ގޯލްޑަން ފުޓްސަލް ޗެލެންޖު 2024 ގައި ވާދަކުރާ ރ. އަތޮޅު ފައިނު ފުޓްސަލް ޓީމުގެ ފުރަތަަމަ އަމާޒަކީ މުބާރާތުގެ އަތޮޅު ބުރުގައި ރަނގަޅު ނަތީޖާއެއް ހޯދައި، ފައިނުގެ ރައްޔިތުން ފަޚުރުވެރިވާ ފަދަ ކަމިޔާބެއް މުބާރާތުގައި ހޯދުން ކަމަށް އެޓީމުން ބުނެފިއެވެ.
ފައިނު ފުޓްސަލް ޓީމުގެ އޮފިޝަލަކު ވޮއިސް އަށް މައުލޫމާތު ދެމުން ބުނީ މިއަހަރުގެ މުބާރާތަށް ތައްޔާރުވުމުގެ ގޮތުން އެޓީމުން ވަރަށް ދުރާލައި ތައްޔާރުވަމުން އަންނަކަމަށެވެ. އެގޮތުން މިދިޔަ ނޮވެމްބަރު މަހުގެ ތެރޭގައި ޕްރެކްޓިސް ފެށި ނަމަވެސް ޓީމަށް ކޯޗަކު ހަމަޖައްސައި ރަސްމީކޮށް ފަރިތަކުރުންތައް ފަށާފައި ވަނީ ޑިސެމްބަރ ދޭއް ގައެވެ. އަދި މުބާރާތުގައި ވާދަކުރާ ފައިނަލް ސްކޮޑް ފައިނަލް ކުރީ ޖެނުއަރީމަހުގެ 9 ވަނަ ދުވަހު އެވެ.
މިޓީމުގައި ހިމެނެނީ ވަރަށް ޒުވާން ހުނަރުވެރި ކުޅުންތެރިންތަކެއް އަދި ޓީމާއި މެދު ވަރަށް އިތުބާރު އެބައޮތް. އަޅުގަނޑުމެން ޓީމުގެ ވަރަށް ބޮޑު އެދުމެއް މަާލެ، ހުޅުމާލެ އަދި ވިލިމާލޭގައި ދިރިއުޅޭ މިރަށުގެ ވީހާވެސް ގިނަ ރައްޔިތުން ފައިނު ކުޅޭ މެޗުތަކަށް ދަނޑަށް ހާޒިރުވެ މިޓީމަށް ސަޕޯޓްކޮށް ދިނުމަކީ..
މިއަހަރުގެ ގޯލްޑަން ފުޓްސަލް ޗެލެންޖުގައި ރ. އަތޮޅުން 7 ޓީމު ބައިވެރިވެފައިވާއިރު، އަތޮޅު ބުރު ކުރިއަށް ގެންދިއުމަށް ހަމަޖެހިފައިވަނީ ދެ ގުރޫޕަކަށް ބަހާލައިގެންނެވެ. އެގޮތުން އެއް ގުރޫޕްގައި ތިން ޓީމު ހިމެނޭއިރު އަނެއް ގުރޫޕްގައި ހަތަރު ޓީމު ހިމެނޭ ގޮތަށެވެ. އަދި ކޮންމެ ގުރޫޕަކުން އެންމެ ރަގަޅު ނަތީޖާއެއް ހޯދާ ދެޓީމު ސެމީ ފައިނަލަށް ހޮވޭގޮތަށެވެ. އަދި އަތޮޅު ބުރުގެ ފައިނަލުގައި ކުޅޭ ދެޓީމަށް މުބާރާތުގެ ޒޯނު ބުރުން ފުރުސަތު ލިބިގެންދާނެ އެވެ.
މުބާރާތުގައި ފައިނު ހިމެނުނީ ރ.އަތޮޅު ގުރޫޕް ދޭއްގައެވެ. މިގުރޫޕްގައި ފައިނުގެ އިތުރުން ދެން ހިމެނެނީ އިނގުރައިދޫގެ އިތުރުން ހުޅުދުއްފާރު އެވެ. އަދި ފުރަތަަމަ މެޗުގައި މިމަހުގެ 16 ވަނަ ދުވަހުގެ ރޭ 22:00 ގައި ފައިނު ނުކުންނާނީ އިނގުރައިދޫ ޓީމާއި ދެކޮޅަށެވެ. އަދި ދެވަނަ މެޗުގައި މިމަހުގެ 24 ވަނަ ދުވަހުގެ ރޭ 22:00 ގައި ފައިނު ނުކުންނާނީ ހުޅުދުއްފާރު ޓީމައި ދެކޮޅަށެވެ.
Advertisement
This content is created and paid for by advertisers and does not involve Voice Journalists
