މި ހިނގާ ޖެނުއަރީ މަހު މިހާތަނަށް 19 މީހަކަށް އިންފްލުއެންޒާ ޖެހި އެ ބަލީގައި އެކަކު މަރުވެފައިވާ ކަމަށް އެޗްޕީއޭ އިން ބުނެފި އެވެ.

އެޗްޕީއޭ ގެ ތަފާސް ހިސާބުތައް ދައްކާ ގޮތުން މިދިޔަ 4 މަސް ތެރޭގައި އިންފްލުއެންޒާގެ ބަލިޖެހިފައިވާ 154 ފަރާތެއް ރާއްޖެ އިން ފެނިފައިވެ އެވެ. ރާއްޖެ އިން އެންމެ ގިނައިން ފެނުނީ އިންފްލުއެންޒާ އޭގެ H1N1 އެވެ.

އިންދިރާ ގާނދީ މެމޯރިއަލް ހޮސްޕިޓަލް އައިޖީއެމްއެޗުގެ އެތެރެހަށީގެ ޑރ. މުހައްމަދު އަލީ އެކްސްގައި މީގެ ދެ ދުވަސް ކުރިން ކުރެއްވި ޕޯސްޓެއްގައި ވިދާޅުވީ، އިންފްލުއެންޒާ ޖެހުމުގެ ސަބަބުން ނިއުމޯނިއާ އަށް ހުށަހެޅުނު ތިން މީހަކަށް ވެންޓިލޭޓަރުގައި މިހާރު ފަރުވާ ދެމުން އަންނަ ކަމަށެވެ.

އެކަމާއި ގުޅިގެން އެޗްޕީއޭ އިން ބުނީ މި ދުވަސްވަރު ރާއްޖޭގައި އިންފްލުއެންޒާ ފެތުރޭ ވަރު އިތުރުވީ ސަރަހައްދީ ގައުމުތަކުގައި ވެސް އިންފްލުއެންޒާ އަދި ކޮވިޑް ފަދަ އަރިދަފުސް ރޯގާތައް އިތުރު ދުވަސް ވަރަކަށް ވެފައި ސްކޫލް ބަންދާ ދިމާކޮށް، ދަތުރުފަތުރު ކުރުން އިތުރުވާމާ ގުޅިގެން ކަމަށެވެ.

އިންފްލުއެންޒާގެ އަލާމާތްތަކަކީ ހުން އައުމާއި، ނޭފަތުން ފެން އައުމާއި، ގައިން ވަރު ދެރަވުމާއި، ބޮލުގައި ރިއްސައި ގައިގަ އާއި ކަރުގައި ރިއްސުމާއި އަދި ކެއްސުމެވެ. ތިން ދުވަސް ވަސްދެން އެ އަލާމާތްތައް ފެންނަ ނަމަ ވީހާ ވެސް އަވަހަކަށް ޑޮކްޓަރަށް ދެއްކުމަށް ކަމާއި ބެހޭ ފަރާތްތަކުން އިރުޝާދު ދެއްވައެވެ.

އެޗްވަންއެންވަން ރޯގާ އާންމުކޮށް ފެތުރެނީ ބަލިޖެހިފައިވާ މީހުން ކިނބިހި އެޅުމާއި ކެއްސުމުގެ ތެރެއިން ޖަރާސީމު ބޭރުވެ އެހެން މީހެއްގެ ހަށިގަނޑަށް ޖަރާސީމު ވަނުމުންނެވެ. އަދި އެފަދަ ޖަރާސީމެއް ހުރި ތަނަކު އަތްލެވިއްޖެ ނަމަވެސް އެ ޖަރާސީމެއް ހަށިގަނޑުގެ ތެރެއަށް އެތެރެވުމުގެ ފުރުސަތު ލިބިއްޖެނަމަ އެޗްވަންއެންވަން ޖެހުމުގެ ފުރުސަތު އޮވެއެވެ.