މާލޭސިޓީކައުންސިލުން ހިންގަމުން ގެންދާ އަދި ހިންގުމަށް ރާއްވަވާފައިވާ ބޮޑެތި ބިޔަ މަޝްރޫއުތަކެއް އަވަސްކުރުމަށްޓަކައި އެމަސައްކަތްތަކާއި ގުޅޭ މިނިސްޓްރީ އާއި ހަވާލުކުރުމަށް މާލެ ސިޓީ ކައުންސިލުގެ މިއަދުގެ ބައްދަލުވުމުން ފާސްކޮށްފިއެވެ.
އެގޮތުން މިއަދު ބޭއްވުނު ކައުންސިލް ބައްދަލުވުމުގައި ނިންމާފައިވަނީ އެ ކައުންސިލުން ހިންގަމުން އަންނަ ބޮޑެތި މަޝްރޫއުތަކެއް ކޮންސްޓްރަކްޝަން އެންޑް އިންފްރާންސްޓްރަކްޗާ މިނިސްޓްރީ އާއި ހަވާލުކުރުމަށެވެ.
މާލޭ ސިޓީ ކައުންސިލްގެ މިއަދުގެ ބައްދަލުވުމުގެ އެޖެންޑާގައި އޮތީ ސިޓީ ކައުންސިލުން ފަށަން ހަމަޖައްސާފައިވާ ޕްރޮޖެކްޓްތަކުގެ އަޕްޑޭޓް ހިއްސާކުރުމާއި ބައެއް ހުށަހެޅުންތަކަށް މަޝްވަރާ ކުރުމަށް ފަހު ގޮތެއް ނިންމުމެވެ.
މިއަދު އެކައުންސިލުން ބޭއްވި މި ޙާއްޞަ ބައްދަލުވުމުގައި ކުރިން އެ ޕްރޮޖެކްޓްތަކުގައި ކައުންސިލްގެ ފަރާތުން އޭރު މަސައްކަތް ކުރެއްވި މުހައްމަދު ޝާހިދު ބައިވެރިވެވަޑައިގަތެވެ. އަދި ޝާހިދު ވަނީ އެ ބައްދަލުވުމުގައި ސިޓީ ކައުންސިލްގެ މަޝްރޫއުތައް ޕްލޭނިންގް މިނިސްޓްރީއާ ހަވާލުކުރަން ހުށަހަޅުއްވައިފަ އެވެ.
"އަޅުގަނޑު މި ހުށަހަޅަނީ މި ޕްރޮޖެކްޓުތަކަށް ކައުންސިލުން އެއްބަސްވެފައި ހުރި ޓާމްތަކަށް އެއްވެސް ބަދަލެއް ނުގެނެސް މި ޕްރޮޖެކްޓުތައް އަވަސްކުރުމަށްޓަކައި މިކަމާ ގުޅޭ ވުޒާރާއަށް މި ޕްރޮޖެކްޓުތައް ވަގުތީ ގޮތުން މެނޭޖްކުރުމަށް ހަވާލު ކުރުމަށް. އެ ވުޒާރާއެއްގެ ގޮތުގައި އަޅުގަނޑު މި ހުށަހަޅަނީ މިނިސްޓްރީ އޮފް އިންފްރާސްޓްރަކްޗާ،"
މިއަދުގެ ބައްދަލުވުމުގައި ޝާހިދު ވިދާޅުވި އެވެ.
މިހާރުވެރިކަން ކުރަމުންގެންދާ ޑރ.މުހައްމަދު މުއިއްޒުގެ ޕީއެންސީ/ޕީޕީއެމްގެ މެޖޯރިޓީ އޮތް ކައުންސިލުގެ އެ ހުށަހެޅުމަށް ބައްދަލުވުމުގައި ބައިވެރިވެވަޑައިގެންނެވި 10 މެމްބަރުންގެ ތެރެއިން އެންމެ މެމްބަރަކު ފިޔަވައި ހުރިހާ މެމްބަރުން ތާއީދުކުރެއްވި އެވެ. ތާއީދު ނުކުރެއްވި މެމްބަރުވެސް ވަކި ގޮތަކަށް ވޯޓެއް ނުދެއްވަ އެވެ.
މިއަދު މި ބޭއްވުނު މާލެ ސިޓީ ކައުންސިލުގެ ބައްދަލުވުމުން ފާސްކޮށްފައިވަނީ 100 މިލިއަން ރުފިޔާއަށް ވުރެ އަގު ބޮޑު ބައެއް މަޝްރޫއުތައް ސަރުކާރަށް ދިނުމަށާއި، ހަ މަސް ދުވަހުގެ ތެރޭގައި މަސައްކަތް ނުފެށިއްޖެ ނަމަ އަލުން އެ ޕްރޮޖެކްޓުތައް ކައުންސިލަށް ބަދަލުވާ ގޮތަށެވެ.
މާލެ ސިޓީކައުންސިލުން މިއަދު މިގޮތައް ނިންމި އިރު އެ ކައުންސިލުން ވަނީ ބޮޑަތި ގިނަ މަޝްރޫޢުތަކެއް ކުރިއަށް ގެންދިއުމަށް ނިންމަވާފައެވެ.
Advertisement
This content is created and paid for by advertisers and does not involve Voice Journalists
