ސަރުކާރުން ދިވެހި ކޮންމެ ގޭބީސީއަކަށް އަންނަ ރޯދަމަހު ހަނޑޫބަސްތާއަކާއި ފުއްބަސްތާއެއް ދޭނެ ކަމަށް ރައީސް ޑރ މުހައްމަދު މުއިއްޒު ވިދާޅުވެއްޖެ އެވެ.
ޗައިނާއަށް ކުރެއްވި ތާރީޚީ ފުރަމާނަ ދަތުރުފުޅު ނިންމަވައިލެއްވުމަށް ފަހު ވެލާނާ އިންޓަނޭޝަނަލް އެއާޕޯޓުގައި ހުންނަވައި މީޑީއާތަކަށް ދެއްވި ސްޓޭޓްމަންޓުގައި ރައީސް ވިދާޅުވީ މިރޯދަ މަހު ކޮންމެ ގޭބީސީ އަކަށް 10 ކިލޯގެ ހަނޑޫ އަދި ފުށް ބަސްތާއެއް ދިނުމަށް ނިންމާފައިވާ ކަމަށެވެ. ސަރުކާރުން ހިލޭދޭ ކާޑުގެ އަދަދު އަންނަ އަހަރު އިތުރު ކުރައްވާނެ ކަމަށްވެސް ރައީސް ޑރ، މުހައްމަދު މުއިއްޒުވަނީ ވިދާޅުވެފައެވެ.
މިއަދުގެ މި ބައްދަލުވުމުގައި ރައީސް ވަނީ ކާޑްގެ ބާވަތްތައް ހޯދަން ރާއްޖޭން އެއް ދިމާލަކަށް ބަރޯސާ ނުވާނެ ކަމަށް ވިދާޅުވެ، އަވަށްޓެރި އިންޑިއާއަށް ރައީސް ނުސީދާ މެސެޖެއް ވެސް ދެއްވާފައެވެ.
"އަޅުގަނޑުމެންގެ ބޭސިކް ކޮމޯޑިޓީޒް (ހަނޑޫ، ހަކުރު، ފުށް) މިހާރު އެންމެ ދިމާލަކަށް ބަރޯސާއެއް ނުވާނެ، އަޅުގަނޑުމެން މިހާރު ވާނީ ތުރުކީއާއި އެކު އެއްބަސްވުމެއްގައި ސޮއިކޮށްފައި. ހަނޑޫ، ހަކުރު ފުށާއި އެކި ބާވަތްތައް ތުރުކީއިން މިހާރު އެއްއަހަރާއި އިތުރު 10 އިންސައްތައަށް ވާ ވަރަށް ލިބުމަށް އެއްބަސްވުން ވަނީ ހެދިފައި،"
ރައީސް ވިދާޅުވި އެވެ.
އިތުރު ތަފްޞީލް ދެއްވަމުން ރައީސް ވިދާޅުވީ ކާޑުގެ ބާވަތްތައް ހޯދުމަށް މިހާރުވެސް، ތުރުކީއާއެކު އެއްބަސްވުމުގައި ސޮއިކޮށްފައިވާ ކަމަށެވެ.
"ތުރުކީއިން އަހަރަކާއި އިތުރު 10 އިންސައްތައަށްވާ ވަރަށް ކާޑުގެ ބާވަތްތައް ގެނައުމަށް އެއްބަސްވުމުގައި މިހާރު ވާނީ ސޮއި ކޮށްފައި، ފުށުގެ ފުރަތަމަ ޝިޕްމަންޓް ފެބްރުއަރީ މަހު އަންނާނެ،"
ރައީސް ވިދާޅުވި އެވެ.
Advertisement
This content is created and paid for by advertisers and does not involve Voice Journalists
