ގއ. އަތޮޅު ހޮސްޕިޓަލުން ޚިދުމަތް ދިނުން ލަސް ކަމަށް ބުނެ، އެ ހޮސްޕިޓަލްކައިރިއަަށް މީހުންގެ އެއްވެ ހޮސްޕިޓަލުގެ ނަން ބޯޑުގެ މަތީގައި "ހެލްތް ޕޯސްޓް" ޖަހައި އިހްތިޖާޖު ކުރަން ފަށައިފިއެވެ. 

މަޢުލޫމާތު ލިބިފައިވާ ގޮތުގައި، އާއްމުން ނުކުމެ އެ ހޮސްޕިޓަލްގެ ނަން ބަދަލުކޮށް އިހްތިޖާޖު ކުރަން ފަށާފައިވަނީ، ހޮސްޕިޓަލަށް ރޭ ގެންދެވުނު ބަލި މީހަކު، އިތުރު ފަރުވާއަށް މާލެ ފޮނުވުން ލަސްވާތީއެވެ. 

އެކަމާއި ގުޅިގެން ވޮއިސް އަށް މަޢުލޫމާތު ދެއްވަމުން ސިއްހީ ވުޒާރާގެ އޮފިޝަލަކު ވިދާޅުވީ، އެ ބަލި މީހާ މާލެ ގެނައުމަށް މިނިސްޓްރީގެ ފަރާތުން ނިންމަންޖެހޭ އެންމެހައި ކަމެއް ނިމި، އިންތިޒާމްތައް ހަމަޖެހިފައިވާ ކަމަށާ، އާސަންދައިގެ ކަންކަންވެސް ނިމިފައިވާ ކަމަށެވެ. 

އަދި އޭނާ މާލެ ގެނައުން ލަސްވަނީ، ފްލައިޓެއް ޗާޓާރ ކޮށްގެން ގެންނަންޖެހޭއިރު، އެ ފްލައިޓް އެ ރަށަށް ދިޔުން ލަސްވާތީ ކަމަށްވެސް އޮފިޝަލު ވިދާޅުވި އެވެ. 

މިއާއެކު އައިލެންޑް އޭވިއޭޝަނާއި ހަވާލާދީ އޮފިޝަލް އިތުރަށް ވިދާޅުވީ، ބަލި މީހާ ބަލައި، އައިލެންޑް އޭވިއޭޝަންގެ ފްލައިޓެއް މިއަދުގެ ވަގުތެއްގައި ދާނެ ކަމަށެވެ.