ރައީސުލްޖުމުހޫރިއްޔާ ޑރ. މުހައްމަދު މުއިއްޒާއި ވަޒީރުން، ކަނޑައެޅޭ ވަކި މުއްދަތުތަކެއްގެ ތެރޭގައި ރައްޔިތުންގެ ކުރިމައްޗަށް ވަޑައިގެން ކުރާ ކޮންމެ ސުވާލަކަށް ޖަވާބު ދެއްވަން ނިންމަވާފައިވާ ކަން ރައީސް މިރޭ އިއުލާން ކުރައްވައިފި އެވެ.
ރައީސް މިހެން ވިދާޅުވީ މާލޭގެ އައު މޭޔަރާއި މާލެ ސިޓީ ކައުންސިލަށް އަލަށް އިންތިޙާބުވެ ވަޑައިގެންނެވި ތިން މެންބަރުން ހުވާކުރެއްވުމަށް ދަރުބާރުގޭގައި ބޭއްވި ދަރުބާރުގައި ވާހަކަފުޅު ދައްކަވަމުންނެވެ.
ރައީސް ޑރ. މުއިއްޒު ވިދާޅުވީ، ރައްޔިތުންގެ ވޯޓުން އިންތިހާބުވެގެން އަންނަނީ ތަފާތު ކުރުމެއް ނެތި ރައްޔިތުންނާއި ގާތުން ހިދުމަތް ކުރުމަށް ކަމަށާއި، ސަރުކާރުން މަސައްކަތް ކުރާނީ އެ ގޮތަށް ކަމަށް އެ މަނިކުފާނު ވިދާޅުވި އެވެ.
އެގޮތުން މިރޭގެ ދަރުބާރުގައި އެމަނިކުފާނު ވިދާޅުވީ ރަށްރަށުގެ ރައްޔިތުންނާ ބައްދަލުކުރެއްވުމުގެ ދަތުރުފުޅުތައް އަންނަ ހަފުތާގައި ފައްޓަވައި ވަގުތު ލިބިވަޑައިގަންނަވާ ގޮތަކުން އެ ދަތުރުފުޅުތައް ތަކުރާރު ކުރައްވާނެ ކަމަށާއި، އަދި މާލޭގެ ރައްޔިތުންނާއި ބައްދަލުކުރެއްވުން ވެސް ވީ ވަރަކުން ކުރިއަށް ގެންދަވާނެ ކަމަށެވެ.
ހަމަ އެހެންމެ ކެންޕެއިންގައި އެމަނިކުފާނު ވަޢުދުވެ ވަޑައިގެންނެވި ފަދައިން ސަރުކާރުން ކުރާ ކަންކަން ރައްޔިތުންނަށް އޮޅުން ފިލުވައި ދެއްވުމަށްޓަކައި ކޮންމެ ދެ މަހުން އެއް މަހު ވަޒީރުންގެ ފޯރަމް ބާއްވާނެ ކަމަށާއި އޭގެ ފުރަތަމަ ފޯރަމް އަންނަ ހަފުތާގައި ބާއްވާނެ ކަމަށެވެ.
"އެއީ ޕަބްލިކް ފޯރަމެއް. އެ ފޯރަމްގައި ބޭނުން ސުވާލެއް އެ ފޯރަމްގައި އެ ވަގުތަކު ބައިވެރިވާ ވަޒީރުންގެ ދާއިރާތަކުން ކުރަން ފުރުސަތު ދޭނަން. ދެން އަނެއްކާ ދެ މަސް ފަހުން އަނެއް ބެޗް އޮފް ކެބިނެޓް މެމްބާސް ވަޑައިގަންނަވާނެ. ފަސް ބޭފުޅުން ފަސް ބޭފުޅުން ގޮތަށް ދެ މަހުން އެއް މަހުން ޕަބްލިކް ފޯރަމް ބާއްވާނަން،"
ރައީސް ވިދާޅުވި އެވެ.
ފޯރަމުގެ ތަފްސީލު ދެއްވަމުން ރައީސް ވިދާޅުވީ އެ ދެ ގަޑިއިރުގެ ތެރޭގައި ރައްޔިތުން ބޭނުންވާ ކޮންމެ ސުވާލެއް ވަޒީރުންނާއި ކުރެވޭނެ ކަމަށެވެ.
Advertisement
This content is created and paid for by advertisers and does not involve Voice Journalists
