ގްރޭޓާރ މާލެ ސަރަހައްދުގައި ބުޅާ ގިނަވާ މައްސަލަ ހައްލު ކުރަން ކ.ފަރުކޮޅުފުށީގައި ޕެޓް ކެއާ ފެސިލިޓީއެއް ޤާއިމު ކުރަން ސަރުކާރުން ނިންމައިފިއެވެ.

މިކަން ހާމަކޮށްފައިވަނީ ރައީސް އޮފީހުގައި މިއަދު ބޭއްވި ޕްރެސް ކޮންފަރެންސްގައި ޕްރިންސިޕަލް ސެކްރެޓެރީ ޓު ދަ ޕްރެޒިޑެންޓް އޮން ޕަބްލިކް ޕޮލިސީ، އަބްދުﷲ ނާޒިމެވެ.

އެ ބައްދަލުވުމުގައި ނާޒިމް ވިދާޅުވީ މާލޭގެ މަގުތަކުގައި ބުޅާތައް ގިނަވުމަކީ މާލޭގެ ރައްޔިތުން ކަންބޮޑުވާ ކަމެއް ކަމަށާއި، އެކަމަށް ހައްލު ހޯދުމަށް ޕެޓް ކެއާ ފެސިލިޓީއެއް ގާއިމު ކުރުމާއި ގުޅޭ ގޮތުން ސިޓީތަކާއި އިދާރީ ދާއިރާތައް ހިންގުމާއި، އާންމު މަސައްކަތްތަކާ ބެހޭ ވުޒާރާ އިން ސޯޝަލް ކައުންސިލަށް ކަރުދާހެއް ހުށަހެޅުއްވިކަމަށެވެ.

Advertisement

"މިނިސްޓްރީ އޮފް އެގްރިކަލްޗަރަލް އެންޑް އެނިމަލް ވެލްފެއާ އާއި ގުޅިގެން މާލެ ސިޓީ ކައުންސިލާއި ދެމެދު ވެވޭ އެއްބަސްވުމެއްގެ ދަށުން މި ޕެޓް ކެއާގެ ފެސިލިޓީ ގާއިމުކޮށް ކ. ފަރުކޮޅުފުށިން ހަމަޖެހިފައިވާ ބިމުން ބައެއްގައި ކެޓް ސެންޓަރެއް ގާއިމުކޮށް އެ ތަނަށް މާލޭގެ މަގުތަކުގައި އުޅޭ ބުޅާތައް ބަދަލުކޮށް ކެޓް ޝެލްޓާގެ ހިދުމަތް އެ ތަނުގައި ގާއިމު ކުރުމަށް ވަނީ ނިންމާފައި،" ތަފްސީލް ދެއްވަމުން މިއަދުގެ ބައްދަލުވުމގައި ނާޒިމް ވިދާޅުވިއެވެ.

މާލޭގައި ބުޅާގިނަވެ އެތަކެތީގެ އުދަގޫ އާއްމުންނަށް ފޯރަމުންއަންނަ އިރު މިތަކެތި އެއްތަނަކަށް ގެންގޮސްގެން ބެލެހެއްޓުމުގެ އިންތިޒާމްތައް ހަމަޖެއްސޭތޯ ބެލުމަކީ މާލޭސިޓީ ކައުންސިލުންވެސް ކުރެވޭތޯ ބަލަމުން އައިސްފައިވާ މަސައްކަތެކެވެ.

މާލޭގައި އުޅޭ ބުޅާތައް މާލެނޫން އެހެން ސަރަހައްދަކަށް ބަދަލުކުރުމަކީ މާލޭގެ ރައްޔިތުން ނުހަނު ބޭނުންވެ އެދިއެދި ތިބި ކަމެކެވެ.