ސަރުކާރުގެ ފުރަތަމަ 14 ހަފްތާ މަގުޗާޓުގައި ހިމަނާފައިވާ އެއްމެދު ޢިމާރާތްތަކުގެ ރަޖިސްޓްރޭޝަން މަރުޙަލާ ފުރިހަމަކުރުމަށާއި އެއްމެދު ޢިމާރާތްތައް މެނޭޖްކުރުމަށް ޚާއްޞަ 'ސްޓްރާޓާ ޕޯޓަލް' ރަސްމީކޮށް ލޯންޗުކޮށްފިއެވެ.

މި ޕޯޓަލް ރަސްމީކޮށް ލޯންޗުކޮށްދެއްވީ ކުރީގެ ހައުސިންގ އެންޑް އާބަން ޑިވަލޮޕްމަންޓް މިނިސްޓަރު އިބްރާހީމް ރަފީޤެވެ.

އެއްމެދު ޢިމާރާތް ނުވަތަ "ސްޓްރާޓާ ސްކީމް" އަކީ ޢިމާރާތެއް ނުވަތަ ޢިމާރާތްތަކެއްގައި ހިމެނޭ ޔުނިޓްތައް ވަކިވަކި ފަރުދުންނަށް މިލްކުކުރެވޭގޮތަށް ހަދާފައި ވުމާއެކު އެ ޢިމާރާތް ނުވަތަ ޢިމާރާތްތަކުގައި ހިމެނޭ އާންމު ތަންތަން ހުރިހާ ޔުނިޓްތަކުގެ މިލްކުވެރިފަރާތްތަކުގެ މެދުގައި ހިއްސާވެ އެތަންތަން ހިންގައި ބެލެހެއްޓުމެވެ.

މި ޕޯޓަލް ލޯންޗްކުރުމުގެ ރަސްމިއްޔާތުގައި ވާހަކަދައްކަވަމުން ގެދޮރުވެރިކަމާއި ބިމާއި އުމްރާނީ ތަރައްޤީއާބެހޭ ވަޒީރު ޑރ. ޢަލީ ހައިދަރު އަޙްމަދު ވިދާޅުވީ، މި ޕޯޓަލާއެކު އެއްމެދު ޢިމާރާތްތައް މެނޭޖްކުރުމަށް ފަސޭހަވެގެންދާނެކަމަށާއި، ސަރުކާރުން މަސައްކަތްކުރައްވަމުން ގެންދަވަނީ މި ދާއިރާއިން ރައްޔިތުންނަށް ލުއިފަސޭހަ ގޮތްތަކެއް ހޯދައިދިނުމަށްކަމަށެވެ.

"ސަރުކާރުން މަސައްކަތް ކުރަމުން މިދަނީ ރައްޔިތުންނަށް ފަސޭހަކަމާއެކީގައި ގެދޮރުވެރިކަމާއި ޢިމާރާތްކުރުމުގައި ދިމާވާ މައްސަލަތަކަށް ބޭނުންވާ ޚިދުމަތްތައް ދިނުމުގައި ރައްޔިތުންނަށް އޭގެ ފަސޭހަކަން ލިބޭނެ ފަދަ ގޮތަކަށް ކަންތައްތައް ބައްޓަންކޮށް ކަންތައްތައް ރާވާ ހިންގުމަށް." މިނިސްޓަރ ހައިދަރު ވިދާޅުވިއެވެ

މިނިސްޓްރ ހައިދަރު އިތުރަށް ވިދާޅުވި ގޮތުގައި  "ސްޓްރާޓާ ޕޯޓަލް" އަކީ އެއްމެދު ޢިމާރާތްތައް ރަޖިސްޓްރީކުރުމާއި އެއްމެދު ޢިމާރާތްތަކަށް ނިސްބަތްވާ މެނޭޖްމަންޓް ކޯޕަރޭޝަންތައް ރަޖިސްޓަރީކޮށް ސަރުކާރުން ރެގިއުލޭޓްކުރުމަށް މަގުފަހިވެގެން ދާނެ ޕޯޓަލެއްކަމަށެވެ.

ގެދޮރުވެރިކަމާއި ބިމާއި އުމްރާނީ ތަރައްޤީއާބެހޭ ވުޒާރާއިން މައުލޫމާތު ދެއްވި ގޮތުގައި ކުރިމަގުގައި މި ޕޯޓަލް ވެގެންދާނީ ސަރުކާރުގެ އިދާރާތަކާއި އަދި އެނޫންވެސް ގުޅުންހުރި ހުރިހާ އިދާރާތަކާއި ގުޅުވާލެވިގެން އަކަމާ ގުޅުންހުރި ހުއްދަތައް ދޫކުރެވިގެންދާނެ ޕޯޓަލްއަކަށްކަމަށައި، އަދި މި ޕޯޓަލް ވެގެންދާނީ މުޅި ރާއްޖޭގެ އެއްމެދު ޢިމާރާތްތަކުގެ ހުރިހާ މައުލޫމާތުތަކެއް ރެކޯޑް ކުރެވިގެންދާނެ ޕޯޓަލަކަށް ކަމަށްކަމަށެވެ.