ރައީސް ޑރ. މުހައްމަދު މުއިއްޒު ވަޢުދުވެ ވަޑައިގެންފައިވާ ފަދައިން ބޯހިޔާވަހިކަމަށް ފޯމު ހުށަހެޅުމުން ވަގުތުން މާކްސް ފެންނަ ޕޯޓަލްއެއް ހަދައިދޭނެ ބަޔަކު ހޯދުމަށް ސަރުކާރުން މިއަދު އިއުލާނުކޮށްފިއެވެ.

މި ސަރުކާރުގެ 100 ދުވަހުގެ ވައުދުގެ ތެރޭގައިވެސް، ބޯހިޔާވަހިކަމަށް ފޯމު ހުށަހެޅުމާ އެކު، އެ ފޯމެއްގެ ދަރަޖަ ވަގުތުން އެނގޭ ގޮތަށް 'ހައުސިން އެޕްލިކޭޝަން ޕޯޓަލް'އެއް ގާއިމް ކުރުން ހިމެނެއެވެ.

އެގޮތުން ހައުސިން އެންޑް އާބަން ޑިވެލޮޕްމެންޓު މިނިސްޓްރީން މިއަދު ވަނީ ހައުސިން އެޕްލިކޭޝަން ސިސްޓަމެއް ފަރުމާކޮށްދޭނެ ބަޔަކު ހޯދަން ބީލަމަށް ހުޅުވާލާފަ އެވެ.

އެމިންސްޓްރީން މިއަދުކޮށްފައިވާ އިޢުލާނުގައި ބުނެފައިވަނީ ބީލަމާ ގުޅޭ މައުލޫމާތު ދިނުމުގެ ސެޝަނެއް މާދަމާ ހެނދުނު 10:00 ޖަހާއިރު ހައުސިން މިނިސްޓްރީގައި އޮންނާނެކަމަށާއި އަދި ބީލަން ހުށަހަޅަން ޖެހެނީ މާދަމާގެ މެންދުރު 2:00 ގެ ކުރިން ކަމަށެވެ.

މިނިސްޓްރީގެ މި އިޢުލާނުގައިވާ ގޮތުން އެމިނިސްޓްރީގެ ފަރާތުން 'ހައުސިން އެޕްލިކޭޝަން ޕޯޓަލް' އެއް ތަރައްޤީކުރުމުގެ މައިގަނޑު މަޤްޞަދަކީ  ދެ ފުށް ފެންނަ ނިޒާމެއްގެ ތެރެއިން ގެދޮރިވެރިކަމުގެ ސްކީމުތަކުގެ ދަށުން ގޯއްޗާއި ފްލެޓު ދޫކުރުމެވެ.

މި ސަރުކާރުން މިފަދަ ޕޯޓަލްއެއް ތައްޔާރު ކުރާނެ ބަޔަކު ހޯދުމަށް މިއަދު އިޢުލާނުކޮށްފައިވާ އިރު ވޭތުވެ ދިޔަ ސަރުކާރުން ހިންގި 'ބިންވެރިޔާ' އަދި 'ގެދޮރުވެރިޔާ' ސްކީމަށް ފޯމު ހުށަހެޅުން ކުރިއަށް ގެންގޮސްފައި ވަނީ ވެސް 'ގެދޮރުވެރިން'ގެ ނަމުގައި ގާއިމްކުރި އޮންލައިން ޕޯޓަލެއް މެދުވެރިކޮށެވެ.

ނަމަވެސް މި ޕޯރޓަލު މެދުވެރިކޮށް އޭރުގެ ސަރުކާރުން ވަކި ބަޔަކަށް ފަހިވާ ގޮތައް ކަންތައްތަކެއް ކޮށްފައިވާކަމުގެ ތުހުމަތުތައް އޭރުގެ ހައުސް މިނިސްޓަރީގެ އިސްފަރާތްތަކަށް ވަނީ ކުރެވިފައެވެ. ނަމަވެސް އެފަރާތްތަކުން ވަނީ އެހުރިހާ ތުހުމަތުތަކެއް ދޮގުކޮށްފައެވެ.

މިސަރުކާރުގެ އެންމެ މުހިއްމު ވަޢުދެއްގެ ގޮތުގައި ބޯހިޔާވަހިކަން ހިމެނޭއިރު މިފަދަ ޕޯޓަލެއްގެ މުހިއްމުކަން ވަރަށް ބޮޑުކަމަށް ގިނަފަރާތްތަކަކުން ޤަބޫލުކުރެއެވެ.