ދިވެހިރާއްޖޭގައި ޤަވައިދާއި ޚިލާފަށް އުޅޭ ބިދޭސީންގެ ތެރެއިން ކުށަށް އަރައިގަންނަ ބިދޭސީން ވަގުތުން ޑީޕޯޓްކުރާނެ ކަމަށް ދާޚިލީ ސަލާމަތާއި ފަންނިއްޔާތާއި ބެހޭ ވަޒީރު އަލީ އިޙްސާން ވިދާޅުވެއްޖެއެވެ.

މިނިސްޓަރ މިފަދައިން ވިދާޅުވެފައިވަނީ ދައުލަތުގެ މީޑިޔާ ޕީއެސްއެމްގެ ރާއްޖެ މިއަދު ޕްރޮގްރާމުގައި ވާހަކަފުޅު ދައްކަވަމުންނެވެ.

މިނިސްޓަރ ވިދާޅުވީ ބިދޭސީންގެ މައްސަލަތަކާއި ގުޅޭ ހުރިހާ އެޖެންސީއެއް މިހާރު އެއް ވުޒާރާއެއްގެ ދަށަށް ގެނެސްފައިވާ ކަމަށާއި ޤަވައިދާ ޚިލާފަށް އުޅޭ ބިދޭސީން ހޯދުމުގެ މަސައްކަތް ސަރުކާރުން ކުރިއަށް ގެންދާ ކަމަށެވެ.

Advertisement

"އަޅުގަނޑުމެން ކުރަމުން މިދާ މަސައްކަތުގެ ތެރެއިން މިހާރު 60 އަށްވުރެ ގިނަ ބިދޭސީން، ޤަވައިދާ ޚިލާފަށް އުޅޭ ބިދޭސީން އަނބުރާ ގައުމަށް ފޮނުވާލެވުނު. އޭގެތެރޭ ބައެއް މީހުންނަކީ ކުށަށް އަރައިގަތުމާއި ގުޅިގެން ޑީޕޯޓްކުރެވުނު މީހުން. ޤަވާއިދާ ޚިލާފަށް އުޅޭ ބިދޭސީން ކުށަކަށް އަރައިގެންފި ނަމަ ވަގުތުން ޑީޕޯޓް ކުރެވޭނެ." މިނިސްޓަރ ވިދާޅުވެފައިވެއެވެ.

ޒަމާނުންސުރެ ރާއްޖޭގައި ޤާވާޢިދާއި ޚިލާފަށް އުޅޭ ބިދޭސީންގެ މައްސަލައަކީ ބޮޑުވެފައިވާ މައްސަލައަކަށް ވާއިރު މިނިސްޓަރ އިޙްސާން ވިދާޅުވީ ، ކައުންސިލްތަކާއި ފުލުހުން މެދުވެރިކޮށް ރާއްޖޭގައި ތިބި ބިދޭސީން ފިންގަ ޕްރިންޓް ލެވެލްއަށް ދެނެގަތުމުގެ މަސައްކަތް ކުރަމުންދާ ކަމަށާއި އެ މަސައްކަތަށް ސޮފްޓްވެއާއެއް ޑިޒައިން ކުރުމުގެ މަސައްކަތް ކުރަމުންދާ ކަމަށެވެ.

އެގޮތުން ވަޒީރު ވިދާޅުވީ އަމާޒަކީ އެއް އަހަރު ދުވަސްތެރޭގައި ރާއްޖޭގައި ތިބި ހުރިހާ ބިދޭސީންގެ ފިންގަ ޕްރިންޓް ނެގި، އެމީހުންނަކީ ޤާނޫނީ އިމުގެ ތެރެއަށް ވެއްދިފައިތިބި މީހުންކަން ކަށަވަރު ކުރުން ކަމަށެވެ.

ރާއްޖޭގެ އަތޮޅުތަކުގެ ރަށްތަކުގައިވެސް ގިނަ އަދަދެއްގެ ބިދޭސީން ދަނީ ތަފާތު މަސައްކަތްތައް ކުރުމުގައި ހަރަކާތްތެރި ވަމުންނެވެ.