ކޮންމެ އަތޮޅެއްގައި އެ އަތޮޅެއް ވަކިން އޮޑިޓު ކުރެވޭނެ އިންތިޒާމް ހަމަޖެއްސުމަށް މަސައްކަތް ކުރައްވަމުން ގެންދަވާކަމަށް ސިޓީތަކާއި އިދާރީ ދާއިރާތައް ހިންގުމާއި، ޢާންމު މަސައްކަތްތަކާ ބެހޭ ވަޒީރު އަލްފާޟިލް އާދަމް ޝަރީފް ޢުމަރު ވިދާޅުވެއްޖެއެވެ.
އިއްޔެ ބޭއްވި އެ ވުޒާރާގެ ނޫސްވެރިންގެ ބައްދަލުވުމެއްގައި ވާހަކަދައްކަވަމުން ވަޒީރު އާދަމް ޝަރީފް ޢުމަރު ވިދާޅުވީ ރަށާއި، އަތޮޅާއި، ސިޓީ ކައުންސިލްތަކަކީ މާލިއްޔަތުގެ ޤާނޫނާއި ޤަވާޢިދުތަކަށް އެއްގޮތްވާގޮތަށް، ރައްޔިތުން އިތުބާރުކުރާ ތަނަކަށް ހެދުމަކީ ވުޒާރާގެ އަމާޒެއް ކަމަށާއި، އެގޮތުން، ކައުންސިލްތަކުގެ އިންޓާނަލް އޮޑިޓިންގެ މަސައްކަތްތައް ހަރުދަނާކުރުމަށް ނިންމާފައިވާ ކަމަށެވެ.
އެގޮތުން މިހާތަނަށް އައިރު، ކޮންމެވެސް ވަރަކަށް އޮޑިޓުގެ މަސައްކަތް ކުރެވޭ ފެންވަރަށް އަތޮޅުތެރޭގައި މީހުން ތަމްރީނު ކުރައްވާފައިވާކަމަށްވެސް މިނިސްތަރ ވިދާޅުވިއެވެ.
މިނިސްޓަ ވިދާޅުވީ އެ މިނިސްޓަރީގެ އަމާޒަކީ މިތަމްރީން ޕްރޮގުރާމުގެ ތެރެއިން ކޮންމެ އަތޮޅެއްގައިވެސް އޮޑިޓަރުންގެ ގުރޫޕެއް ނުވަތަ ޔުނިޓެއް ޤާއިމްކޮށް، އެ އަތޮޅެއްގެ އޮޑިޓު ޔުނިޓުން، އަތޮޅަށް ނިސްބަތްވާ ކައުންސިލްތަކުގެ އޮޑިޓުގެ މަސައްކަތް ކުރައްވާނެ ގޮތް ޤާއިމު ކުރުމެވެ.
"އަތޮޅުތަކުގައި، ކައުންސިލްތައް އޮޑިޓު ކުރާނެ ރަނގަޅު ބޭފުޅުންތަކެއް އުފައްދާ، ކޮންމެ އަތޮޅެއްގައި އޮޑިޓު ކުރެވޭނެ އިންތިޒާމް ހަމަޖެއްސުން. އެ މަސައްކަތް މީގެ ކުރިންވެސް ކުރެވިފައިވޭ، އަދި އިތުރު އޮޑިޓަރުން އުފެއްދުމުގެ މަސައްކަތްވެސް އަޅުގަނޑުމެން ކުރިއަށް ގެންދާނަން." މިނިސްޓަރ އާދަމް ޝަރީފް ވިދާޅުވިއެވެ.
މިނިސްޓަރ މިފަދައިން ވިދާޅުވެފައިވާ އިރު މިސަރުކާރު ވެރިކަމަށް އަންނަށްވެގެން ވީ މުހިއްމު އެއް ވަޢުދަކީ ހުރިހާ މާނައެއްގައިވެސް ކައުންސިލްތައް ހިންގުމުގެ ބާރު ކައުންސިލްތަކަށް ދޫކޮށްލައްވާނެކަމަށް ވެލެއްވި ވަޢުދެވެ.
އެ ނޫސްވެރިންގެ ބައްދަލުވުމުގައި މިނިސްޓަރ ވިދާޅުވީ މިއަދާއި ހަމައަށްވެސް ކައުންސިލްތަކުގެ އޮޑިޓުތައް ހަދަނީ އޮޑިޓު އޮފީހުންކަމަށާއި، ރާއްޖޭގައި 200 އަށްވުރެ ގިނަ ކައުންސިލްތައް ހުންނައިރު، ކޮންމެ ކައުންސިލެއްގެ އޮޑިޓު ރިޕޯޓު ހެދުމަށް، އޮޑިޓު އޮފީހަށް ދަތިވާނެކަމަށެވެ.
Advertisement
This content is created and paid for by advertisers and does not involve Voice Journalists
