ރާއްޖޭގައި އިންފްލުއެންޒާގެ ނުރައްކާ އިތުރުވެ، މިބަލި ފެތުރެމުން ދާކަމަށާއި މިހާތަނަށް މި ބަލި  ޖެހިގެން ޒުވާނަކު ނިޔާވެ ، ތިން މީހަކަށް މި ވަގުތު އައިޖީއެމްއެޗުގައި ފަރުވާ ދެމުންދާ ކަމަށް އެތެރެހަށީގެ ޑޮކްޓަރު މުހައްމަދު އަލީ ވިދާޅުވެއްޖެ އެވެ.

ރާއްޖޭގެ މަޝްޙޫރު އެތެރެ ހަށީގެ ޑޮކްޓަރ މުހައްމަދު އަލީ "އެކްސް" ގައި ކުރެއްވި ޕޯސްޓެއްގައި ވިދާޅުވީ ފާއިތުވެދިޔަ ހަފްތާތަކުގެ ތެރޭގައި އިންފްލުއެންޒާގެ ވައްތަރެއް ކަމަށްވާ އެޗްވަންއެންވަން ރާއްޖޭގައި ފެތުރެމުން އަންނަ ކަމަށާއި، އަދި ތިން ޒުވާނަކަށް ނިއުމޯނިއާ ޖެހުމާ ގުޅިގެން ވެންޓިލޭޓަރުގައި ފަރުވާދެމުން ގެންދާ ކަމަށެވެ.

މުހައްމަދު އަލީގެ ޕޯސްޓުގައި އިތުރަށް ލިޔުއްވާފައިވާ ގޮތުގައި ބަލި ފެތުރެމުން އައި ނަމަވެސް ޕެންޑެމިކް ނުވަތަ ބަލިމަޑުކަމުގެ ހާލަތަކަށް ގޮސްދާނެ ކަމަށް ނުބެލެވޭ ކަމަށެވެ.

އެޗްވަންއެންވަންގެ އަލާމާތްތަކުގެ ތެރޭގައި ވައިރަލް ހުމާއި އަރިދަފުސް ރޯގާ ޖެހުން ހިމެނެއެވެ.

އެޗްވަންއެންވަން ރޯގާ އާންމުކޮށް ފެތުރެނީ ބަލިޖެހިފައިވާ މީހުން ކިނބިހި އެޅުމާއި ކެއްސުމުގެ ތެރެއިން ޖަރާސީމު ބޭރުވެ އެހެން މީހެއްގެ ހަށިގަނޑަށް ޖަރާސީމު ވަނުމުންނެވެ. އަދި އެފަދަ ޖަރާސީމެއް ހުރި ތަނަކު އަތްލެވިއްޖެ ނަމަވެސް އެ ޖަރާސީމެއް ހަށިގަނޑުގެ ތެރެއަށް އެތެރެވުމުގެ ފުރުސަތު ލިބިއްޖެނަމަ އެޗްވަންއެންވަން ޖެހުމުގެ ފުރުސަތު އޮވެއެވެ.

މި ފަދަ ބަލިތަކުން ރައްކާތެރިވުމަށް ކުރެވޭނެ އެންމެ މުހިއްމުކަމަކީ ސާފުތާހިރުކަމަށް ސަމާލުކަން ދިނުމާއި، ގިނަގިނައިން ސައިބޯނި ލައިގެން އަތް ދޮވުމެވެ. އަދި ހުން އައުން، ކަރުގައި ރިހުން، ގައިގައި އަދި ބޮލުގައި ރިހުން ފަދަ އަލާމާތެއް ދިމާވެއްޖެ ނަމަ ލަސްނުކޮށް ޑޮކްޓަރަކަށް ދައްކާ ފަރުވާ ހޯދުމެވެ.