ރަތް ކަނޑުން ލައިފައި ޔަހޫދީންގެ ރަށްތަކަށް ދަތުރުކުރާ ބޯޓުފަހަރަށް ޔަމަނުގައި ޙަރަކާތްތެރިވާ ޙޫޠީ ޖަމާޢަތުން ދެމުންދާ ޙަމަލާތައް ހުއްޓުވުމަށް ކަމަށް ބުނެ، އެމެރިކާ އިސްވެ ޔަމަނަށް ބޮން އަޅަން ފެށުމުން ރަތް ކަނޑުގެ ހަމަނުޖެހުން ދިގު ދެމިގެން ގޮސްދާނެ ކަމުގެ ބިރު ބޮޑުވުމާއި އެކު ، ކަނޑުމަގުން ކޮންޓޭނަރުގައި މުދާ އުފުލުމަށް ނަގާ އަގުތައް އުފުލިއްޖެއެވެ.

ރަތްކަނޑު ހިމެނޭ ސަރަހައްދަކީ ދުނިޔޭގައި އެންމެ ގިނައިން މުދާ އުފުލާ ބޯޓް ފަހަރުތައް ދަތުރުކޮށް ހަދާ ސަރަހައްދަށް ވާއިރު  ޙޫޠީންގެ ޙަމަލާތަކާ ގުޅިގެން ޝިޕިން ކުންފުނިތަކުން ރަތް ކަނޑުގެ ދަތުރުތައް ހުއްޓައިލުމުން ސުއޭޒް ކެނަލުން ދަތުރުކުރާ ބޯޓުތަކުގެ ޢަދަދު ވެސް ވަނީ ވަރަށް ބޮޑަށް މަދުވެފައެވެ.

އެ ގޮތުން މިދިޔަ އަހަރަށްވުރެ މި އަހަރުގެ މިހާތަނަށް ސުއޭޒް ކެނަލުން ދަތުރުކުރި ބޯޓުގެ އަދަދު ވަނީ 777ން 544އަށް މަދުވެފައެވެ. މިއީ 233 ބޯޓްގެ މަދުވުމެކެވެ.

Advertisement

ރަތް ކަނޑުން ޔަހޫދީންގެ ރަށްތަކަށް ދަތުރުކުރާ ބޯޓުފަހަރަށް ޙޫޠީ ޖަމާޢަތުން ހަމަލާދޭ ކަމަށް ބުނެ އެމެރިކާއިން އެމީހުންނަށް އަމާޒުކޮށް ޙަމަލާތައް ދޭންފަށާފައިވާ މި ދަނޑިވަޅުގައި އެމެރިކާއިން ވެސް މިހާރު ވަނީ އެ ސަރަޙައްދުން ދަތުރުނުކުރުމަށް ޝިޕިން ކުންފުނިތަކަށް ލަފާ ދީފައެވެ.

އެމެރިކާގެ މި އިލްތިމާސާއި އަދި އެމެރިކާއިން ޔަމަނަށް ދޭންފެށި ހަމަލާތަކާއި ގުޅިގެން ދުނިޔޭގައި ތެލާއި އެނޫން ވެސް މުހިންމު މުދާ ހިފައިގެން ދަތުރުކުރާ ބޯޓުތަކުން ނަގާ ކޮންޓޭނަރުގެ އަގު އުފުލި އިންފްލޭޝަން މަތިވެދާނެ ކަމުގެ ބިރު ވަނީ ބޮޑުވެފައެވެ. އަދި ދަތުރުތައް ހުއްޓައިލުމުން މިދިޔަ އަހަރަށްވުރެ މި އަހަރުގެ މިހާތަނަށް ސުއޭޒް ކެނަލަށް ލިބުނު އާމްދަނީ ވަނީ %40   އިންސައްތައަށް ދަށަށް ގޮއްސައެވެ.

ރަތްކަނޑު ހިމެނޭ ސަރަހައްދުގެ މައްސަލަ ދިގުދެމިގެންދާ ނަމަ ކަނޑުމަގުން މުދާ އުފުލުމަށް ބުރޫ އަރާނެ ކަމަށާއި ޚަރަދުތައް ވެސް ބޮޑުވާނެ ކަމަށް މަސްރަޙް ދިރާސާކުރާ ފަރާތްތަކުން ބުނެއެވެ. އަދި އެކަމުގެ އަސަރު މުޅި ދުނިޔެއަށް ވެސް ކުރާނެކަމަށް އެފަރާތްތަކުން ލަފާކުރައްވައެވެ.