ރައީސުލް ޖުމްހޫރިއްޔާގެ ވައުދުފުޅާއި އެއްގޮތަށް ފުވައްމުލަކުސިޓީ އެއަރޕޯޓު ރަންވޭގެ އޮރިއެންޓޭޝަން ބަދަލުކޮށް ރަންވޭ ދިގުކުރުމާއި ގުޅޭގޮތުން ރީޖަނަލް އެއާޕޯޓްސް އިން ފުވައްމުލަކު ސިޓީ ކައުންސިލާއި ބައްދަލުކޮށް މައުލޫމާތު ހިއްސާކޮށްފިއެވެ. 

ފުވައްމުލަކު ސިޓީ ކައުންސިލްގެ އިދާރާ ގައި، ފުވައްމުލަކު ސިޓީ އެއަރޕޯޓުގެ ރަންވޭ ބޮޑުކުރެވެން ހުރި ގޮތްތައް ރީޖަނަލް އެއަރޕޯޓްސް ކޮމްޕެނީގެ މެނޭޖިންގ ޑައިރެކްޓަރ ފުވައްމުލަކު ސިޓީ ކައުންސިލްގެ ރައީސް އަދި މެމްބަރުންނާއި ހިއްސާކުރައްވާފައިވާ ކަމަށް އެ ކުންފުނިން ވަނީ ބުނެފަ އެވެ. 

މީގެއިތުރުން ފުވައްމުލަކު ސިޓީ އެއަރޕޯޓް ތަރައްގީގެ މާސްޓަރ ޕްލޭނާއި ބެހޭގޮތުން ވަރަށް ފުޅާދާއިރާއެއްގައި ވާހަކަ ދެކެވިފައިވާ ކަމަށް ރީޖަނަލް އެއާޕޯޓްސް އިން ބުނެފައިވެއެވެ. 

އެގޮތުން ފުވައްމުލަކު ސިޓީ އެއަރޕޯޓަށް އަންނަ ތަރައްގީގެ ތެރޭގައި ރަންވޭގެ އޮރިއެންޓޭޝަން ބަދަލުކޮށް ޖެޓް ޖެއްސޭވަރަށް ރަންވޭ ބޮޑުކުރުމާއި، ޖެޓް ޕާކިންއަށް ހާއްސަކޮށް އޭޕްރައިން ޖާގެ އިތުރު ކުރުމާއި، ޖެޓް ފިއުލް ލިބޭނެ އިންތިޒާމު ހަމަޖެއްސުމާއި، ފްލައިން ސްކޫލެއް ގާއިމް ކުރުން ހިމެނެއެވެ. 

މީގެ އިތުރުން ރީޖަނަލް އެއާޕޯޓްސް އިން ބުނީ، މި ބައްދަލުވުމުގެ ތެރެއިން ފުވައްމުލަކު ސިޓީ އެއަރޕޯޓާއި އިންވެގެން ދެކުނަށް އޮންނަ ހުސްބިމުގައި ޓުއަރިޒަމް ޒޯނެއްގާއިމް ކުރުމަށް ވާހަކަ ކުރިއަށްގެންދިއުމަށް އެއްބަސްވެފައިވާ ކަމަށެވެ.