މިދިޔަ ހުކުރު ދުވަހު މާލެ އަށް ކުރި ވިއްސާރާގައި ގެއްލުން ލިބުނު ގެތަކަށް އެހީގެ ގޮތުގައި 700،000ރ. ދޭން ނިންމާފައިވާ ކަމަށް ޑިޒާސްޓާ މެނޭޖުމަންޓް އޮތޯރިޓީ (އެންޑީއެމްއޭ) އިން ބުނެފިއެވެ.

މާލެ އަށް ކުރި ވިއްސާރައިގެ ސަބަބުން ފެންބޮޑުވެ މާލޭގެ ބައެއް ގޭގެއަށް ވަނީ ފެން ވަދެ، ބައެއް ގޭގޭގެ އިމާރާތަށް ގެއްލުންވެ ހިފާ ގެންގުޅޭ ސާމާނަށް ވެސް ގެއްލުންވެފައެވެ. 

އެގޮތުން އެންޑީއެމްއޭ އިން ހާމަކުރި ގޮތުގައި، ފެންބޮޑުވުމުގެ ހާދިސާ އާ ގުޅިގެން 78 ތަނަކަށް ލިބުނު ގެއްލުމުގެ އެސެސްމެންޓު ހަދަން ނިންމާފައިވާ ކަމަށެވެ. އޭގެ ތެރެއިން 53 ގެއެއްގެ އެސެސްމަންޓް މިހާރު ނިމިފައިވާ ކަމަށްށެވެ. އަދި އެ 78 ގޭގެ ތެރެއިން 19 ގެޔަކުން އެސެސްމެންޓް ހަދަން ބޭނުން ނުވާކަން އަންގައިފައިވާކަމަށާއި، އެކި އެކި ސަބަބުތަކާހުރެ 6 ގެޔަކަށް އަދި ނުވަދެވި ވާކަމުގައި ވެސް އެ އިދާރާއިން ހާމަކުރެއެވެ. 

އެސެސްމެންޓު ހެދި ގެތަކަށް ކާރިސާތަކުގައި އިންސާނީ އެހީ ފޯރުކޮށްދިނުމުގެ އުސޫލުގެ ތެރެއިން ޖުމްލަ 711،541.70ރ ދޭން ނިންމާފައިވާ ކަމަށް އެންޑީއެމްއޭ އިން ވަނީ ބުނެފައެވެ. 

އެއީ ޒަރޫރީ ހިފާ ގެންގުޅޭ ތަކެއްޗަށް ޖުމްލަ ލިބުނު ގެއްލުމުގެ %20 އަށްވާ 100،075.20ރ އާއި ސްޓްރަކްޗަރަލް ގެއްލުންތަކަށް 611،466.50ރ ކަމުގައި އެ އިދާރާއިން އާންމުކުރި ތަފްސީލުގައި ވަނީ ބުނެފައެވެ. 

ވިއްސާރާގައި ޒަރޫރީ ހިފާ ގެންގުޅޭ ތަކެއްޗަށާއި ސްޓްރަކްޗަރަލް ގެއްލުމުގެ ގޮތުގައި 1.1 މިލިއަން ރުފިޔާގެ ގެއްލުން ލިބިފައިވާ ވެފައިވާ ކަމަށް ވެސް އެންޑީއެމްއޭ އިންބުނެފައިވެއެވެ. ހުކުރު ދުވަހު ކުރި ވިއްސާރައާ ގުޅިގެން އިމާރާތަށް ލިބުނު ގެއްލުންތަކާ ހުރެ 18 ގޭބިސީއެއްގެ 110 މީހަކަށް އެންޑީއެމްއޭ މެދުވެރިވެގެން ވަގުތީ ބޯހިޔާވަހިކަން ވަނީ ފޯރުކޮށްދީފައެވެ.