ޓެޓޫ ޖަހާފައިވާ ތަނަކީ، ނަޖިސް ތަނެއް ކަމަށާއި، ޓެޓީޖެހުމަކީ ހަރާމް ކަމެއް ކަމަށް ދިވެހި ދަޢުލަތުގެ އިސްލާމީ ފަތުވާދޭ އެންމެ މަތީ މަޖިލީސްއިން ވިދާޅުވެއްޖެއެވެ.

އެމަޖިލިސްއިން މިހެން ވިދާޅުވެފައިވަނީ ޓެޓޫ ޖެހުމާއި ގުޅޭގޮތުން އެ މަޖިލިހުން ނެރެފައިވާ ބަޔާނެއްގައެވެ.

ފަތުވާ މަޖިލީސް އިން މިއަދު ނެރުނު ބަޔާނުގައި ވަނީ ހަށިގަނޑުގެ އެތަންމިތަނުގައި ޓެޓޫގެ ގޮތުގައި، ލިޔުންތަކާއި، ދޫންޏާއި، ހަޔަވާނުތަކުގެ ސޫރަ ތަކާއި، އިންސާނުންގެ ސޫރަތަކާއި އެނޫންވެސް އެކިވައްތަރު ވައްތަރުގެ ނިޝާންތައް ކުރަހާފައި ބެހެއްޓުމުގެ ޝަރުއީ ހުކުމް އާއްމު ކުރައްވާފައެވެ.

Advertisement

"އެއީ، މިކަމަކީ، މާތް الله ހައްދަވާފައިވާ މަހްލޫގެއް، ހައްދަވާފައިވާ ގޮތް ބަދަލުކުރުން ކަމަށްވާތީ އާއި ޓެޓޫ ޖަހާފައިވާ ތަނަކީ، ނަޖިސް ތަނެއް ކަމުގައި އިލްމުވެރިން ވިދާޅުވާތީއެވެ.". އިސްލާމީ ފަތުވާދޭ އެންމެ މަތީ މަޖިލީހުގެ ބަޔާނުގައި ވިދާޅުވެފައި ވެއެވެ.

ފަތުވާ މަޖިލީސް އިން މިއަދު ނެރުނު ބަޔާނުގައި އިތުރަށް ބުނެފައިވާ ގޮތުގައި އިސްލާމީ ފަތުވާދޭ އެންމެ މަތީ މަޖިލީހުގެ މެންބަރުން މި މައްސަލަ ކީރިތި ގުރްއާނާއި، ކީރިތިރަސޫލާގެ ސުންނަތާއި، އިލްމުވެރިންގެ ބަސްފުޅުތަކާއި، ބުއްދީގެ ހަމަތަކުގެ އަލީގައި ދިރާސާކުރުމުން އެނގި ހާމަވީ، ހަށިގަނޑުގެ އެއްވެސް ތަނެއްގައި، އެއްވެސް ސިފައެއްގައި ޓެޓޫ ޖަހާފައި ބެހެއްޓުމަކީ، ހުއްދަނޫން ހަރާމްކަމެއް ކަމެކެވެ.

ދިވެހި ދަޢުލަތުގެ އިސްލާމީ ފަތުވާ އެންމެ މަތީ މަޖިލީސްއިން މިފަދައިން ބަޔާން ނެރެފައިވާ އިރު މި މުތަމަޢުގެ ތެރެއިންވެސް މަދުން ނަމަވެސް ހަށިގަނޑުގެ އެކިއެކި ތަންތަނުގައި ޓެޓޫ ޖަހާފައިވާ ފަރާތްތައް ފެންނަމުން ދެއެވެ.