މިއަހަރުގެ ދެވަނަ ކުރޫޒު ލައިނާރ "އެމްއެސް ރިވޭރާ" މިއަދު މާލެ އަތުވެއްޖެއެވެ.

މިއުލޫމާތު ލިބިފައިވާ ގޮތުގައި މިއަދު ރާއްޖެ އައިސްފައިވާ  ކުރޫޒު ލައިނާރ "އެމްއެސް ރިވޭރާ" އަކީ މާޝަލް އައިލެންޑްސްގައި ރަޖިސްޓްރީކޮށްފައިވާ މި އުޅަނދަކީ، 980 ފަތުރުވެރިންނާއި ފަޅުވެރިން ގޮވައިގެން ދަތުރުކުރާ އުޅަނދެކެވެ. މި ޕކުރޫޒް ލައިނާ ރާއްޖެ އައިސްފައި މިވަނީ މެންގަލޫރުގައި މަޑުކޮށް އަދި ކޮއްޗިންގައި ވެސް  ޖެއްސުމަށްފަހުއެވެ.

މިއަދު ރާއްޖެ އައިސްފައި މިވާ "އެމްއެސް ރިވޭރާ" ރާއްޖެއަށް އައުމުގެ ކުރިން އެ އުޅަނދު ޑުބާއީ، މޮރްމުގާއޯ، އަދި މުމްބާއީ ބަނދަރުތަކުގައިވެސް މަޑުކޮށްފައިވާ ކަމަށް މަޢުލުމާތު ލިބިފައި ވެއެވެ.

މިއަހަރުގެ ދެވަނަ ކުރޫޒު ލައިނާ މިއަދު ރާއްޖެ އައިސްފައިވާ އިރު ފަތުރުވެރިކަމާއި ބެހޭ ވުޒާރާއިން އެންމެ ފަހުން ޢާއްމުކޮށްފައިވާ ތަފާސް ހިސާބުތަކަށް ބަލާއިރު ވޭތުވެދިޔަ އަހަރުގެ ފުރަތަމަ ހަފްތާއަށް ވުރެ މިއަހަރުގެ ފުރަތަމަ ހަފްތާ ރާއްޖެ ޒިޔާރަތް ކުރި ފަތުރުވެރިންގެ އަދަދު ވަނީ 7 އިންސައްތަ ކުރިއަރާފައެވެ.

ފަތުރުވެރިކަމުގެ ވުޒާރާއިން މިއަހަރަށް އަމާޒު ހިފާފައިވަނީ 2 މިލިޔަން ފަތުރުވެރިން ރާއްޖެ ގެނައުމަށެވެ. ވޭތުވެ ދިޔަ އަހަރު ރާއްޖެއަށް ޒިޔާރަތް ކޮށްފައި ވަނީ 1.8 މިލޔަން ފަތުރުވެރިންނެވެ.