އިއްޔެ މާލޭގައި ބޭއްވުނު ބައި އިލެކްޝަންގެ ވޯޓްލުމުގެ ވަގުތާއި ބެހޭގޮތުން އީސީގެ ރައީސް ފުއާދު ތަޢުފީޤަށް އަމާޒުކޮށް އެކްސް ޕޯސްޓްކުރި މީހަކަށް "ކަޑަނޫން ގޮތެއް ނޯވޭ" ވިދާޅުވެ މަޖާޒީ ގޮތެއްގައި ރައްދު ދެއްވައިފިއެވެ.
އިލެކްޝަން ކޮމިޝަން (އީސީ)ގެ ރައީސް ފުއާދު ތަޢުފީގު މިފަދައިން ވިދާޅުވެފައި ވަނީ މާލޭގެ މޭޔަރާއި އެ ކައުންސިލުން ހުސްވެފައިވާ ތިން ގޮނޑިއަކަށް މެމްބަރުން އިންތިހާބު ކުރުމަށް އިއްޔެ ބޭއްވުނު ބައި އިލެކްޝަންގެ ވޯޓުލުން 5 ޖަހާއިރު ނިންމާލުމުން " އެހެންޔާ 4 ޖަހާއިރު ބަންދުކުރާ ފޮށި މިއަދު 5 ގައި، ތީތި ކަޑައޭ" ބުނެ ފުއާދު ޓެގުކޮށް މީހަކު ކުރި އެކްސް ޕޯސްޓަކަށް ރައްދު ދެއްވައެވެ.
ފުއާދުގެ ޕޯސްޓުގައި ވިދާޅުވެފައި ވަނީ ރިޔާސީ އިންތިޙާބުގައި ވޯޓްލުން ކުރިއަށް ދިޔައިރު ފުރަތަމަ ބުރުގައި ވޯޓްފޮށި ބަންދުކުރީ 4 ޖަހާއިރު ކަމަށާއި، އެހެން ނަމަވެސް ރިޔާސީ އިންތިހާބުގެ ދެވަނަ ބުރުގައި ވޯޓްފޮށި 5 ޖަހާއިރު ބަންދު ކުރަން ނިންމީ ފުރަތަމަ ބުރުގައި ކަން ކުރެވުނު ގޮތް ކަޑަވެގެން ކަމަށެވެ. އިއްޔެ ބޭވުނު މާލޭ މޭޔަރު އިންތިހާބުގެ ވޯޓްލުން 5 އަށް ހެދީމަ އެ ގޮތްވެސް ކަޑަވެއްޖެ ކަމަށެވެ.
ފުއާދު އިތުރަށް ވިދާޅުވެފައިވަނީ އިއްޔެގެ ވޯޓްލުން 4 ޖަހާއިރަށް ނިންމާލި ނަމަ އެހާ މަދުން މީހުން ވޯޓްލީ ވަގުތު ނުދީގެންނޭ ބުނާނެ ކަމަށެވެ. ފުއާދުގެ ޕޯސްޓް ނިންމަވައި ލެއްވީ "އެހެންވެ އޭތި ކަޑައޭ"
ވިދާޅުވަމުންނެވެ.
އީސީގެ ރައީސް މި މޭރުމުން ޕޯސްޓް ކުރައްވާފައިވާ އިރު އިއްޔެ މާލޭގައި ބޭއްވުނު ބައި އިލެކްޝަންގެ ވޯޓްލުން ވެގެން ގޮސްފައިވަނީ މާލޭގެ ތާރީޙްގައިވެސް އެންމެ މަދު އަދަދަކަށް ވޯޓްލާން މީހުން ނިކުތް އިންތިހާބު ކަމަށެވެ.
އިންތިހާބުގައި ވޯޓުލުމުގެ ހައްގު 54،680 މީހަކަށް ލިބޭ ނަމަވެސް ވޯޓުލުމުގެ ވަގުތު ހަމަވިއިރު ވޯޓުލާފައި ވަނީ އެންމެ 17،000 އެއްހާ މީހުން ކަމަށް އިލެކްޝަންސް ކޮމިޝަނުން ވަނީ ބުނެފަ އެވެ. މިއީ ވޯޓް ލުމުގެ ހައްޤު ލިބިގެންވާ މީހުންގެ އެންމެ 32 އިންސައްތަ މީހުންނެވެ.
Advertisement
This content is created and paid for by advertisers and does not involve Voice Journalists
