ރާއްޖޭގެ އަންހެނުން ވިޔަފާރީގެ މައިދާނަށް ނެރެ ބާރުވެރިބަޔަކަށް ހެދުމަށްޓަކައި 100 މިލިއަން ރުފިޔާގެ ލޯނު އަންހެނުންނަށް ހާއްސަކޮށް ދޫކުރަން ނިންމާފައިވާ ކަމަށް އިޖުތިމާޢީ އަދި ޢާއިލީ ތަރައްޤީއާއި ބެހޭ ވަޒީރު ޑރ. އައިޝަތު ޝިހާމް ވިދާޅުވެއްޖެ އެވެ.
މިނިސްޓަރ ޑރ. އައިޝަތު ޝިހާމް މިފަދައިން ވިދާޅުވެފައި ވަނީ އަންހެން ވިޔަފާރިވެރިންގެ އުފެއްދުންތައް އެއް ތަނަކުން ލިބޭނެ މަގު ފަހިކުރުމަށް "ހިޔަލަ ވީކެންޑް މާކެޓް" ހުޅުވުމަށް ބޭއްވި ރަސްމިއްޔާތުގައި ވާހަކަފުޅު ދައްކަވަމުންނެވެ.
ރޭ ބޭއްވުނު މި ރަސްމިއްޔާތުގައި މިނިސްޓަރ ވިދާޅުވީ އަންހެނުން ގޭގައި ތިބެގެން އުފައްދާ ތަކެތި ވިއްކުމަށް މަގު ފަހިކުރުމަށް ހުޅުމާލެއިން ވަކި ތަނެއް ހާއްސަކޮށް، އެމީހުންނަށް ކުޑަ ކުލީގައި ފަސޭހަ ގޮތެއްގައި އެކަން ކުރެވޭނެ ގޮތް ހަމަޖެއްސުމަކީ ރައީސް ޑރ. މުހައްމަދު މުއިއްޒުގެ ވައުދުފުޅެއް ކަމަށެވެ.
"މިކަމުގެ މަންފާކުރާނީ ހަމައެކަނި އަންހެން ވިޔަފާރިވެރިންނަކަށް ނޫން. މިއީ އެ އާއިލާތަކަށް ވެސް ޖުމްލަ ގޮތެއްގައި މުޅި މުޖުތަމައަށް ވެސް ލިބޭ ފަހި މަގަކަށް، ކުރިމަގަކަށް އަދި ފުއްދުންތެރިކަމަކަށް އިތުރުކުރެވޭ އާ މަގަކަށް ވާނެ،"
މިނިސްޓަރު ވިދާޅުވި އެވެ.
ޑރ. އައިޝާ އިތުރަށް ވިދާޅުވި ގޮތުގައި އުފާވެރި އަބުރުވެރި ދިރިއުޅުމަކަށް ފުއްދުންތެރިކަމަކީ އެންމެ މުހިއްމު އެއް ކަންތައް ކަމަށާއި ބައިނަލްއަޤްވާމީ ރިސާރޗުތަކުން ވެސް ދައްކަނީ އާއިލާއެއްގައި ހުންނަ އަންހެނަކީ ފުއްދުންތެރި މީހަކަށް ވުމުން އެކަމުގެ އުފާވެރިކަން މުޅި އާއިލާއަށް ކުރާ ކަމަށެވެ.
އެހެންކަމާއި އެކު އަންހެނުން ބާރުވެރިކުރުމަކީ ކޮންމެހެން ކުރަން ޖެހޭ ކަމެއްގެ ގޮތުގައި ރައީސް ޑރ. މުހައްމަދު މުއިއްޒުގެ މި ސަރުކާރުން ޤަބޫލުކުރާ ކަމަށް މިނިސްޓަރ ފާހަގަ ކުރެއްވިއެވެ.
ރޭގެ މި ހަފުލާގައި ޑރ. އައިޝާ އިތުރަށް ވިދާޅުވި ގޮތުގައި އަންހެނުންނަށް ހާއްސަކުރެވިފައިވާ 100 މިލިއަން ރުފިޔާގެ ލޯނު ވަރަށް އަވަހަށް ދޫކުރަން މި ސަރުކާރުން ނިންމާފައިވާއިރު ކުދި ވިޔަފާރިތަކަށް ވެސް މާލީ އެހީ ދިނުމަށް ލޯނެއް ވަރަށް އަވަހަށް ތައާރަފު ކުރެވިގެން ދާނެ ކަމަށެވެ.
"މީގެ އިތުރުން ވެސް ފުއްދުންތެރި އަބުރުވެރި ދިރިއުޅުމެއް އުޅުމުގެ ފުރުސަތު ފަހިކޮށް ދިނުމަށްޓަކައި ރައީސުލްޖުމްހޫރިއްޔާ މުހިއްމު ދެ ވައުދެއް ފުއްދަވައިދެއްވާނެ ކަމުގެ ޔަގީންކަން އަރުވަން. މިގޮތުން އަންހެނުންނަށް ހާއްސަކުރެވިފައިވާ 100 މިލިއަން ރުފިޔާގެ ލޯނު ވަރަށް އަވަހަށް ދޫކުރަން ފަށާނެ،"
މިނިސްޓަރ ވިދާޅުވި އެވެ.
އިޖުތިމާޢީ އަދި ޢާއިލީ ތަރައްޤީއާ ބެހޭ ވަޒީރު މިގޮތަށް ވިދާޅުވެފައިވާއިރު ރައީސް ޑރ. މުހައްމަދު މުއިއްޒު ތަކުރާރުކޮށް ވިދާޅުވެފައިވަނީ މި ސަރުކާރުގެ އިސްމަޤާމުތަކުގައި އަންހެނުން ހިމެނޭ ނިސްބަތް މަތިކުރައްވާނެ ކަމަށެވެ. އެގޮތުން މިހާރުވެސް މި ސަރުކާރުގެ ބައެއް ވަޒީރުންގެ މަޤާމުގައި އަންހެން ކަނބަލުން ތިއްބެވި އިރު، ސަރުކާރު ހިއްސާވާ ކުންފުނި ތަކުގެ އެންމެ އިސްމަޤާމުތަކުގައި ވެސް އަންހެން ކަނބަލުން ހަރަކާތްތެރިވެ ލައްވަމުން ގެންދަވައެވެ.
Advertisement
This content is created and paid for by advertisers and does not involve Voice Journalists
