އިއްޔެގެ ރެއިން ފެށިގެން އިއްޔެއާއި އެކު މާލެއަށް ބޯކޮށް ވާރޭވެހި މާލޭގައި ފެންބޮޑުވި ސަރަހައްދުތަކުގެ ފެން ހިންދައި އާންމު ޙާލަތަށް ގެނެވިފައިވާ ކަމަށް އެމްއެންޑީއެފުން ވިދާޅުވެއްޖެއެވެ.

މާލެ އާއި މާލޭގެ ކައިރީގައިވާ ސަރަހައްދުތަކަށް އިއްޔެ ބޯކޮށް ވާރޭ ވެހުމުގެ ސަބަބުން މާލޭގެ އެކި ސަރަހައްދުތަކުގައި ފެންބޮޑުވެ، އެކި ގެތަކަށް ވަނީ އެކި ވަރުގެ ގެއްލުންވެފައެވެ. އޭގެ ތެރެއިން ބައެއް ގެތަކުގައި ދިރިއުޅުނު ފަރާތްތައް ރައްކާތެރި އެހެން ސަރަހައްދުތަކަށް ބަދަލުކުރަން ވެސް ޖެހިފައި ވެއެވެ.

އެމްއެންޑީއެފުން ވިދާޅުވެފައިވާ ގޮތުގައި ފެންބޮޑުވި ސަރަހައްދުތަކުގައި ފެން ހިންދައި އާއްމު ހާލަތަކަށް ގެނެވިފައިވަނީ ފަތިހު 5:00 ހާއިރުއެވެ.  މާލެއަށް ބޯކޮށް ވާރޭ ވެހުމުގެ ސަބަބުން ފެންބޮޑުވެ، ގޭގެއަށް ފެންވަންނަތީ 176 ގެއެއްގައި ވެލިބަސްތާ ޖަހައި އެހީތެރިކަން ފޯރުކޮށްދެވިފައިވާ ކަމަށާއި، އަދި ރޭ ދަންވަރު 2:35 އާ ހަމަމައަށް ޕަމްޕް ބޭނުންކޮށްގެން 27،449 ޓަނުގެ ފެން ހިންދާފައިވާ ކަމަށް ވެސް އެމްއެންޑީއެފުން ވިދާޅުވެއެވެ.

Advertisement

އޭގެ އިތުރުން މާލޭގެ 8 ސަރަހައްދެއްގައި ޖުމުލަ 23 ޕަމްޕު ބޭނުންކޮށްގެން ފެން ހިންދުމުގެ މަސައްކަތް ކުރެވިފައިވާ ކަމަށް  އެމްއެންޑީއެފުން ވިދާޅުވެއެވެ.

މާލެއަށް އިއްޔެ ކުރި މި ގަދަ ވިއްސާރައިގައި ފެން ބޮޑުވުމުގެ އިތުރުން ވައިގަދަވުމުގެ ސަބަބުންވެސް ބައެއް ގެއްލުންތައް ލިބިފައިވެއެވެ. އޭގެ ތެރޭގައި މަގުމަތީގައި ހުރި ބައެއް ގަސްތައް ވެއްޓި ދުއްވާ އެއްޗިއްސަށް ގެއްލުންވުމުގެ އިތުރުން ، އެމްޑަބުލިޔުއެސްސީގައި ހުރި ދިގު ވަސް ހޮޅިއެއް އަރި އަޅާލުން ހިމެނެއެވެ.

މާލޭގައި ފެން ބޮޑުވުމުގެ ސަބަބުން އެހީތެރިކަން ބޭނުންވި ފަރާތްތަކަށް ސަރުކާރުގެ ކަމާއި ބެހޭ ފަރާތްތަކުން އެހީތެރިކަން ފޯރު ކޮށްދެއްވަމުން ގެންދަވާކަމަށް އެ ފަރާތްތަކުން މަޢުލޫމާތު ދެއްވައެވެ.