ގްރޭޑް 9ގައި ތިބޭނީ މި އަހަރުގެ މެއި މަހުން ފެށިގެން 2025ގެ ފެބްރުއަރީ އަށް ކަމަށާ، އެ ދަރިވަރުންގެ ގްރޭޑް 10 ، ފެށޭނީ މާޗް 2025ގައި ކަމަށްވާއިރު އެ ދަރިވަރުން އޯލެވެލް ހަދާނީ ނޮވެމްބަރ 2025ގައި ކަން ވަޒީރު ފާހަގަކުރެއްވި އެވެ. 

"ތައުލީމީ ކަލަންޑަރަށް ގެނެވުނު ބަދަލުން އެންމެ ބޮޑު ފައިދާއެއް ލިބޭ ދަރިވަރުންގެ ތެރޭގައި މިހާރު ގްރޭޑް 8ގައި ކިޔަވަމުންދާ ދަރިވަރުން ހިމެނޭނެއެވެ. މިބަދަލާއެކު ދަރިވަރުންގެ އުމުރުން ގެއްލިފައިވާ 6 މަސްދުވަސް އަނބުރާ ލިބޭނެއެވެ. އަދި، ސިލަބަސް ކަވަރުކުރެވި ރިވައިސް ކުރުމަށްވެސް ވަގުތު ލިބޭނެއެވެ." ވަޒީރު ވިދާޅުވި އެވެ.