އިއްޔެ އޮތް މާލެ ސިޓީ ކައުންސިލްގެ ބައި އިލެކްޝަން ގައި އެމްޑީޕީން ދެ ގޮނޑި ކާމިޔާބު ކުރިއިރު ސަރުކާރު ހިންގާ ކޮންގްރެސް ޕާޓީން ވެސް ދެ ގޮނޑި ކާމިޔާބު ކޮށްފި އެވެ.

އިއްޔެ ބާއްވާފައި ވަނީ، ހުސްވެެފައިވާ މާލޭ މޭޔަރ ކަމާއި، މާލޭ ކައުންސިލަރުންގެ ތިން ގޮނޑިއަަކަށް މެންބަރުން ހޮވުމުގެ އިންތިހާބެވެ. 

އެ އިންތިޚާބުގައި މާލޭ މޭޔަރ ކަމަށް 5 ކެންޑިޑޭޓަކު ވަނީ ވާދަކުރައްވާފައެވެ. އެއީ، ސަރުކާރުގެ ޕާޓީ ޕީއެންސީގެ ފަރާތުން ޢާއިޝަތު ޢާޒިމާ ޝަކޫރު، އެމްޑީޕީގެ ފަރާތުން އެމްޑީޕީގެ ކުރީގެ ސީއީއޯ އާދަމް އާޒިމް، ޑިމޮކްރެޓްސްގެ ފަރާތުން ސައިފް ފާތިހް އަދި އަމިއްލަ ގޮތުން ހުސައިން ވަހީދާއި ޝުޢައިބެވެ. 

އޭގެ ތެރެއިން އެންމެ ގިނަ ވޯޓު ހޯއްދެވި އާޒިމަށް ލިބިވަޑަައިގަތީ 7،621 ވޯޓެވެ. އާޒިމާ އަށް ލިބިވަޑައިގަތީ 5،031 ވޯޓެވެ. އަދި ސައިފަށް 2،343 ވޯޓު ލިބިވަޑައިގެންނެވިއިރު ހުސައިން ވަހީދަށް ލިބިވަޑައިގަތީ 1،888 ވޯޓެވެ. ޝުއައިބަށް ލިބި ވަޑައިގަތީ 125 ވޯޓެވެ.

އެހެންކަމުން، ވޯޓުލީ މީހުންގެ 44 އިންސައްތަ އާއެކު މޭޔަރ އިންތިޚާބު ކާމިޔާބު ކޮށްފައިވަނީ އާޒިމެވެ. 

އިއްޔެގެ މޭޔަރ ބައި އިލެކްޝަން ގައި ވޯޓުލުމުގެ ހައްގު ލިބިގެންވާ 54,680 މީހުންގެ ތެރެއިން ވޯޓުލާފައި ވަނީ 17,410 މީހުންނެވެ. 

މޭޔަރ ގެ އިތުރުން ދެން އެމްޑީޕީއަށް ލިބުނީ ކައުންސިލްގެ ތިން ގޮނޑީގެ ތެރެއިން އެމްޑީޕީން ވަނީ މެދު ހެންވޭރު ދާއިރާގެ ގޮނޑިއެވެ. އެ ގޮނޑި ކާމިޔާބު ކުރެއްވީ އަހްމަދު ރިޝްވާން އެވެ. ރިޝްވާނަށް ލިބިފައި ވަނީ 320 ވޯޓެވެ. 

އެ ދެ ގޮނޑީގެ އިތުރުން ހެންވޭރު ދެކުނު ދާއިރާގެ ގޮނޑި އާއި، މާފަންނު ދެކުނު ދާއިރާގެ ކައުންސިލްގެ ގޮނޑި ކާމިޔާބު ކުރެއްވީ ވެރިކަންކުރާ ޕީއެންސީގެ ކެންޑިޑޭޓުންނެވެ. 

އެގޮތުން ހެންވޭރު ދެކުނު ދާއިރާގެ ގޮނޑި ކާމިޔާބު ކުރެއްވީ ކޮންގްރެސް ޕާޓީގެ ކެންޑިޑޭޓް އައިމިނަތު ރިޝްފާ އެވެ. ރިޝްފާ އަށް ލިބިފައި ވަނީ 411 ވޯޓެވެ.

އަދި މާފަންނު ދެކުނު ދާއިރާގެ ކައުންސިލްގެ ގޮނޑި ކާމިޔާބު ކުރެއްވީ ހަސަން ނިޒާމެވެ. އޭނާ އަށް ލިބިފައި ވަނީ 383 ވޯޓެވެ.

އިއްޔެ ނަތީޖާއާ އެކު ކައުންސިލްގެ މެޖޯރިޓީ އޮންނާނީ ސަރުކާރަށެވެ. އެގޮތުން މާލެ ސިޓީ ކައުންސިލްގައި މިހާރު އެމްޑީޕީގެ ތިން މެންބަރުން ހިމެނޭއިރު ދަ ޑިމޮކްރެޓްސްގެ ދެ މެންބަރު އަދި ޕީއެންއެފްގެ ދެ ކައުންސިލަރަކު ހިމެނެ އެވެ. ދެން ތިއްބެވީ ޕީޕީއެމް / ޕީއެންސީގެ ކައުންސިލަރުންނެވެ. ސަރުކާރު ހިންގާ އެ ދެ ޕާޓީއަށް ނިސްބަތްވާ 11 ކައުންސިލަރުން މާލެ ސިޓީ ކައުންސިލް ގައި އެބަތިއްބެވެ.