3 ޑިސެންބަރު 2023 ވަނަ ދުވަހުގެ ހެނދުނު 9:28 ހާއިރު އދ. ދިގުރަށުގެ ކުނި ގޮނޑުން މަރުވެފައި އޮއްވާ ފެނިފައިވާ ކުއްޖާގެ މަންމަ، އެކުއްޖާއާމެދު ކަން ކުރިގޮތް ޕީޖީ އޮފީހުން ކިޔައިދީފިއެވެ. 

މަރާލާފައި ކުނި ގޮނޑަށް ކުއްޖާ އެއްލާލާފައި ވަނީ ސްރީލަންކާ ރައްޔިތެއްކަމަށްވާ ހިރަންޏާ ކުމުދުމާލި ޑި އަލްވިސްއެވެ. 

ޕީޖީ އޮފީހުން ބުނެފައިވާ ގޮތުގައި ހިރަންޏާ ކުމުދުމާލި ޑި އަލްވިސް، ބަލިވެ އިނުމުން އޭނާ އުޅެފައިވަނީ އެކަން ސިއްރުކޮށްގެންނެވެ.

އަދި، އޭނާ އެ ކުއްޖާ ވިހާފައިވަނީ 01 ޑިސެންބަރު 2023 ދުވަހުގެ 22:00 އާއި 03 ޑިސެންބަރު 2023 ދުވަހުގެ 05:00 އާ ދެމެދުގެ ވަގުތެއްގައި ކަމަށާ، ކުއްޖާ ވިހެއީ އދ. ދިގުރަށު ގެއެއްގެ ކޮޓަރިއެއްގައި ހުންނަ ފާހާނައިގެ ތެރޭގައި ފާހާނާތަށި ތެރެއަށް ކަމަށް ޕީޖީ އޮފީހުން ބުނެފައިވެއެވެ. 

އަދި ފާހާނާ ތަށްޓަށް ކުއްޖާ ވިހެއުމަށްފަހު، ފާހާނާތަށި ތެރެއިން ކުއްޖާ ނަގައި, ކޮތަޅުތަކަކަށް ލައިގެން ގެންގޮސް، 03 ޑިސެންބަރު 2023 ދުވަހުގެ 05:31 އެހައިކަށްހައިއިރު، އދ.ދިގުރަށް ފަރީދީ މަގަށްވާގޮތަށް ހަދާފައި ހުންނަ ފަން ކޮށިގަނޑުގެ ބޭރުގައި ހުރި ކުނިވާ ބާވަތުގެ ކުނި އެޅުމަށް ހާއްސަ ކޮށްފައިވާ ފެހި ޑަސްބިނަށް ކުއްޖާގެ ހަށިގަނޑު އެއްލާލައި، ކުއްޖާގެ ފުރާނައަށް ގެއްލުންވާނެހެން ކުއްޖާއާމެދު ޢަމަލުކޮށް ކުއްޖާ މަރާލާފައިވާ ކަމަށް އެ އޮފީހުން ބުނެފައިވެއެވެ. 

ދަރިފުޅާއިމެދު މިފަދައިން ކަން ކޮށް، ދަރިފުޅު މަރާލުމުން ޕީޖީ އޮފީހުން އޭނާގެ މައްޗަށް 3 ދައުވާއެއް ކުރަން 16 ޖަނަވަރީ 2024 ދުވަހު ކްރިމިނަލް ކޯޓަށް ހުށަހަޅައިފައިވާ ކަމަށް އެ އޮފީހުން ބުނެފައިވެއެވެ. 

އެއީ؛

1. އެނގިހުރެ މީހަކު މެރުމުގެ ކުށުގެ ދަޢުވާ.

އަދަބު: 10 އަހަރާއި 25 އަހަރާ ދެމެދުގެ މުއްދަތަކަށް ޖަލުގައި ބަންދުކުރުން. 

2. ކުޑަކުއްޖަކަށް ރައްކާތެރިކަން ފޯރުކޮށްދިނުމުގެ ޒިންމާ އޮތް ފަރާތެއް ކަމުގައިވެ ހުރެ، އެ ކުއްޖާގެ ޞިއްޙަތަށް އުނިކަން އަތުވެދާނެ ފަދަ ޢަމަލެއް ޤަޞްދުގައި ހިންގުމުގެ ކުށުގެ ދަޢުވާ.

އަދަބު: 3 އަހަރަށް ޖަލަށް ލުން. 

3. އެނގިހުރެ މަރެއް ފޮރުވުމުގެ ކުށުގެ ދަޢުވާ.

އަސާސީ އަދަބު: 9 މަހާއި 18 ދުވަހަށް ޖަލުގައި ބަންދުކުރުން.

މި ދައުވާތައް ސާބިތުވެއްޖެ ނަމަ ގާތްގަނޑަކަށް 28 އަހަރުގެ ޖަލު ހުކުމެއް އޭނާ އަށް އަންނާނެއެވެ.