މިވަގުތު ހުސްވެފައިވާ މާލޭ މޭޔަރުކަމުގެ މަޤާމަށް މީހަކު ހޮވުމަށް ބާއްވާ ބައި-އިލެކްޝަންގެ ވޯްތލުން މިއަދު 8 ޖަހައިރު ފެށިއްޖެއެވެ.

މާލޭ މޭޔަރު އިންތިހާބުގެ ވޯޓްލުން 8 ޖަހާއިރު ފެށިފައިވާ އިރު ކުރިން ވޯޓްލައި ނިންމާ ގަޑިއަކީ ހަވީރު 4 ކަމުގައި ވީ ނަމަވެސް އިއްޔެ މާލެއަށް ކުރި ބޯ ވިއްސާރަ އާއި ގުޅިގެން މިހާރު އީސީން ހަމަޖައްސާފައިވަނީ ވޯޓްލުމުގެ އެންމެ ފަހު ގަޑިއަކީ ހަވީރު 5 ޖަހާއިރު ކަމަށެވެ.

އިލެކްޝަން ކޮމިޝަން އީސީން މަޢުލޫމާތު ދެއްވާފައިވާ ގޮތުގައި މި ބައި އިލެކްޝަންގައި  މާލޭގައި 55 ވޯޓު ފޮށި ބަހައްޓާފައިވެ އެވެ.

މާލޭ މޭޔަރު ހޮވުމުގެ މި ބައި-އިލެކްޝަނަށް، އިލެކްޝަންސް ކޮމިޝަން (އީސީ)ން ވަނީ މޮނިޓަރުން، އޮބްޒާވަރުން އަދި މަންދޫބުން އެކްރެޑިޓްކޮށްދީފަ އެވެ. އެގޮތުން، 620 މޮނިޓަރުންނަށާއި، 197 އޮބްޒާވަރުންނަށާއި އަދި 165 ޕާޓީތަކުގެ މަންދޫބުން އެކްރެޑިޓް ކޮށްދީފައިވެއެވެ. އެހެންކަމާއި އެކު ޖުމްލަ ހާހަކަށް ވުރެ ގިނަ ފަރާތްތަކުން އިންތިހާބުގެ ކަންކަން ބަލަމުން ދާނެއެވެ.

މިއަދުގެ މި ބައި އިލެކްޝަންގައި މާލޭ މޭޔަރުކަމުގެ އިތުރުން މާލޭ ސިޓީ ކައުންސިލްގެ ބައެއް ދާޢިރާތަކުން ހުސްވެފައިވާ  ކައުންސިލަރުންގެ މަޤާމަށްވެސް މީހުން އިންތިހާބުކުރުން ކުރިއަށް ދާނެއެވެ. އެ ދާއިރާތަކަކީ  މާފަންނު ދެކުނު ދާއިރާ، ހެންވޭރު ދެކުނު ދާއިރާ އަދި މެދުހެންވޭރު ދާއިރާއެވެ.

މި ބައި އިލެކްޝަންއަށް 5 ބޭފުޅަކު ވާދަ ކުރައްވައެވެ . އެ 5 ބޭފުޅުންނަކީ

1.    އަމިއްލަ ގޮތުން ކުރިމަތި ލައްވާ އެމްޑީއޭގެ ގައުމީ މަޖިލީހުގެ ކުރީގެ މެންބަރު ޝުއައިބު އަލީ

2.    އަމިއްލަ ގޮތުން ކުރީގެ ކޮމިޝަނާ އޮފް ޕޮލިސް ހުސައިން ވަހީދު

3.    ޕީޕީއެމް-ޕީއެންސީ ގެ ފަރާތުން ކުރީގެ ބަންޑާރަނައިބު އާޒިމާ ޝަކޫރު

4.    އެމްޑީޕީގެ ފަރާތުން އެމްޓީސީސީގެ ކުރީގެ ސީއީއޯ އާދަމް އާޒިމް

5.    ޑިމޮކްރެޓްސްގެ ފަރާތުން ގަލޮޅު ދެކުނު ދާއިރާގެ ކައުންސިލަރު މުހައްމަދު ސައިފް ފާތިހު

މި ފަސް ބޭފުޅުންވެސް ވަނީ މި އިންތިޙާބަށްޓަކައި ވަރުގަދަ ކެންޕެއިނެއް ކުރައްވާފައެވެ.