ދުނިޔޭގެ ތަފާތު ޤައުމުތަކުގެ ހަނގުރާމައިގެ އެކި ސަރަހައްދުތަކުގައި 100 އަށް ވުރެ ގިނަ ދިވެހިން ހަރަކާތްތެރިވަމުން އަންނަ ކަމަށް ހޯމްލޭންޑް ސެކިއުރިޓީ މިނިސްޓަރު އަލީ އިހުސާން ވިދާޅު ވެއްޖެއެވެ.

މިނިސްޓަރ މިފަދައިން ވިދާޅުވެފައި ވަނީ ސޫރިޔާ-ތުރުކީ ބޯޑަރުގައި ހާލުގައި ޖެހިފައިވާ 21 ދިވެހިން ރާއްޖެ ގެނައުމާއި ގުޅޭ މަޢުލޫމާތު ދެއްވުމަށް މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުންނެވެ.

" ދިވެހިންކަމަށް ބެލެވޭ 100 އަށް ވުރެ ގިނަ މީހުން އަދި ބޭރުގެ އެކިއެކި ދިމަ ދިމާގައި ތިބިކަމުގެ މަޢުލޫމާތު އަޅުގަނޑުމެންނަށް އަންނަނީ ލިބެމުން، އެމައުލޫމާތު ކަށަވަރު ކުރުމާއި އަދި ހަމަ މިހާރު މިގެންދިޔަ ޕްރޮސެސްގައި އެ ބައެއް ބޭފުޅުންނަށް ލިބިވަޑައިގެންފައި ތިބި ދަރިން އެއީ ދިވެހިންކަށް ކަށަވަރު ކުރުމާއި، މި ކަންތައްތައް މިހާރުވެސް އަޅުގަނޑުމެން ކުރިއަށް އެބަ ގެންދަން" ނޫސްވެރިއެއްގެ ސުވާލަށް ޖަވާބު ދެއްވަމުން މިނިސްޓަރ ވިދާޅުވިއެވެ.

މިނިސްޓަރ އިތުރަށް ވިދާޅުވީ މި 100 މީހުންގެ ތެރެއިން ގިނަބަޔަކު އަންނަށް ބޭނުންވެފައިވާ ކަމަށެވެ.

"އެ 90 މީހުން އެނބުރި ރާއްޖެ އަށް އެނބުރި އަންނަން ބޭނުންވޭ،" އިހުސާން ވިދާޅުވި އެވެ.

މިއަދު ރާއްޖެ މި ގެނެވުނު 21 ދިވެހިންނާއި ގުޅޭގޮތުން މިނިސްޓަރ ވިދާޅުވީ އެ މީހުން ރާއްޖެ ގެނައީ ތުރުކީ/ ސީރިއާ ބޯޑަރުގައި ހާލުގައި ޖެހިފައިވާ ކަމުގެ ރިޕޯޓް ސަރުކާރަށް ލިބިގެން ކަމަށާއި 2022ގެ ޖޫން މަހުން ފެށިގެން ސަރުކާރުން ދިޔައީ އެ މީހުން އަނބުރާ ގެނައުމުގެ މަސައްކަތް ކުރަމުން ކަމަށެވެ.

އޭގެ ފަހުން ފުލުހުން އެކި ފަހަރުމަތިން އެ މީހުންނާ ބައްދަލުކޮށްފައިވާ ކަމަށާއި އެ މީހުން އަނބުރާ ރާއްޖެ ގެނައުމުގެ ކުރިން ދިވެހިންކަން ޔަގީން ކުރަން ޑީއެންއޭ ޓެސްޓް ވެސް ހަދާފައިވާ ކަމަށެވެ.