މި އަހަރުގެ މިހާތަނަށް ރާއްޖެއަށް އިންޑިއާއަށް ވުރެ ގިނައިން ޗައިނާ އިން ފަތުރުވެރިން ޒިޔާރަތް ކޮށްފައިވާ ކަމަށް ޓުއަރިޒަމް މިނިސްޓްރީގެ ތަފާސް ހިސާބު ތަކުން ދައްކައިފިއެވެ.

ޓުއަރިޒަމް މިނިސްޓްރީން އާންމު ކުރާ ފަތުރުވެރި ކަމުގެ ޑެއިލީ އަޕްޑޭޓްސް ތަކުން ދައްކާ ގޮތުގައި މިދިޔަ އަހަރު އެންމެ ގިނައިން ފަތުރުވެރިން ޒިޔާރަތް ކުރި ގައުމު ކަމުގައިވާ އިންޑިއާ އޮތީ ފަސް ވަނައިގައެވެ. މި އަހަރު އިންޑިއާއިން ރާއްޖެ ޒިޔާރަތް ކޮށްފައި ވަނީ 9,744 ފަތުރުވެރިންނެވެ. 

މި އަހަރުފެ ފުރަތަމަ މަސް ނިމުމަކާއި ގާތްވެފައިވާއިރު މި މަހުގެ ތެރޭގައި ޗައިނާ އިން 10,113 ފަތުރުވެރިން ވަނީ ރާއްޖެ ޒިޔާރަތްކޮށްފައެވެ. މި އާއި އެކު ޗައިނާ ވެގެން ގޮސްފައި މިވަނީ 4 ވަނަ އަށް ރާއްޖެއަށް މިއަހަރު އެންމެ ގިނަ ފަތުރުވެރިން ޒިޔާރަތް ކުރި ގައުމަށެވެ.

ޖުމްލަ 128,548 ފަތުރުވެރިން މި އަހަރުގެ މިހާހިސާބަށް އައިރު ވަނީ ރާއްޖެ އަށް ޒިޔާރަތް ކޮށްފައެވެ. މިއީ 2023 ވަނަ އަހަރުގެ މި މުއްދަތާއި އަޅާ ބަލާއިރު 11.6% އިންސައްތައިގެ ކުރިއެރުމެއް ކަމަށް ޓޫރިޒަމް މިނިސްޓްރީގެ ތަފާސް ހިސާބުތަކުން ދައްކައެވެ. މިދިޔަ އަހަރުގެ މިހާ ހިސާބަށް އައިރު ރާއްޖެއަށް ޒިޔާރަތް ކޮށްފައިވަނީ 115,187 ފަތުރުވެރިންނެވެ.

އެންމެ ގިނަ ފަތުރުވެރިން މި އަހަރު ރާއްޖެއަށް ޒިޔާރަތް ކުރި ގައުމަކީ ރަޝިއާ އެވެ. އެއީ 14,495 ފަތުރުވެރިންނެވެ. 13,965 ފަތުރުވެރިންނާއި އެކު އިޓަލީ ދެވަނައިގައި އޮތް އިރު ތިން ވަނަ އަށް އެންމެ ގިނަ ފަތުރުވެރިން ރާއްޖެއަށް ޒިޔާރަތް ކުރީ އިނގިރޭސިވިލާތުންނެވެ. އެގައުމުން ރާއްޖެއަށް 10,689 ފަތުރުވެރިން ވަނީ ޒިޔާރަތްކޮށްފައެވެ.

މިދިޔަ އަހަރު ރާއްޖެއަށް 1.8 މިލިއަން ފަތުރުވެރިން ޒިޔާރަތްކޮށްފައިވާއިރު މި އަހަރު ސަރުކާރުން އަމާޒު ހިފާފައިވަނީ 2 މިލިއަން ފަތުރުވެރިން ރާއްޖެ އަށް ގެނައުމަށެވެ.