ހދ. ހަނިމާދޫ އިންޓަރނޭޝަނަލް އެއަރޕޯޓުގެ އައު ރަންވޭގެ އެއްބައި އަންނަ ހަފްތާގައި ބޭނުންކުރަން ފަށާނެކަމަށް ރީޖަނަލް އެއަރޕޯޓްސްއިން ބުނެފިއެވެ.

ތިން ބަޔަކަށް ބަހާލައިގެން ރަންވޭ ބޮޑުކުރުމުގެ މަސައްކަތް ކުރަމުން ގެންދާ ހަނިމާދޫ އިންޓަރނޭޝަނަލް އެއަރޕޯޓުގެ ރަންވޭއިން އާދިއްތަ ދުވަހު ހުޅުވާލުމަށް ހަމަޖެހިފައިވާ 1200 މީޓަރެވެ.

މިކަމާއި ގުޅޭގޮތުން މަޢުލޫމާތު ދެއްވަމުން  ރީޖަނަލް އެއަރޕޯޓްސްގެ މެނޭޖިން ޑިރެކްޓަރ އަޙްމަދު މުބީން ވިދާޅުވީ އައު ރަންވޭގެ 1200 މީޓަރު އަންނަ އާދިއްތަ ދުވަހުގެ ހެނދުނު ބޭނުންކުރަން ފަށާއިރު ރޭގަނޑުވެސް ފްލައިޓު ޖެއްސޭނެކަމަށެވެ.

Advertisement

އެމްޑީ މުބީން އިތުރަށް ވިދާޅުވީ، މިހާރު ކުރަމުންދަނީ ރަންވޭ ބޭނުންކުރަން ފެށުމަށް ވާންޖެހޭ އެންމެ ފަހުގެ ތައްޔާރީތައްކަމަށާއި، ހަނިމާދޫ އިންޓަރނޭޝަނަލް އެއަރޕޯޓްގައި ތަރައްޤީ ކުރާ އައު ރަންވޭއަކީ 2465 މީޓަރުގެ ދިގު ރަންވޭއެއެއް ކަމަށެވެ.

މި އެއާރޕޯޓްގެ ރަންވޭ ތަރައްޤީކުރުމުގެ ދެވަނަ ބައިގައި ހިމެނޭ 300 މީޓަރު ސަރަހައްދުގައި މިހާރުވަނީ ސަބްބޭސް އަޅާފައެވެ. އަދި ބާކީ އޮތް 650 މީޓަރުގެ މަސައްކަތް ކުރުމަށްޓަކައި ކުރީގެ ރަންވޭ ބަންދު ކުރާނެކަމަށާއި، މި ދެބައިގައި ތާރުއެޅުމުގެ މަސައްކަތް ކުރާނީ އެކުއެކީގައިކަމަށް ވެސް މުބީން ވިދާޅުވިއެވެ.

މުބީން އިތުރަށް ވިދާޅުވީ ރާންވޭގައި ނުނިމި އޮތްބައިގެ މަސައްކަތް ކުރިނަމަވެސް ފްލައިޓް އޮޕަރޭޝަންތަކަށް އެއްވެސް ބުރުލެއް ނާރާނެކަމަށެވެ.

މިއަންނަ އަހަރުފެށެން ވާއިރަށް ނިންމުމަށް އަމާޒު ހިފާފައިވާ މި އެއަރޕޯޓްގެ މަސައްކަތް ނިމިގެންދާއިރު ބޮއިންގ 737 އާއި A320 މަރުކާގެ ބޮޑެތި ބޯޓުފަހަރު މިރަންވޭއަށް ޖެއްސޭނެކަމަށް ރީޖަނަލް އެއަރޕޯޓްސްއިން މަޢުލޫމާތުދެއްވައެވެ. އަދި އެއާރޕޯޓުގެ މަސައްކަތް މުޅިން ނިމުމުން އެތަނުން އަހަރަކު 1.3 މިލިއަން ފަސިންޖަރުންނަށް ޚިދުމަތް ދެވޭނެއެވެ.

މި އެއާރޕޯޓްގެ އައު ރަންވޭގެ މަސައްކަތުގެ އިތުރަށް ފަސިންޖަރ ޓާރމިނަލް ޢިމާރާތާއި ޖެޓީ ޓަރމިނަލް ޢިމާރާތުގެ މަސައްކަތުގެ %29.1 އިންސައްތަ މަސައްކަތްވެސް ވަނީ ނިމިފައެވެ. މީގެ އިތުރުން ޕޭވްމަންޓާއި މަގު ހެދުމުގެ މަސައްކަތުގެ  %73.7 އިންސައްތަ އާއި ފިއުލް ފާމާއި ފިއުލް ޖެޓީ މަސައްކަތުގެ %9 އިންސައްތަ ވެސް ވަނީ ނިމިފައެވެ.

ހަނިމާދޫ އިންޓަރނޭޝަނަލް އެއަރޕޯޓް މަޝްރޫޢަކީ އަތޮޅުތަކުގައި މިހާތަނަށް ކުރިއަށްގެންދާ އެންމެ ބޮޑު އެއް މަޝްރޫޢުއެވެ. މައުލޫމާތު ލިބިފައިވާ ގޮތުގައި މި މަޝްރޫޢުގެ ޖުމުލަ އަގަކީ 136.6 މިލިއަން ޑޮލަރެވެ.