ރައީސް ޑރ. މުއްމަދު މުއިއްޒުގެ ހަފްތާ 14 ގައި ހިމެނޭ، ވާޓިކަލް ފާމިން ޕައިލެޓް ކުރުމުގެ މަޝްރޫޢެއް ފަށަން އެއްބަސްވުމެއްގައި ސޮއި ކޮށްފިއެވެ.

މިކަން ހާމަކޮށްފައިވަނީ މިނިސްޓްރީ އޮފް އެގްރިކަލްޗަރ އެންޑް އެނިމަލް ވެލްފެއަރގެ ފަރާތުން މިއަދު ނެރުނު ނޫސް ބަޔާނެއްގައެވެ.

މި ޕައިލެޓް ޕްރޮޖެކްޓެއް ހިންގުމުގެ އެއްބަސްވުން ގާއިމްކޮށްފައިވަނީ މިނިސްޓްރީ އޮފް އެގްރިކަލްޗާރ އެންޑް އެނިމަލް ވެލްފެއާއި ވީސީ ގްރޫޕް ޕްރައިވެޓް ލިމިޓެޑާއި ދެމެދުއެވެ.

Advertisement

މިއަދު މި ފެށުނު ޕްއިލެޓް ޕްރޮޖެކުޓުގެ ދަށުން ހަނިމާދޫ އެގްރިކަލްޗާރ ސެންޓަރުގައި ތިން ވައްތަރެއްގެ ވާރޓިކަލް ހައިޑްރޮޕޯނިކްސް ސެޓަޕެއް ގާއިމްކުރެވޭނެއެވެ. އޭގެތެރޭގައި ހިމެނެނީ މިހާރުވެސް ރާއްޖޭގެ ދަނޑުވެރިންނަށް ތަޢަރަފްކޮށްދީފައިވާ ނިއުޓްރިއެންޓް ފިލްމު ޓެކްނިކް ބޭނުންކޮށްގެން ވާޓިކަލް އޭ ފްރޭމް ސްޓްރަކްޗާރގައި ގަސް ހައްދާ ނިޒާމު ޕައިލެޓްކުރުމާއި ޕައިން އެޕަލް ޓަވަރ ސިސްޓަމް އަދި އޭރޯޕޯނިކްސް ޓަވާރ ސިސްޓަމްތަކުގެ ޕައިލެޓް ޓެސްޓުކުރުންތަކެވެ.

މިނިސްޓްރީން މަޢުލޫމާތުދެއްވާފައިވާ ގޮތުގައި މި ސިސްޓަމްތަކުގައި އެންމެ ފުރަތަމަ ޓެސްޓުކުރުމަށް ހަމަޖެހިފައި ވަނީ އެކި ބާވަތުގެ ފަތާއި ތަރުކާރީ އާއި ތަފާތު ހާބްސްގެ ބާވަތްތަކެވެ.

މިއަދު ސޮއިކުރެވުނު މި އެއްބަސްވުމުގައި މިނިސްޓްރީގެ ފަރާތުން ސޮއިކޮށްފައި ވަނީ ފައިނޭންސް އެގްޒެކެޓިވް ފާތިމަތު ޝާއިއާއެވެ. އަދި ވީސީ ގްރޫޕްގެ ފަރާތުން ސޮއިކޮށްފައި ވަނީ އެކުންފުނީގެ މެނޭޖިންގ ޑިރެކްޓަރ އިސްމާއިލް ރަޝީދެވެ.

އެގްރިކަލްޗަރ އެންޑް އެނިމަލް ވެލްފެއަރ އިން ވިދާޅުވެފައިވާ ގޮތުގައި މިމަޝްރޫގެ ދަށުން ހަނިމާދޫ އެގްރިކަލްޗާރ ސެންޓަރުގައި މަސައްކަތްކުރާ މިނިސްޓްރީގެ ފަންނީ މުވައްޒަފުންގެ ޓީމުން އެއްކުރާ މައުލޫމާތުގެ އަލީގައި ރާއްޖެއަށް އެންމެ އެކަށީގެންވާ ވާރޓިކަލް ސިސްޓަމްތައް ދެނެގަނެ އެސިސްޓަމްތައް ދަނޑުވެރިންނަށް ތައާރަފްކޮށްދިނުމުގެ މަސައްކަތް އެ ވުޒާރާއިން ކުރިއަށްހުރި ޕްރޮޖެކްޓްތަކުގައި ހިމަނައިގެން ކުރިއަށް ގެންދިއުމަށް ނިންމާފައިވާކަމަށެވެ.

މިނިސްޓްރީގެ ފަރާތުން އަންނަނީ ރާއްޖޭގެ ދަނޑުވެރިކަން ކުރިއެރުވެން ހުރި ދާޢިރާތައްބަލާ މި ދާޢިރާ ކުރިއެރުވުމަށް ނުހަނު ގިނަގުނަ މަސައްކަތްތަކެއް ކުރަމުންނެވެ.