ގުޅިފަޅާއި، ހުޅުމާލެ ފޭސް 3 ގެ ލޭންޑު ޔޫސް ޕްލޭންގެ މަސައްކަތް މިހާރު ނިމިފައިވާ ކަމށާއި އެދެތަނުގެ ލޭންޑު ޔޫސް ޕްލޭނުވެސް މި ހަފުތާގައި އާއްމުކުރާނެކަމަށް ހައުސިން މިނިސްޓްރީން ރޭ ވިދާޅު ވެއްޖެއެވެ.

މިކަން ހާމަކޮށްފައިވަނީ އަމިއްލަ ހަތަރު ޖަމިއްޔާއެއް ގުޅިގެން ބިންވެރިންގެ ސައްލާގެ ނަމުގައި ރޭ ބޭއްވި ބައްދަލުވުމުގައި ބައިވެރިވެވަޑައިގެންނެވި ހައުސިން މިނިސްޓްރީގެ ސްޓޭޓް މިނިސްޓަރު ދިލްޝާން އަބްދުاللهއެވެ.

ދިލްޝާން ވިދާޅުވީ، ހުޅުމާލެ ފޭސް 3 އާއި ގުޅީފަޅާއި ގިރާވަރުން ފުރަތަމަ ގޯތިތައް ދިން އިރު އެ ތަނުގެ ތަފުސީލީ ލޭންޑް ޔޫސް ޕްލޭނެއް ހަދާފައި ނެތް ކަމަށާއި، މިވަގުތު ކުރެވެމުން ދަނީ ގުޅީފަޅުގެ ލޭންޑު ޔޫސް ޕްލޭންގެ  10 ވަރަކަށް ޕަސެންޓުގައި މައްސަލައެއް އުޅޭތީ އެކަންކަން ރަނގަޅު ކުރުމުގެ މަސައްކަތް ކަމަށެވެ.

Advertisement

"މި ހަފުތާ ތެރޭގައި ދެ އެލްޔޫޕީ (ލޭންޑު ޔޫސް ޕްލޭން) ރައްޔިތުންނާއި ހަމައަށް ނެރެވޭ ވަރަށް މަސައްކަތް ކުރެވިފައި އޮތީ،" ރޭގެ ބައްދަލުވުމުގައި  ދިލްޝާން ވިދާޅުވި އެވެ.

ރޭގެ މި ބައްދަލުވުމުގައި ދިލްޝާން އިތުރަށް ވިދާޅުވީ  ގިރާވަރުގެ ލޭންޑް ޔޫސް ޕްލޭން ހެދުމުގެ މަސައްކަތް ކުރަމުން އަންނަނީ ގުޅީފަޅު ޕޯޓު ތިލަފުއްޓަށް ބަދަލުކުރަން އިތުރަށް ހިއްކާ ބިމާއި އިތުރަށް ގިރާވަރުން ހިއްކާ ބިން ވެސް ހިމަނައިގެން ކަމަށާއި، އަދި ގިރާވަރު ލޭންޑް ޔޫސް ޕްލޭން ހެދުމުގައި ބިންވެރިންގެ ޖަމިއްޔާތަކުގެ ހިޔާލާއި މަޝްވަރާ ހޯދާނެ ކަމުގެ ޔަގީންކަން ސަރުކާރުން ދީފައިވާ ކަމަށެވެ.

ސަލްޓަންޕާރކުގައި ރޭ ބޭއްވި ބިންވެރިންގެ މި ސައްލާ ބައްދަލުވުމަކީ ގިރާވަރު މާލެ ސިޓިޝަން އެސޯސިއޭޝަނާއި، ގުޅީފަޅު ރައްޔިތުންގެ އެސޯސިއޭޝަނާއި، މާލެ ރަށްވެހިންގެ ޖަމިއްޔާ އަދި ހުޅުމާލެ ރައްޔިތުންގެ ކޮމިޓީ ގުޅިގެން މާލޭގެ ބޯހިޔާވަހި ކަމާއި ގުޅޭ އެންމެ ފަހުގެ މަޢުލޫމާތު ރައްޔިތުންނަށް ދިނުމަށާއި މިކަމުގައި ރައްޔިތުންގެ ހުރި ކަންބޮޑުވުންތައް އަޑުއެހުމަށް ބޭއްވުނު ބައްދަލުވުމެކެވެ.