ރާއްޖޭގައި އިސްރައްވެހިންނަށް ޚިދުމަތްދިނުމުގެ ފަންނު ނުވަތަ ތަޢުލީމު އުނގެނުން ތަޢާރަފްކުރެއްވުމަށް މަސައްކަތް ކުރައްވާނެކަމަށް ޞިއްޙަތާ ބެހޭ ވަޒީރު ޑރ.ޢަބްދުﷲ ޚަލީލު ވިދާޅުވެއްޖެއެވެ.
މިނިސްޓަރ ޚަލީލު މިފަދައިން ވިދާޅުވީ އިސްރަށްވެހިންނަށް ޚާއްސަ ކްލިނިކަކާއި، އެފަރާތްތަކުން ހޮސްޕިޓަލަށް އައުމުގެ ބަދަލުގައި ގޭގައި ތިބެގެން މެމޯ ހެއްދުމުގެ ޚިދުމަތް ރަސްމީކޮށް ތަޢާރަފްކުރުމަށް މިއަދު އައޖީއެމްއެޗުގައި ބޭއްވެވި ރަސްމިއްޔާތުގައި ވާހަކަފުޅު ދައްކަވަމުންނެވެ.
"އަޅުގަނޑުމެން ޓީމުގެ ފަރާތުން މިހާރު ތައްޔާރުވަނީ ރާއްޖޭގެ ޤައުމީ ޔުނިވަރިސޓީ އާއި ވާހަކަދައްކައިގެން އެ ޔުނިވަރސިޓީ ތެރޭގައިވެސް ކިޔަވައިދޭ ކިޔެވުމުގައި އޭގެ ޚާއްސަ މޮޑިއުލްތަކެއް ތައްޔާރުކުރުމުގެ މަސައްކަތް އިރާދަކުރެއްވިއްޔާ އަޅުގަނޑުމެންގެ ޓީމުން ފަށައިގެން ކުރިއަށްގެންދަވާ. އެހެންވީމާ މިކަން ފުޅާކޮށް ފެށިގެންދާއިރުގައި ރާއްޖޭގައި ޖެނެޓިކް ކެއަރ ނުވަތަ ދުވަސްވީ ބޭފުޅުންނަށް ޚިދުމަތްދިނުމުގެ ފަންނު ނުވަތަ ތަޢުލީމު އުނގެނުން އިރާދަކުރެއްވިއްޔާ ތަޢާރަފްކުރެވި ކުރިއަށްދާނެ."
ޞިއްޙަތާ ބެހޭ ވަޒީރު ޚަލީލް ވިދާޅުވިއެވެ.
މިއަދުގެ މިރަސްމިއްޔާތުގައި ވާހަކަދައްކަވަމުން ޞިއްޙަތާ ބެހޭ ވަޒީރު ޑރ.ޢަބްދުﷲ ޚަލީލު ވިދާޅުވީ އިސްރަށްވެހީންނަށް ޚާއްސަކޮށް ޞިއްޙީ ޚިދުމަތް ފޯރުކޮށްދޭ ކްލިނިކަކާއި ގޭގައި ތިބެގެން މެމޯ ހެއްދޭނެ މަގުފަހިވެގެން ދިއުމަކީ ޒަމާންތަކެއް ވަންދެން އެފަރާތްތަކުން ކުރަމުން އައި އުންމީދުތައް ހަގީގަތަކަށް ވެގެން ދިއުން ކަމަށެވެ. ވަޒީރު ޚަލީލް ވިދާޅުވީ މިކްލިނިކުން އުމުރުން ދުވަސްވީ ފަރާތްތަކަށް ޚާއްސަ ސަމާލުކަމެއް ދީގެން ޞިއްޙީ ޚިދުމަތް ދިނުން ކުރިއަށް ގެންދަވާނެކަމަށެވެ.
ޞިއްޙަތާ ބެހޭ ވަޒީރު އިތުރަށް ވިދާޅުވި ގޮތުގައި އައިޖީއެމްއެޗުގައި ފެށި މިކްލިނިކްގެ ޚިދުމަތް، ރާއްޖޭގެ ހުރިހާ އަތޮޅަކަށް ފުޅާކުރެއްވުމަކީ ރައީސުލްޖުމްހޫރިއްޔާގެ ޑރ. މުހައްމަދު މުއިއްޒުގެ މުހިންމު ވަޢުދުފުޅެއް ކަމަށް ހާމަކުރައްވަމުން ވަޒީރު ވިދާޅުވީ މިޚިދުމަތް ރާއްޖޭގެ ހުރިހާ އަތޮޅަކަށް ފުޅާކުރުމުގެ މަސައްކަތް ރައީސްޖުމްހޫރިއްޔާ ކަނޑައަޅުއްވާ ގޮތެއްގެ މަތިން ޞިއްޙީ ވުޒާރާއިން ކުރިއަށް ގެންދަވާނެކަމަށާއި ، އަދި މިޚިދުމަތް ފުޅާކުރެއްވުމުގެ ގޮތުން އަވަށްޓެރި އެހެން ޤައުމުތަކާއި ވާހަކަދައްކަވަމުން އަންނަކަމަށެވެ.
އިސްރަށްވެހިންނަށް ޚާއްސަ ކްލިނިކަކާއި އެފަރާތްތަކުން ހޮސްޕިޓަލަށް އައުމުގެ ބަދަލުގައި ގޭގައި ތިބެގެން މެމޯ ހެއްދުމުގެ ޚިދުމަތް ރަސްމީކޮށް އިފްތިތާޙްކޮށްދެއްވީ ޞިއްޙަތާ ބެހޭ ވަޒީރު ޑރ.ޢަބްދުﷲ ޚަލީލެވެ.
Advertisement
This content is created and paid for by advertisers and does not involve Voice Journalists
