ހަތަރު ރައީސުންނާއި އެކު މަސައްކަތް ކުރެއްވި އިރުވެސް ރައީސް ޑރ. މުހައްމަދު މުއިއްޒު ވަރުގެ ބަހުގެ އިތުބާރު ހިފޭ ވަރުގެ ބޭފުޅަކާއި އެކު މަސައްކަތް ނުކުރެއްވެވޭ ކަމަށް މާލެ ސިޓީގެ މޭޔަރު ކަމަށް ޕީއެންސީގެ ކެންޑިޑޭޓެއްގެ ގޮތުގައި ވާދަކުރައްވާ އަލްއުސްތާޛާ އައިޝަތު އާޒިމާ ޝަކޫރު ވިދާޅުވެއްޖެއެވެ.

އާޒިމާ މިހެން ވިދާޅުވީ އޭނާގެ ކެންޕެއިން އިވެންޓެއްގެ ގޮތުގައި އިއްޔެ ހަވީރު ބޭއްވި ސައިކަލު ބުރު ނިންމާލުމަށް ފަހު ވާހަކަ ދައްކަވަމުން ނެވެ. 

"އަޅުގަނޑު މި މަސައްކަތް ކުރަނީ، ހަތަރު ވަނަ ސަރުކާރުގައި ހަތަރުވަނަ ރައިސާއި އެއްކޮށް، މިވަރަށް ބަހުގެ އިތުބާރު ހިފޭ ވަރުގެ ބޭފުޅަކާއެކު އަޅުގަނޑު މަސައްކަތެއް ނުކުރަން، މިއީ އެއްވެސް ހާލެއްގައި ކުރީގެ ހިދުމަތް ކުރެއްވި ބޭފުޅުންނަށް ދަންނަވާ ދެރަ ބަހެއް ނޫން،". ޑރ. މުއިއްޒުގެ ތެދުވެރިކަން ސިފަކޮށްދެއްވަމުން އާޒިމާ ވިދާޅުވިއެވެ.

އާޒިމާ ވިދާޅުވީ، ރައީސް ޑރ. މުހައްމަދު މުއިއްޒު ކުރައްވަމުން ގެންދަވާ މަސައްކަތުގައި ހުރަސް އަޅާނެ ބަޔަކު މާލޭގެ މޭޔަރު ކަމަށް ގެނެވިއްޖެ ނަމަ، ރާއްޖޭގެ ކުރިއެރުމާއި ރާއްޖޭގެ ތަރައްގީއަށް ވަރަށް ބޮޑެތި ހުރަސްތަކެއް ލިބިގެން ދާނެކަމަށެވެ.

އެގޮތުން އާޒިމާ ވިދާޅުވީ އެކަމަނާ އާއި އެކު މާލޭ މޭޔަރު ކަމަށް ވާދަކުރައްވާ އަނެއް ދެ ކެންޑިޑޭޓުން މި ސަރުކާރުގެ ބޯހިޔާވަހިކަމުގެ މަޝްރޫއުތަކަށް ދެކޮޅު ހަދަމުންދާ ކަމަށެވެ.

"އަޅުގަނޑާއި ވާދަކުރައްވާ އަނެއް ދެ ކެންޑިޑޭޓުން ކަނޑައެޅިގެން އަޅުގަނޑުމެންގެ އެންމެ މުހިންމު މައްސަލައަކަށް ދިމާވެފައިވާ ބޯހިޔާވަހިކަމުގެ މަޝްރޫއުތަކާއި ދެކޮޅު ހެއްދެވި، ހަމަ ރަނގަޅަށް ދެ ކެންޑިޑޭޓުން ވިދާޅުވީ، ތިމަންނަމެން ކަނޑައެޅިގެން ދެކޮޅޭ.". އާޒިމާ ވިދާޅުވިއެވެ.