މޯލްޑިވިއަންގެ އުޞޫލަށް ބަދަލުގެނެވި، އިމަޖެންސީ ކޭސްއެއް އަތުވެޖެނަމަ، ފްލައިޓް ޝެޑިއުލުން އެންމެ އިސްކަމެއް ދީގެން އިމަރޖެންސީކޮށް އުފުލަންޖެހޭ ފަރާތް އުފުލާގޮތަށް ހަމަޖެހިފައިވާ ކަމަށް ޓްރާންސްޕޯޓް މިނިސްޓަރ މުހައްމަދު އަމީން ވިދާޅުވެއްޖެއެވެ.
އެމަނިކުފާނު މިފަދައިން ވިދާޅުވެފައި ވަނީ މިއަދު ކުރެއްވި އެކްސް ޕޯސްޓެއް މެދުވެރިކުރައްވައެވެ. އެޕޯސްޓުގައި މިނިސްޓަރ އަމީން ވިދާޅުވެފައި ވަނީ މިސަރުކާރުން އެންމެ އިސްކަމެއް ދީގެން ކުރިޔަށްގެންދާ އެއް ކަމަކީ، އެއަރ އެމްބިއުލާންސްގެ ޚިދުމަތް ތަޢާރަފު ކުރުން ކަމަށާއި ، އެކަމާއި ގުޅިގެން އުސޫލުތަކަށް ގެންނަށް ޖެހޭ ބަދަލުތައް ގެންނަމުންދާ ކަމަށެވެ.
" މިއަދުން ފެށިގެން މޯލްޑިވިއަންގެ އުޞޫލަށް ބަދަލުގެނެވި، އިމަޖެންސީ ކޭސްއެއް އަތުވެޖެނަމަ، ފްލައިޓް ޝެޑިއުލުން އެންމެ އިސްކަމެއް ދީގެން އިމަރޖެންސީކޮށް އުފުލަންޖެހޭ ފަރާތް އުފުލާގޮތަށް މިހާރުވަނީ ހަމަޖައްސާފައި. އަދި ހޮސްޕިޓަލަކުން އިމަރޖެންސީ ކޭސް އެއްގެ މަޢުލޫމާތު ލިބުމާއެކު މޯލްޑިވިއަންގެ އެންމެ އިސްކަމަކަށް ވާނީ، އިމަރޖެންސީގައި އުފުލަންޖެހޭ ފަރާތް އުފުލުން"
މިނިސްޓަރ އަމީންގެ ޕޯސްޓުގައި ވިދާޅުވެފައިވެއެވެ.
މީގެ އިތުރުން ރައީސުލްޖުމުހޫރިއްޔާ ޑރ. މުހައްމަދު މުއިއްޒު ވައުދުވެ ވަޑައިގެންފައިވާ ފަދައިން ރާއްޖޭއަށް އެއަރ އެމްބިއުލާންސްގެ ޚިދުމަތް ތަޢާރަފް ކުރުމުގެ މަސައްކަތް މި ސަރުކާރުން ކެނޑި ނޭޅި ކުރައްވަމުން ގެންދަވާ ކަމަށާއި އަދި އަންނަ މާރޗްމަހުގެ ފުރަތަ ދުވަހު އެއަރ އެމްބިއުލާންސްގެ ޚިދުމަތް ފެށިގެން ދާނެކަމަށް މިނިސްޓަރ އަމީން ވިދާޅުވެއްޖެއެވެ.
" މިސަރުކާރުން އެންމެ އިސްކަމެއް ދީގެން ކުރިޔަށްދާ އެއް ކަމަކީ، އެއަރ އެމްބިއުލާންސްގެ ޚިދުމަތް ތަޢާރަފު ކުރުން. މި ޚިދުމަތް ﷲ ގެ ވާގިފުޅާއެކު، 1 މާރިޗް 2024 ގައި ފެށިގެން ދާނެ! "
މިނިސްޓަރ އަމީންގެ ޕޯސްޓުގައި ވިދާޅުވެފައިވެއެވެ.
މިނިސްޓަރ މިދަފައިން ޕޯސްޓް ކުރައްވާފައިވާ އިރު ގއ.ވިލިގިލީގެ 13 އަހަރުގެ ކުއްޖަކު އަވަސް ފަރުވާއަށް މާލެ ގެނައުން ލަސްވުމުގެ ޝަކުވާތަކެއް މިދިޔަ ބުރާސްފަތި ދުވަހު ފެންމަތިވެ ވިލިގިލީގެ ރައްޔިތުންގެ ބަޔަކު ވަނީ އެރަށުގައި ހުންނަ އަތޮޅު ހޮސްޕިޓަލް ދޮށަށް އެއްވެ މުޒާހަރާވެސް ކޮށްފައެވެ.
ގއ.ވިލިގިލީގައި ހާލު ސީރިއަސްވި މި ކުޑަކުއްޖާ ބުރާސްފަތި ދުވަހު މާލެ ގެނެސް އައިޖީއެމްއެޗް ހޮސްޕިޓަލުގެ އައިސީޔޫގައި ފަރުވާ ދެމުން ދަނިކޮށް މިއަދުގެ ވަގުތެއްގައި ވަނީ ނިޔާވެފައެވެ.
Advertisement
This content is created and paid for by advertisers and does not involve Voice Journalists
