މާލޭގެ މޭޔަރު ހޮވަން މިދިޔަ ހޮނިހިރު ދުވަހު ބޭއްވި ބައި އިލެކްޝަން ކާމިޔާބު ކުރެއްވި، އާދަމް އާޒިމް ސިޓީކައުންސިލަށް ވަޑައިގެން އެތަނުގެ އިދާރީ އިސްބޭފުޅުންނާ މިއަދު ބައްދަލުކުރައްވައިފި އެވެ.

މި ބައްދަލުވުމާއި ގުޅޭގޮތުން މާލޭ ސިޓީކައުންސިލުން ބުނީ މާލޭގެ އިންތިހާބީ މޭޔަރު އާދަމް އާޒިމް ކައުންސިލްގެ މެނޭޖްމަންޓާއި އެކު ބޭއްވި މި ބައްދަލުވުމުގައި މަޝްވަރާ ކުރެވިފައިވަނީ ކައުންސިލުން މިހާރު ކުރަމުން އަންނަ މަސައްކަތްތަކާ ބެހޭ ގޮތުންނާއި،  ކައުންސިލްގެ އިދާރީ ހިންގުމާ ގުޅޭ ގޮތުން ހުރި ބައެއް މައްސަލަތަކަށް ގުޅޭގޮތުން ކަމަށެވެ. 

އާދަމް އާޒިމް މާލޭ މޭޔަރުކަން ކާމިޔާބު ކުރައްވާފައި ވަނީ، މިދިޔަ ހޮނިހިރު ދުވަހު ބޭއްވި ބައި އިލެކްޝަންގައި ޕީއެންސީގެ ކެންޑިޑޭޓް އައިޝަތު އާޒިމާ ޝަކޫރާ ވާދަކުރައްވައިގެންނެވެ. އެ އިންތިހާބުގައި ޖުމުލަ 5 ބޭފުލަކު ވާދަކުރައްވާފައި ވެއެވެ، 

މިދިޔަ ހޮނިހިރުދުވަހު މާލޭގައި ބޭއްވުނު ބައި އިލެކްޝަންގެ ވޯޓްލުން ވެގެން ގޮސްފައިވަނީ މާލޭގެ ތާރީޙްގައިވެސް އެންމެ މަދު އަދަދަކަށް ވޯޓްލާން މީހުން ނިކުތް އިންތިހާބު ކަމަށެވެ.

 އިންތިހާބުގައި ވޯޓުލުމުގެ ހައްގު 54،680 މީހަކަށް ލިބޭ ނަމަވެސް ވޯޓުލުމުގެ ވަގުތު ހަމަވިއިރު ވޯޓުލާފައި ވަނީ އެންމެ 17،000 އެއްހާ މީހުން ކަމަށް އިލެކްޝަންސް ކޮމިޝަނުން ވަނީ ބުނެފަ އެވެ. މިއީ ވޯޓް ލުމުގެ ހައްޤު ލިބިގެންވާ މީހުންގެ އެންމެ 32 އިންސައްތަ މީހުންނެވެ.