ދިވެހި ރާއްޖޭގެ ރިސޯރޓުތަކުގައި ވަޒީފާ އަދާކުރާ ދިވެހި އަންހެނުންގެ އިންސައްތަ ވަރަށް މަދުކަން ފާހަގަ ކުރެއްވޭ ކަމަށް ފަތުރުވެރިކަމާއި ބެހޭ ވަޒީރު އިބްރާހިމް ފައިސަލް ވިދާޅުވެއްޖެއެވެ.

މިނިސްޓަރ ފައިސަލް މިފަދައިން ވިދާޅުވެފައިވަނީ "ފަހި ފަތުރުވެރިކަމަށް އަންހެނުން" ގެ ނަމުގައި ފަތުރުވެރިކަމުގެ ދާއިރާގައި މަސައްކަތް ކުރަމުންދާ އަންހެނުން އިތުރު ކުރުމަށް އަމާޒުކޮށް ހިންގުމަށް ހަމަޖެހިފައިވާ ހާއްސަ ޕްރޮގްރާމެއް އިފްތިތާހް ކުރުމަށް މިއަދު ބޭއްވުނު ރަސްމިއްޔާތުގައި ވާހަކަފުޅު ދައްކަވަމުންނެވެ.

މިއަދު ބޭއްވުނު މި ރަސްމިއްޔާތުގައި ވާހަކަފުޅު ދައްވަމުން ފަތުރުވެރިކަމާއި ބެހޭ ވަޒީރު އިބްރާހިމް ފައިސަލް ވިދާޅުވީ، ފަތުރުވެރިކަމުގެ ސިނާއަތަށް 50 އަހަރު ވެފައިވާއިރު، މި ސިނާއަތަކީ ވަޒީފާގެ ބާޒާރަށް އެންމެ ގިނަ ފުރުސަތު ސީދާ ގޮތުންނާއި ނުސީދާ ގޮތުން ވެސް ލިބިދޭ ސިނާއަތް ކަމަށެވެ. އަދި ޤައުމުގެ އުފެއްދުންތެރިކަމުގެ ނިސްބަތަށް ބަލާނަމަ 2022 ވަނަ އަހަރު ނިމުނުއިރު، ފަތުރުވެރިކަމާއި ފަތުރުވެރިކަމާއި ގުޅުން ހުރި ދާއިރާތަކުން ސީދާ %40 އިންސައްތަ ޖީޑީޕީއިން ހިއްސާ ކޮށްފައިވާ ކަމަށެވެ.

"ނަމަވެސް 2022 ވަނަ އަހަރު ކުރިއަށް ގެންގޮސްފައިވާ ރާއްޖޭގެ ބޯހިމެނުމުގެ ތަފާސް ހިސާބުތަކަށް ބަލާއިރު، ރާއްޖޭގެ ރިސޯޓްތަކުގައި ވަޒީފާ އަދާ ކުރާ ދިވެހި އަންހެނުންގެ އިންސައްތަ ވަރަށްވެސް މަދުކަން ފާހަގަކޮށްލަން". ވަޒީރު ވިދާޅުވިއެވެ.

މިއަދު މި ފެށުނު ޕްރޮގްރާމާއި ގުޅޭގޮތުން މިނިސްޓަރ ވިދާޅުވީ، މިއަދު އިފްތިތާހް ކުރެވޭ ޕްރޮގްރާމް ފަރުމާ ކުރެވިފައިވާނީ އަންހެނުން މި ދާއިރާއަށް ނެރެ، ދެމެހެއްޓެނިވި ގޮތަކަށް ދުރު ރާސްތާ ޕްލޭނަކާއި އެކުގައި ކަމަށާއި، އަދި މި ޕްރޮގްރާމްގެ ތެރެއިން ފަތުރުވެރިކަމުގެ ސިނާއަތުގެ އެކި ދާއިރާތަކުން (ރިސޯޓްސް، ގެސްޓްހައުސް، ހޮޓެލްސް، ޑައިވްސް ސެންޓަރ) ތަޖުރިބާކާރު މެންޓަރުންނާ އެކު އެބޭފުޅުން މަސައްކަތް ކުރާ މާހައުލުގައި ދަރިވަރުން ތިން މަސް ދުވަސް ހޭދަކޮށް އަމަލީ ތަޖުރިބާ ލިބިގެން ދާނެ ކަމަށެވެ.

"އަޅުގަނޑުމެންގެ އަމާޒަކީ މިފަދަ ޕްރޮގްރާމްތަކުގެ ބޭނުން އެންމެހާ ޒުވާނުން ހިފާ ހާއްސަ، ދިވެހި އަންހެނުން މި ދާއިރާއަށް ނުކުތުމަށް ޕްރޮގްރާމްގެ ތެރެއިން އެހީތެރިވެދީ އެދެވޭ ބަދަލެއް ގެނައުން". ފަތުރުވެރިކަމާއި ބެހޭ ވަޒީރު ފައިސަލް ވިދާޅުވިއެވެ.

ރައީސް ޑރ. މުހައްމަދު މުއިއްޒު ސަރުކާރުގެ ހަފްތާގައި 14ގެ މަގު ޗާޓުގައި ވެސް ހިމެނޭ އެއް ވައުދު ކަމަށްވާ ފަތުރުވެރިކަމުގެ ދާއިރާގައި މަސައްކަތް ކުރަމުންދާ އަންހެނުން އިތުރު ކުރުމަށް ހިންގޭ މި ޕްރޮގްރާމު ، އިފްތިތާހް ކޮށްދެއްވީ އިޤްތިޞާދީ ވަޒީރު މުހައްމަދު ސައީދެވެ.